Inuttassarsiorneq siusittumi aallartittarpoq
Royal Greenlandimi inuttassarsiorneq aamma ilinniagaqarnermiippoq, nunatsinnilu suliffeqarfiit annersaanni susoqartarnersoq meeqqat atuarfiini atuartuni minnerni oqaluttuaralugu aallartittarpugut.
Inuusuttut amerlanerusut ilinniarnissaat taamaalillutillu nunatta innuttaasullu ataasiakkaat atugarissaarnerisa suliffissaqartinneqarnerisalu nukittorsarneqarnissaat nunatsinni anguniagaavoq. Tamanna minnerunngitsumik teknikkeqarnermut imarsiornermullu ilinniakkani atuuppoq. Royal Greenland inuusuttut ilinniarnissaminnut kajumissaarneqarnissaat qulakkeerniarlugu attaveqatigiinnermik sammisaqarnermillu qulakkeerisussamik suliniuteqarpoq, suliffeqarfillu aalisakkerinermi ilinniartut ilinniakkaminnik naammassinnittut amerlanerunissaannut annertuumik akisussaaffeqarpoq.
Ungaaq Abelsen Royal Greenlandip Sulisoqarnermut Immikkoortortaani Nuummiittumi ilinniartitsinermut siunnersortitut ulluinnarni sulisarpoq, massakkullu ilinniartunut attaveqateqarnerup, sammisaqartitsinerup ilinniartitsinerullu inerisarneqarnera aaqqissuunneqarneralu pillugit suliaqartut ilagaat.
”Royal Greenland nunatsinni suliffeqarfiit annersaraat, suliffeqarnissamullu periarfissarpassuaqarpugut – tamanna oqaluttuarissallugu pikkorinnerulernikuuvugut”, Ungaaq oqarpoq, nangipporlu, ”Meeqqat atuarfiini atuartunit minnerniit suliniuteqarluta aallartittarpugut, nunattalu imartaani aalisakkat nunarsuarmi tamarmi nerineqartartut paasigaangamikku soqutinnittaqaat. Ukioqqortusinerugaangamik ilinniarfissatut suliffissatullu periarfissat soqutigilertarpaat, taamaammat Royal Greenland suliffeqarfittut assigiinngitsunik periarfissarpassualittut soqutiginartuusoq ilisimassagaat kissaatigaarput”.
Suliniut pingaarnertut pingasunik immikkoortoqarpoq:
Sulilinnginnermi
Attaveqarneq sammisassaqartitsinerlu meeqqat atuarfiini atuartunit minnerniit ilinniarnertuunngornianut, sulianut aalajangersimasunut ilinniarsimasunut ilisimatusartunullu Royal Greenlandimi sulilernissaminnik suli eqqarsaateqanngitsunut nalimmassagaapput. Matumani aalisakkerinermut ilisimasat kiisalu ilinniarfissatut suliffissatullu periarfissat ukkatarineqarput.
- Nunatsinni nuna tamakkerlugu ilitsersuisarfik peqatigalugu ilinniarfissanik nittarsaassineq
Suliffeqarfiit ilinniarfiillu ilisimatusartussat, ilinnialertussat sulilertussallu naapinnissaat attaveqatigilernissaallu siunertaralugu nunatsinni illoqarfiit annerit ilinniartoqarfiusut tikeraartarpaat.
- Meeqqat atuarfiini, ilinniarnertuunngorniarfinni, inuussutissarsiutinik ilinniarfinni ilisimatusarfinnillu pulaarneq
Ilinniarfissatut periarfissat pillugit paasissutissat ukkataralugit immikkut aaqqissuussamik pulaarneq. - Suliffimmi misiliineq allaaserinninnerlu
Nunatsinni ilinniartut suliffeqarfimmi ilinniartuuppata ilinniartuunngippataluunniit ilinniarnerisa nalaani tapersersortarpagut. Suliffeqarfik pillugu allaaserinninnerusinnaavoq imaluunniit tunisassiorfimmi, imaani, nunatsinni allaffinni nunaniluunniit tamalaani tuniniaaveqarfitsinni sivikitsumik sivisuumilluunniit suliffimmik misiliinerusinnaavoq. - Aasaanerani sulineq
Nunatsinni sumiiffimmi allami suliffimmik misiliinissamut periarfissaqarlulni nunatsinni sumiiffigisatsinni amerlanerpaani aasaanerani sulisinnaaneq neqeroorutigaarput. - Danmarkimi suliffissanik nittarsaassineq
Suliffissanik nittarsaassinernut Danmarkimi ingerlanneqartartunut kalaallinut nunaminnut angerlaqqikkusuttunut danskinulluunniit piffissami sivisuumi sivikitsumiluunniit nunatsinni sulerusuttunut saaffiginnittunut peqataasarpugut.
"Nunatsinni Danmarkimilu ilinniarfissanik suliffissanillu nittarsaassinerni peqataalluta angalagaangatta linniartut naapillugit Royal Greenlandimi ilinniarfissatut periarfissat oqaluttuarisarpagut" Ungaaq oqaluttuarpoq
Ilinniartuunermi
Ilinniartut suliatigut inuttullu ilorrisimaarnissaat ilitsersuisoqarnikkut, ilininartut allat peqatigalugit bootcampertitsinikkut aqutsisunullu suliffimmik misiliinermi ilitsersuisutut pikkorissarnikunut attaveqarnikkut Royal Greenland Academyp ilinniartut ilinniartuunerisa nalaani tapersersortarpai.
"Ilinniartuutigut piumassuseqassasut tunniusimassasullu naatsorsuutigaarput" Ungaaq Abelsen oqarpoq "ilinniartut taamaaliorpata ilinniartuunerminni sapinngisamik pissarsiaqarluarnissaat uaguttaaq sukataarutigisarparput".
Ilinniartuunermi suliatigut inuttullu ilorrisimaarneq ukkatarineqarpoq.
- Ilitsersuisoqarneq
Ilinniartut suliffeqarfimmi sulisumik ilinniartuunermi tapersersortaasinnaasumik malinnaavigisaqarnermikkut ilitsersuisoqarsinnaanerminnik neqeroorfigineqartarput. - Suliffimmik misiliinermi ilitsersuisut piginnaasallit
Aqutsisut sulisullu ilinniartunik sapinngisamik ikiuilluarsinnaaniassagamik suliffimmik misiliinermi ilitsersuisussatut ilinniartinneqartarput. - Ilinniartut allat peqatigalugit bootcamperneq
Bootcamp ukiup aappassaani ilinniartuutitsinnut tamanut neqeroorutigineqartarpoq, tassaavorlu ilinniartut allat peqatigalugit inuttut ineriartornermut, suleqatigiinnermut misilittakkanillu avitseqatigiinnermut sapaatip-akunneranik sivisussusilik. Bootcampit Upernaakkut Kangerlussuarmi ingerlanneqartarput, naliliinerillu naapertorlugit ilinniartut sapaatip-akunnerani tassani peqataareeraangamik ilinniakkaminnik naammassinninnissaminnut sakkussarissaarnerusarput.
Ilinniartut Kangerlussuarmi naapittarput. Inuttut ineriartorneq, suleqatigiinneq suliffimmilu ilorrisimaarneq pineqartarlutillu ataqatigiilertoqarlunilu ikinngutitaartortoqartarpoq.
Atorfininneq
Ilinniarneq ineriartornerlu ilinniartuuneq naagaangat uninneq ajorput, atorfininnermili ingerlatiinnarneqartarput. Royal Greenland Academy ilinniaqqinnermut piginnaanngorsaqqinnermullu kiisalu Sulisa+-imik taaneqartartutut sullivimmi atukkat ilorrisimaarnerlu pillugit periarfissanik assigiinngitsumik neqerooruteqarpoq.
Royal Greenland Academy aamma pikkorissarnernik inatsisitigut piumasaqaataasunik arlalinnik neqerooruteqarlunilu aalisartunik tunisassiorfinnut tunisisartunik ilinniartitsinermik neqerooruteqarpoq.
Royal Greenland Academy pillugu uani paasisaqarnerugit
