You have an outdated browser

Please update your browser

Update browser
Nutaarsiassaasivik Nutaarsiassat

Aalisartut pingasut tapiissuteqarfigineqarlutik umiatsiaarartaarput

18.01.2018

Namminersorlutik Oqartussat inuussutissarsiutinut tapiissutaat ESU aqqutigalugu kujataani Aappilattumi aalisartut pingasut tapiissuteqarfigineqarnermikkut taamatullu Royal Greenlandimiit aningaasatigut atukkerneqarnermikkut umiatsianik naleqquttunik pisisinnaanngorput. Aalisartut taakku pingasut ESU aqqutigalugu tapiissuteqarfigineqaramik Royal Greenlandimillu aningaasanik atukkerneqaramik tamarmik umiatsiamik Poca 600 –mik 225 HK-inik motoritalimmik pisaarsinnaanngorput.

- ESU-mit tapiissuteqarfigeqarnissamik qinnuteqarninni Royal Greenlandimi aalisarnermi siunnersortimit siunnersorneqarlungalu ikiorneqarama minnerunngitsumillu Royal Greenlandimit aningaasanik atukkerneqarama qujamasuutigeqaara. ESU-mit tapiissuteqarfigineqarnera Royal Greenlandimillu aningaasanik atukkerneqarnera iluaqutigalugu maanna umiatsiaaqqamik naleqquttumik pisaarsinnaanngorpunga, taamaalillunga Royal Greenlandip Aappilattuni tunisassiorfianut annertunerusunik tulaassuisinnaanissannik periarfissaqalerpunga, taama oqarpoq ESU mit taperneqartut Royal Greenlandimillu aningaasanik atukkerneqartut ilaat, 50-inik ukiulik Marius Levisen.

Aalisartut kaammattorneqarput

Royal Greenlandimi aalisarnermi siunnersorti Klaus Frederiksen oqarpoq aalisartut Aappilattuneersut umiatsiamik naleqquttumik pisaarniarneranni ESU-mit tapiissuteqarfigineqarnissamik qinnuteqarnissaannik kaammaattorneqarsimasut.

- Aalisartut naleqquttunik umiatsiaarartaarusullutik Royal Greenlandimut aningaasanik atukkuneqarnissaminnik qinnuteqaateqarmata ESU-mit tapiiffigineqarnissamik qinnuteqaateqaqqullugit kaammatorsimavavut. Kingorna aalisartut siunnersorneqarput taamatuttaaq qinnuteqaateqarneranni ikiorneqarput kingornalu akuerineqarlutik. Kingorna aningaasanik Royal Greenlandimit atukkerneqarput. Aalisartut umitsiaqqaanik naleqquttunik pisaarnernerisigut Royal Greenlandip Aappilattuni tunisassiorfianut aalisakkat tunineqartartut annertulerulernissaat neriuutigaarput, Klaus Frederiksen oqarpoq.

Neriuuteqarneq

Marius Levisenilumi POCA 600-mik februarimi umiatsiaarartaarnissi neriuuteqarfigaa.

- Royal Greenlandip Aappilattuni tunisassiorfia 2014-imi ammarneqarmat piniartutut inuussutissarsiuteqarnera aallukkunnaarlugu aalisalerpunga. Kisiannili umitsiaarara Q-17-eq nunaqarfimmiit ungasiartumi aalisassutigalugu isumannanngimmat aamma naleqqutinngimmat maanna naleqqunnerusumik isumannaatsumillu umitsiaarartaaruma siornatigorniit annertunerusunik qaleralinnik saarullinnillu tulaassisalernissara neriuutigaara, Marius Levisen oqarpoq.

Umiartsiaaqqat Poca 600-it pingasut Narsami bilileriffik Narsaq Auto aqqutigalugu piniarneqarput. Umiatsiaaqqat tikissimalerpata sillimaniarnermullu atortorissaarutilersorneqareerpata februarip naajartornerani Aappilattuni aalisartunut tunniunneqassapput.

Aalisartut umitsiaarartaarniarlutik imaluunniit aalisarnermi atortunik pisissutissaminnik Royal Greenlandimit aningaasanik taarsigassarsisut ataasiakkaarlugit taarsersuinissamik isumaqatigiissusiorfigineqartarput taamatuttaaq Royal Greenlandip tunisassiorfiinut tunisisarnissaannik piumasaqarfigineqartarput, isumaqatigiissutillu taakku aamma Aappilattuni aalisartunut pingasunut atuutsinneqarput.

Marius Levisen aalisartullu allat marluk Aapilattuneersut Poco 600-mik pisaassapput. Assimi Poca 600 Ilulissat kangerluani assilisaavoq.

Marius Levesenip umiatsiani Q-17-eq taarserlugu Poca 600-imik pisaarnissi isumalluarfigaa

Paasissutissat:

Foto: Nikolaj Benjaminsen & Nathan Kreutzmann

Nutaarsiassat tullii: Royal Greenlandip APP-ia atorluarneqarpoq
...