Royal Greenlandimi Unnuk Kulturisiorfik ussagarneqarluarpoq

Royal Greenlandimi sulisoqarnermi pikkorissaanermilu sulisoq Tina Hansen, nunatsinni tuniniaavimmi tuniniaasoq Kaassannguaq Zeeb peqatigalugu ukioq manna Royal Greenlandimi Unnuk Kulturisiortitsinermi aaqqissuisuusoq isumaqarpoq ukioq manna ilaatigut pilerisaarineruneq aamma Nuuk Transportip suleqatiginera Unnuk Kulturisortitsinerup iluatsilluarneranut pissutaasut.

- Ukioq manna Unnuk Kulturisiortitsinissarput allaalaartumik pilerisaarutigaarput, ilaatigut Facebook aqqutigalu. Aamma pulaartutsinnut tunniussavut ukioq manna allaanerupput, ilaatigut meeqqanut tunniussanik Royal Greenlandip ilisarnaataanik allagartalinnik bamseeqqanik tunioraagatta, Tina Hansen oqarpoq, nangipporlu:

- Ukioq manna aamma iluatitsilluarnitsinnut pissutaavortaaq pulaartitsinnut nerisassanik sassaalliuteqarnissarput pillugu ussassaarigatta. Aamma Royal Greenlandip ilisarnaataanik allagartalinnik illoqarfimmiit ilaasunik angallassisunik bussinik attartorsimanerput iluatitsinitsinnut pissutaaqataavoq.

Nuuk Transport aamma Unnuk Kulturisiorfimmi Royal Greenlandimut orniguttunut immikkuullarissumik misigisaqartitsivoq suliffeqarfiup kranersui atorlugit 60 miiterit angullugit qummut majuartitseqattaarlutik misigisaqartitsinerat nuannarineqarluinnarmat.

Unammisitsinerit nerisassallu mamarluinnartut

Royal Greenlandimi Unnuk Kulturisiorfimmi sumiiffinni assiginngitsuni pingasuni pisoqartitsisoqarpoq, tassalu Nuuk Transportip sulisuisa nerisarfianni Igaffimmi, Royal Greenlandip tunisassiorfiani kiisalu kilisaammi Tuugaalimmi. Pisoqartitsiffiusuni meeqqat titartaallutik unammisitsinermi peqataanerini angajoqqaarpassuit immersuilluni unammisitsinermi TIP 13-imi immersuipput.

Inuit 1064-it Royal Greenlandip tunisassiorfiani ilaatigut raajanik qalipaajaallaqqinneqqusaallutik unammineranni meeqqat pinnattassanik “aalisarput” . Inuit 800 – it missingi kilisaammi Tuugaalimmi sulisut tikilluaqqusisut alakkarpaat. Inuit 1343-it Igaffimmut ornigullutik Royal Greenlandip igasuata, Sune Bjerrep igaffimmi ikiortini ilinniartunilu peqatigalugit aalisakkanik assigiinngitsunik illinnasaarlugit ussigassat Canapee-nik taaneqartartut 4.800-inik amerlassuseqartut aamma raajanik saarullinnik qaleralinnillu suppaliaa bouillabaisse, inunnit 900-it missinginit usserneqarpoq.

- Sassaalliutigisavut mamaralugit pulaartivut oqartarput nersualaarillutillu. Pulaartivut nuannaarrateqimmata uagullu nerisassiornerput ajunngitsumik ingerlammat igaffimmi sulinerput nuanneqaaq, Royal Greenlandimi igasoq Sune Bjerre oqarpoq. Taassuma sulisunilu Royal Greenlandimi Unnuk Kulturisiorfimmi canapee-it 4800- it aammalu aalisakkanik suppaliat bouillabaisse 100 literit missingi sassaalliutigisaat inuit ussereeraangamikkut Unnuk Kulturisiorfimmi ornitassanut allanut ingerlaqqittarput.

Roayl Greenlandimi Unnuk Kulturisiorfimmi unammisitsinerni assigiinngitsuni makitaasut makitsoqareernerani  pinnaattaassaminnik Royal Greenlandip tunisassiorfianuit imalluunnit allaffissuanut aasinnaagaat ataasiakkaarlugit sianerfigineqassapput.

Royal Greenlandimi Unnuk Kulturisiornermi assilisat ataani takuneqarsinnaapput.