Nunatsinni imeq suminngaanneerpa?
Royal Greenland nunatsinni imermik atuinerpaavoq. Taamaammat imiliorneq erngullu pitsaassusaa suliffeqarfimmut pingaaruteqarluinnarput.
Nunatsinni imeq imerneqarsinnaasoq amerlanertigut imeqarfinnit illoqarfiit nunaqarfiillu avataanni inissisimasunit imaluunniit kuunneersuusarpoq.
Erngup imerneqarsinnaasup ilamernga erngup tarajullip immameersup "piaaffikkoortinneratigut" sorujuiaat atorlugu tarajuiarneqarlunilu minguiarneqartarpoq. Bakterissat, virusit, ionit imermiittussaanngit piiarneqartarput. Tamanna akisullunilu nukissamik atuiffiungaatsiartarami ikitsuinnarnit atorneqarpoq. Aammattaaq sermimit iigartartumit sikunik aatsitsinikkut annikitsumik imerneqarsinnaasumik imiliortoqartarpoq, taamallaalli nunatta avannaarsuani.
Imeq tarajoqanngitsoq pingaarnertut imermit aatsitameersuummat illoqarfimmi nunaqarfimmiluunniit ukiumut aattup taavalu nittaalat sialuillu annertussusaat apeqqutaasarpoq. Ataavartumik imeqarnissaq qulakkeerniarlugu tatsit imeqarfiit ukiumut immerneqartarnissaat minnerpaamik atuinertulli annertussuseqassaaq. Illoqarfiit nunaqarfiillu ilaanni ukiut ilaanni atuineq immerneqarneratulli illuniluunniit annertunerusarpoq, taamaammallu pilersuineq sunnertiavoq. Sumiiffippassuarni ukioq issittaqimmat, imeqarfiit kuuillu qerilluinnarsinnaammata ukiukkut ataavartumik imeqarnissap qulakkeernissaa unammillernarsinnaavoq.
Imeq imerneqarsinnaasoq naammaginartumik pitsaassuseqartikkumallugu assigiinngitsunik iliuuseartoqartarpoq, soorlu UV-mik qinngorlugu aamma klorimik akullugu. Aammattaaq imeqarfiit pisariaqanngitsumik mingutsinneqaqqunagit pallittaalisalersugaapput, soorlu pallitaalisap iluani qamuteralattoqassanngilaq, qimminik aneerussisoqassanngilaq il.il. Mingutsitsisoqassagaluarpat imermilluunniit amigaateqalertoqassagaluarpat taseq alla pallittaalisap avataaniippat aallerfigineqarsinnaanngilaq. Sumiiffinnili arlalinni tatsit arlallit misiliummik imeqarfittut sillimmatigineqarput, imermillu aallerfigineqarsinnaanngorlugit ruujorilersorneqarlutillu imaarsaatilersorneqarput.
Royal Greenlandip tunisassiorfia illoqarfippassuarni nunaqarfippassuarnilu imermik atuinerpaavoq. Sumiiffiit ilaanni fabrikkini imermik atuineq innuttaasut atuineraniilluunniit arlaleriaammik annertunerusarpoq. Royal Greenland inuussutissalerinermik suliffeqarfiugami imermik minguitsumik ataavartumik pilersuinissamik soqutigisaqarluinnarpoq. Imermik naammattumik peqanngippat tunisassiorfinni tunisassiorneq sunnerneqarsinnaavoq. Imeq minguitsoq aalisakka salinnissaannut, raajat qalipaasa kaanngartinnissaannut, uunnissaannut imermillu qerisumik illersuusernissaannut, saattuat uunnissaannut allanullu pingaaruteqarpoq. Taamatuttaaq eqqiluisaarneq inuussutissanillu isumannaallisaaneq pitsaanerpaassappata imeq minguitsoq eqqiaanermi pingaaruteqarpoq.
Tunisassiorfinni imermik sipaarneq illoqarfinni nunaqarfinnilu ataasiakkaani najugaqartunut suliffeqarfinnullu sunniuteqarsinnaammat Royal Greenlandip imermik atuinerup ukkatarinissaa anguniartuarpaa. Imermik pisaarnerulli tunisassiap pitsaassusaanut sunniuteqannginnissaa ataavartumik qulakkeerneqartarpoq.
Sumiiffinni aalajangersimasuni erngup imerneqarsinnaasup imermik tarajulimmik minguiarlugulu tarajuiakkamik tunisassiornermi eqqiaanermilu atorneqartussamik taarsernissaa Royal Greenlandimi pilersaarutigineqarpoq. Tamanna imermik imerneqarsinnaasumik pilersuinermi ilungersunarsinnaasunik annikillisaaqataassaaq. Imermik tarajulimmik tarajuiakkamik atuinissamut immikkut akuersissuteqaqqaartariaqarpoq, taamaammat Royal Greenland suliniut pillugu - aammalu tunisassiat pitsaassusaasa qaffasissuuginnarnissaat qulakkeerniarlugu oqartussanik ataavartumik isumasioqateqartarpoq.
Nunatta avannaani imeqarfiit sikusarmata allallu imermik pilersuinikkut unamillernartoqarmata nunaqarfinni imermik minguiaatilinni imermik tarajulimmik atuineq tulluarpoq. Imeq tarajulik ruujorinut makiinanullu manngertornititsisinnaammat taamatuttaarlu qaqrsaatinut tappiorannartuiaatinullu atorneqartartunut tamanut atorsinnaanngimmat sumiiffinni tamani imermik tarajoqanngitsuni atuineq imermik tarajulimmik atuinermik taarserneqarsinnaanngilaq.
