Saattuni tunisassiorfik nutartissammat qaammatini pingasuni matoqqassaaq
Saattuni tunisassiorfik qerinasuartitsiveqalersinniarlugu ilaneqarnissaa pissutigalugu tunisassiorfik qaammatini pingasungajanni matoqqasussanngorpoq. Tunisassiorfik ammaqqippat pingasoriaammik tunisassiortoqarsinnaalissaaq. Nunaqarfimmi aamma sulisussaaleqisoqarmat sulisunut arfineq-pingasunut inissalimmik inissialiortoqassaaq.
Allattoq Káte Hansen, kaha@royalgreenland.com- Saattuni tunisassiorfik Uummannap pigisaani kisiartaalluni supoortunik qerititsissuteqarmat qerinasuartitsivilersorlugu nutarsaavigineqassaaq. Nutarterinerup kingunerisaanik pingasoriaammik tunisassiortoqarsinnaalissaaq, taamalu ulloq unnuarlu 15 tonsit missaannik tunisassiortoqarsinnaalissalluni, maannamut 5 tonsit missaannik tunisassiortoqartarluni, Niels Ole Møller qalerallerinermi ingerlatsisoq oqarpoq.
Saattuni tunisassiorfiup qerisuuteqarnerulernissaanut aamma ilaatigut peqqutaavoq Royal Greenlandip Nuugaatsiami tunisassiorfigisimasaata tunisassiorsinnaanikkut annaasaqaatigisimasaanik pilersitseqqinnissaq. Tunisassiorfik siorna juunip qaammataani tassaarsuarneqarneragut illuutinut annaasanut ilaavoq.
Sulisussanik tikisitsineq
Tunisassiorfimmi qerisuutit kingulliit ullumikkut sisamanngornermi Uummannamut assartorneqassapput, tunisassiorfillu aggustip aallaqqaataani matugallarneqassaaq.
- Qerinasuartitsiviliilluni nutarterineq ilutigalugu sulisunut arfineq-pingasunut inissalimmik inissialiussaagut. Inissat katitertakkatut sananeqassapput, taamaammallu tunisassiorfik aammalu inissiaqarfissaq oktobarip qaammataata qiteqqunnerani naammassereersimassapput, Niels Ole Møller oqarpoq.
Saattuni aamma sulisussanik amigaateqartoqarmat inissialiat sulisunut tikisitanut atugassiaapput.
- Sulisorisavut angutit aalisarsinnaanermut allagartartaarlutik aalisartunngormata ajoraluartumik sulisorisatut annaavagut. Sulisuvullu aalajaatsut ukioqqortusisut inuusunnernik taarserneqarneq ajormata allatuulli sulisussaaleqiffiusuni avataaneersunik sulisussarsiortariaqarpugut, Niels Ole Møller qalerallerinermi ingerlatsisoq oqarpoq.
Saattuni sulisut sanaartornerup nalaani Uummannap tunisassiorfiani sulinissaannut neqeroorfigineqarput.
Paasissutissat:
Foto: Marie Knudsen, Saattut
