Nunatta imartaani raajarniarneq MSC-tut akuerisaaqqippoq
Nunatta kitaata imartaani raajat pillugit akuerisaanissamut nalunaarut januaarip 29-ani akerlilerneqarnani akuerineqarpoq. Tassa imaappoq nunatta kitaata imartaani raajarniarneq nalilersoqqinneqareerluni ukiumoortumillu misissuiffigineqareerluni MSC-p nungusaataanngitsumik aalisarnermut piumasaqaatai naapertorlugit ukiuni tulliuttuni tallimani akuerisaaqqippoq.
Nunatta kitaata imartaani raajarniarneq, nunani tamalaani issittup imartaani raajarniarnermi nunatsinnilu aalisarnermi siullersaalluni, siullermeerluni 2013-imi MSC-tut akuerineqarpoq. Kingorna 2017/2018-imi akuerisaaqqippoq, maannalu 2023/2024-imi taamatuttaaq akuerisaaqqilluni. Aalisarneq ukiut ingerlanerini ukiumoortumik misissuiffigineqartarpoq.
Akuerisaaqqinnissamut nalunaarut pisortatigoortoq uani takuuk
"Aalisarnermut taama pingaaruteqartigidumut akuerisaaqqinnerput nuannaarutigaarput," Lisbeth Schönemann-Paul, Royal Greenlandimi piujuartitsinermut siunnersorti Sustainable Fisheries Greenlandimilu siulittaasoq, oqarpoq.
"Issittup imartaani raajarniarneq nunatsinni inuiaqatigiinnut pingaaruteqarpoq, taamaammallu nunap siunissaq ungasinnerusoq eqqarsaatigalugu siuarsarneqarnissaanut pigissaarnissaanullu iluaqutaasussatut nungusaataanngitsumik aqunneqarnissaa pingaaruteqarluinnarpoq. Taamatuttaaq tunisassiat nungusaataanngitsumik aalisarneqarsimaneri takujuminartuutillugit tunisassiatta MSC-p ilisarnaataanik tungujortumik ilisarnaateqarnissaat pisisartutsinnut pingaaruteqarpoq."
