Qullukkiorunnaarlutik saarullinnik panertitsisalerput
Uummannap pigisaani Ukkusissani Royal Greenlandip tunisassiorfia ukioq kingulleq qullukkiussaarami saarullinnik tisaanik issimik panertitanik tunisassiulerpoq. Saarullinnillu issimipanertitat panertinneri ingerlalluartoq Ukkusissani Royal Greenlandip tunisassiorfiani aqutsisup, Johanne Samuelsenip oqaatigaa:
Allattoq Marie Kuitse Kristensen, mkri@royalgreenland.com- Saarulliit tisaagut siulliit maanna qullukkat nivinngaavigisartagaanni nivinngareernikuupput panernissaat utaqqiinnarpagut, Johanne Samuelsen oqarpoq.
Pisariinnerulerpoq
Aqutsisup ilanngullugu oqaatigaa saarullinnik tisaanik panersiinerup pisariinnerunera iluaralugu.
- Qullukkiornerup aallartinneraniit suliassartaa annertusarpoq, panivinnissaasalu tungaannut issilluartumiinnissaat nakkutigiinnaavittarpagut. Issangiarniartillugu qullukkat tamaasa piaarlugit qerititsivimmut issorartarpagut issileqqikkaangallu aamma nivinngaassoqqittarlugit. Sila issangiaqattaaleraangat ilaatigut piffissangaatsiaq atorlugu utikattumik sulineq ingerlanneqalertarpoq, taamaammat saarulliit pisariunnginnerujussuat ilaatigut iluaqutitaqarpoq naak qullukkiorneq maqaasilaaraluarlutigu, Johanne Samuelsen oqarpoq.
Kingulliit nivinngaassorneqassapput
Royal Greenlandip Ukkusissani tunisassiorfiani saarullinnik tisanerup nalaani sulisut amerlineqartut aqutsisup aamma oqaatigaa.
- Maanna sulisut katilluta 15-iuvugut, sapaatip akunneratali uuma ingerlanerani sapaatillu akunnerata tulliata ingerlanerani saarulliit tisaassat kingulliit tonsit arfinillit missingi nivinngaassussavagut. Saarullinnik tisaneq naammassippat sulisut pisarnertut 13-nngoqqissaagut, Johanne Samuelsen oqarpoq.
Saarulliit issimi panerserneqartut marsip ingerlanerani tamarmik panereerlutik piareernissaat naatsorsuutigineqarpoq.
Saarulliit issimi panersikkat Ukkusissaneersut aggustusimi nunatsinni pisiniarfinni Brugsenini, Pisiffinni Pilersuisunilu pisiarineqarsinnaalernissaat Royal Greenlandip nunatsinni tunisassianik tuniniaavimmi ingerlatsisuata Malik Hegelund Olsenip naatsorsuutigaa.
Paasissutissat:
Asseq: Lisa Petersen
