Sulisussaaleqisoqarmat sulisut sulipiloorput
Sineriammi Royal Greenlandip tunisassiorfiini katillugit silisut 120-it missingi maannakkorpiaq amigaatigineqarput. Ingammik Upernavimmi, Uummannami Maniitsumilu Royal Greenlandip tunisassiorfiini sulisunik amigaateqarput.
Allattoq Inga Egede, ineg@royalgreenland.comUummannami maannakkorpiaq annertuumik sulisunik amigaateqartoqarnera, ilaatigut Saattuniit Ikerasanniillu sulisussaaleqineq pissutigalugu tunisassiassat Uumannamut assartorneqartarmata, Uummannami tunisassiorfimmi sulisut artukkerneqarput.
- Naak ulloq unnullu tunisassioraluarluta tamakkiisumik tunisassiussagutta sulisunik amerlanerusunik suli amigaateqarnerput pissutigalugu sulisuvut aalajaatsut qaangiuttoorlutik sulisariaqartaramik artukkerneqarput. Tamanna timaasa malugaat qasulluinnarpullu, taama oqarpoq Uummannami tunisassiorfimmi ingerlatsisoq, Kirsten Kristensen Worm, nangipporlu:
- Illoqarfimmi suliffissarsiuussisarfik aqqutigalugu sulisussarsiortaraluarpugut aamma Kinameersunik, Skandinaviameersunik kiisalu Tunumeersunik sulisunik tikisitsinikuugaluarluta suli amigaateqaratta aalisartut tunisaannut malinnaaniarlutik sulisuvut assoroorput.
Upernavimmi Maniitsumilu aamma sulisussaaleqipput
Uummannami nunaqarfiinilu kisimi sulisunik amigaateqanngillat. Nunaqarfinni Aappilattumi, Innaarsunni, Tasiusami aammalu Upernaviup tunisassiorfiani sulisinnaasunik amigaateqarlutik Upernavimmi Royal Greenlandip tunisassiorfiani ingerlatsisoq, Flemming Andersen paasissutiissiivoq.
Taamatuttaaq Maniitsumi Royal Greenlandip tunisassiorfiani ullut tamaasa sulisunik amigaateqartarput.
- Naak Kinameersunik nordjobbertunillu avataaniit sulisussatsinnik tikisitsinikuugaluarluta, Maniitsumi ullut tamaasa sulisunik amigaateqartarpugut. Taamaattumik maanna sulisorisavut sulipiloorput. Ajuusaarnaqaaq sulisut amigaataasut illoqarfimmi pissarsiarisinnaannginnatsigit, taama oqarpoq Royal Greenlandimi tunisassialerinermi ingerlatsisoq, Sten Sørensen.
Qasigiannguani, Ilulissani Qeqertamilu tunisassiorfiit aamma sulisunik amigaateqarput.
- Suliffissarsiuussisarfik Majoriaq aqqutigalugu sulisussarsioratta pissarsisigaluarluta suli amigaateqarpugut, naak suliartorlutik takkuttartut arlaqartaraluartut ajoraluartumik arlallit takkuteriarlutik takkuteqqinneq ajorput, Qasigiannguani tunisassiorfiup ingerlatsisua, Hans Grønvold oqarpoq.
Ilulissani tunisassiofiup ingerlatsisua, Anders Andersen piffissami aggersumi sulisussaaleqinertik qaangersinnaallugu neriuutigigitsik oqarpoq.
- Royal Greenlandimi sulisoqarnermik immikkoortortaqarfik aqqutigalugu avataaniit tikisitsilluta sulisussarsiorpugut, taassuma saniatigut sulisussat Filippinerineersut isumaqatigiissuteqarfigineqareersut tikinnissaat utaqqiinnarparput.
Maannakkorpiaq Qeqertami tunisassiorfik ukiup sinnera sulisinnaasunik angutinik nukittuunik sulisussarsiorpoq.
Qeqertarsuarmi, Kangaatsiami, Sisimiuni, Nuummi Paamiunilu Royal Greenlandip tunisassiorfii maannakkorpiaq sulisunik amigaateqanngillat, kisiannili ataavartumik sulisinnaasut amigaatigigitsik Nuummi tunisassiorfiup ingerlatsisuata, Ilannguaq Abrahamsenip oqaatigaa.
- Maannakkorpiaq sulisunik amigaateqanngilagut suliartortut nutaat amerlammata, kisiannili ullut tamaasa ataavartumik sulisinnaasunik amigaateqarpugut, Ilannguaq Abrahamsen oqarpoq.
Tunisassiorfinni sulisussaaleqineq pivoq naak Royal Greenlandimi sulisoqarnermut immikkoorrortaqarfik ukioq manna sulisussanik inunnik 130-inik tikisillugit suliartortitsigaluartoq, taakkunannga sulisussat 80-it nunatsinni illoqarfinni allaneersut , nordjobbertut 24-it, Kinameersut 18-it aamma Filippinerineersut qulingiluat tikisinneqarput.
