Imarsiortut katerisimaartinneqarput

Pikkorissaqataasut ataasiakkaat piginnaasaannik ukkassinikkut ataasiakkaartillugit suleqatigiikkuutaartillugillu pikkorissartinnerisigut katerisimaartinneqarmata timi atorlugu sammisaqartinneqarput, tamannalu Royal Greenlandip aqumiunik nunatsinneersunik inuttut ineriartortitsinissamut iliuusissatut pilersaarutaani anguniakkat ilagaat. Ulluni pingasuni katerisimaartitsineq timersornermik akunnittarfimmi Comwell Rebild Bakkerimi ingerlanneqarpoq.

” Bootcamp Kaassassuk”-imik taallugu katerisimaartitsineq Royal Greenlandimi inuttalerinermut immikkoortortap sulisoqarnermullu immikkoortortap taamatuttaaq qimussimik alapernaarsuinermut timmisartornermillu sakkutuunut ilitsersuisartup Linda Larsenip suleqatigiinnerisigut ingerlanneqarpoq.

Siunertaq

- Pikkorissaqataasut suleqatigiisinnerisigut timilu atorlugu sammisaqartinnerisigut piginnaasaasa ineriartortinneqarnissaat siunertaralugu katerisimaartinneqarput. Kilisaataatitsinni suliassat unammillernartut annertuumillu akisussaaffeqarfiusartut aqutsisunit tarnikkut nukittuunit naammassineqartarnissaat kissaatigigatsigu pikkorissaqataasut ilitsoqqussaaninngarnit allanik inuttut unammillernartunik sammisaqartinneqarput, Royal Greenlandimi inuttalerinermi ingerlatsisoq Mika Heilmann oqarpoq, nassuiaavorlu:

- Kilisaatinik Royal Greenlandimit pigineqartuni aqutsisut nunatsinneersut piginnaasaqarnerulernissaat tarnikkullu nukittunerulernissaat anguniarlugit katerisimaartitsineq ingerlanneqarpoq.

Pikkorissaqataasut; kilisaatini mistalitut, maskiinalerisutut, fiskeriteknologitut, angallammi naalakkatut ilinniartut taamatuttaaq angallammi naalaganngortussat tunisassiorfimmilu ingerlatsisunngortussat kilisaatini Royal Greenlandimit pigineqartuni ulluinnarni sulisartut ulluni pingasuni katerisimaartitsinermi peqataasussatut toqqarneqarput.