Tunitsiviit marluk sulisussaaleqingaarnatik tunisassiorsuaarput

Kullorsuarmi tunitsivik piginneqatigiiffimmit Arctic Fish Greenland A/S-imit Royal Greenlandip 70 %-imik piginneqataaffigisaanit siorna pigineqalermalli containerinik sisamanik ulluni makkunani qerititsivilerneqartussanngorpoq.

- Tunitsivik containerinik qerititsivinnik qulinik ukioq manna pilerneqarpoq. Tunisassiorneq ingerlalluangaarmat taakkuninnga qulinik pilerneqarneq soorlu malugisimanagu. Taamaammat sisamanik tapertassaannik maanna ilaqqippagut. Uanga nammineq aalajangiisinnaasuuguma ilaqqikkusussinnaagaluarpakka, kisianni aamma nunaminertatut periarfissaasinnaasoq amigalerami, taamaammat susinnaanerluta takujumaarparput, Frederik Olsen Kullorsuarmi Nuussuarmilu tunitsivinni ulluinnarni aqutsisuusoq oqarpoq nangillunilu:

- Ukioq aalisartut pissaannik qamuteralannik katillugit 18-inik Nuussuarmut Kullorsuarmullu pilersuivugut, tamatumalu kingorna aalisartut qaleralippassuarnik tulaassuiuarsinnarput, tunisassiornerlu marloriaatinngorluni. Taamalu qaammatit tallimat ingerlaneranni Kullorsuarmi Nuussuarmilu 700 tonsit qeritippagut.

Sulisussaaleqinngillat

Arctic Fish Greenland A/S-imi 2017-imi juulip aqqaneq-aappaani pilersinneqartumi najukkani aalisartut 96-it aammalu sulisut qulit piginneqataasuupput. Tulaassuineq piffissap ilaani ima ulapaarfiutigilersimatigaaq allaat piginneqataasut isumasioqatigeereerlutik tulaassuinermi pilersaarusiamik atuutsitsilertariaqarsimallutik.

- Eqimattat aalisartunik 20-nik inuttallit ataasinngornermi tulaassuisarput, eqimattat allat marlunngornermi tulaassuisarput ilaalu ilanngullugit. Tulaassuinermi pilersaarut pitsaasorujussuuvoq, imalu iluarineqartigaaq allaat ukiumut atorneqarnissaa aalajangiunneqarluni, Frederik Olsen unnersiorpoq nangillunilu:

- Tulaassuinermut pilersaaruteqartitsineq allanut angummaffiusanngitsunut innersuukkusunnarpoq kingunera pitsaaqimmat. Qaleralinnik annaasaqanngivilluta ingerlavugut. Tulaassuinermi pilersaarusiortalerneq aalisartullu ataatsimut aalajangersagarigatsigu naammagittaalliutaasinnaasunik ukioq tamaat tusanngilavut. Aalisartunullu nalunaarutissaqaraangatta aalisartut ataatsikkut sms atorlugu kalerrittarpavut, taamaammallu qanga nivinngaalluni iliuuseqartarneq Kullorsuarmi Nuussuarmilu atorunnaalerpoq.

Naallu ingerlatseqatigiiffik Nuussuarmi canadamiut umiarsuaannit tunitsivimmit ulloq unnuarlu 14-it missaannik sulisulimmit unammillerteqaraluartoq sulisussaaleqisoqanngilaq.

- Kullorsuarmi ukiuunerani aasaaneranilu sumilluunniit ajornartorsiuteqarfiunngitsumik sulisussaaleqiffiunngitsumillu ingerlalluarujussuartoqarpoq, naallu Nuussuarmi aasaanerani unnukkorsiortussanik amigaateqarsinnaasaraluarluta tunisassiorneq aamma ingerlalluaqaaq. Sulisut tamarmik taakkunani sumiiffinneersuupput avataaniillu tikisitanik ilaqaratik, Frederik Olsen oqarpoq.

Nuussuarmi Kullorsuarmilu tunitsiviit tamarmik immikkut qulit missaannik sulisoqarput.

- Uanga nammineq aalajangiisinnaasuuguma containerit ilaqqikkusussinnaagaluarpakka, kisianni nunaminertatut periarfissaasinnaasoq amigalerami, taamaammat susinnaanerluta takujumaarparput, Frederik Olsen Kullorsuarmi Nuussuarmilu tunitsivinni ulluinnarni aqutsisuusoq oqarpoq.

Kullorsuarmi tunitsivik containerinik qerititsivinnik sisamanik kingullermik tallimanngormat pilerneqarpoq.