Sivikitsuinnarmik tunisinermi killilersuisoqarpoq
Uummannami Ukkusissanilu Royal Greenlandip tunisasssiorfiini teknikkikkut ajoquteqartoqarnera pissutigalugu junip ingerlanerani Uummannami aalisartut tunisinerat ulluni arfinilinni killilersorneqarpoq. Sapaatip akunnerata 26-ip ingerlanerani teknikikkut ajornartorsiutaasut aaqqinneqarmata aalisartut killilimmik tunisinerat unitsinneqarpoq, Uummannamilu Royal Greenlandip tunisassiorfiani tunisassiorneq maanna ingerlavaartumik ingerlasoq, Uummannami tunisassiorfiup ingerlatsisua Kirsten Kristensen Worm oqarpoq.
Allattoq Inga Egede, ineg@royalgreenland.com- Uummannami Ukkusissanilu tunisassiorfinni teknikkikkut ajornartorsiuteqartoqarnera aamma Saattuni sulisussaaleqisoqarnera pissutigalugu qalerallit tunisassiassat 100 tonsit uningasuutigineqaleraluarput. Taakku 100 tonsit pisoqalisoorlutik igiinnartariaqalersinnaanerat pinngitsoorniarlugu junip 19-ianiit 24-iata tungaanut aalisartut tunisinerat killilersortariaqarsimavarput. Tunisassiorfinni teknikkikkut ajornartorsiutaasut aaqqinneqarmata killilersuineq unitsinneqarpoq, tassalu junip 24-ianiilli aalisartut Uumannami Royal Greeenlandip tunisasiorfianut killeqanngitsumik tunisisinnaaqqilerput, Kirsten Kristensen Worm oqarpoq.
Tunisassiassanik assartuineq
Tunisassiorfiup ingerlatsisua oqaluttuarpoq Ukkusissani tunisassiorfimmi teknikkikkut ajoquteqartoqarnera pissutigalugu aamma Saattuni sulisussaaleqineq pissutigalugu allatut ajornartumik junip ingerlanerani nunaqarfinni taakkunaniit tunisassiassanik assartuisariaqarsimallutik.
- Nunaqarfinniit Uummannamut tunisassiassanik assartuineq pisariaqavimmat Uummannami suliassaqangaatsiasimavugut. Ukkusissani Uummannamilu tunisassiorfinni teknikkikkut ajornartorsiutit ullualuit ingerlanerini aaqqinneqarmata piffissaq sivikitsuinnaq tunisinerni killilersuinerit ingerlattariaqarsimavagut, Kirsten Kristensen Worm oqarpoq.
Aviisimi Sermitsiami saqqummersumi kingullermi allaaserineqarpoq nunaqarfinni Nuugaatsiami Illorsuarnilu tassarsuaqarnerata nassatarisaanik Uummannami tunisassiorfimmut tunisisoqarnerulermat Uummannami tunisinermi killilersuineq ingerlanneqartoq, taamatuttaaq Uummannami tunisassiorfiup 2017 –imi alllineqarneratigut naak qerititsiviit 600 tonsinik inissaqartitsineruleraluartut tunisinermi killilersuineq ingerlanneqartoq allaaserineqarpoq.
- Soorngunami Nuugaatsiami Royal Greenlandip tunisassiorfiata matunera aamma Illorsuarni Uummannaq Seafoodip tunisassiorfiata matunera Uummannami tunisassiorfimmut tunisinerup annertusinera mauguvarput, kisianni tunisat annertusinerat pissutigalugu tunisinermi killilersuineq atuutsinneqanngilaq. Uummannami Ukkusissanilu tunisassiorfinni teknikkikkut ajornartorsiuteqaleraluarnerput aamma Saattuni sulisussaaleqineq pissutigalugu tunisinermi killersuileraluarnerput atuutsinneqaleraluarpoq. Soorlu oqareernittuut teknikikkut ajornartorsiutit maanna aaqqinneqareerput tunisassiornerlu tamakkiisumik maanna ingerlavoq, naak Uummannami aamma Saattuni sulisussanik qulinik amigaateqaraluarta, Kirsten Kristensen Worm oqarpoq.
