Royal Greenland Naalagaaffit Peqatigiit anguniagaat tunngavigalugit pilersaarusiukkamik ingerlatsilissaaq

Royal Greenlandip suliniummik “Ajunngitsuliornermiit niuernermik ingerlatsinermut”-mik qulequtsikkamik ingerlatseqataanermigut CSR tunngavigalugu piujuartitsinermut tunngasunik aallussaqanerulernissaminut periarfissaqalerpoq, suliffeqarfissuarmi Royal Greenlandimi avatangiisilerinermi ingerlatsisoq Lisbeth Due Schönemann-Paul oqarpoq.

-Neriuppugut suliniummik ingerlatseqataanitsigut Naalagaaffiit Peqatigiit nunarsuarmi anguniagaat tunngavigalugit piujuartitsinermut tunngasunik aallussaqarnerput annertunerulissasoq, taamaalillutami suliffeqarfittut inuiaqatigiinnut akuuffigisatsinnut iluaqutaasumik niuernikkut inerisaanikkullu sunniuteqarsinnaassagatta, Lisbeth Due Schönemann-Paul oqarpoq.

Suliniut Dansk Industrimit pilersinneqarpoq, Danmarkimilu Industriens Fondimit aningaasalersorneqarpoq. Suliffeqarfiit nunarsuarmi kikkulluunniit iluaqutigisinnaasaannik piujuartitsineq tunngavigalugu nutaanik ineriartortitsinissaminnut isumassarsitinneqartarnissaat kajumissaarneqartarnissaallu siunertaavoq.

- Nunarsuarmi suliffeqarfinni aalisarnermik tunisassiornermillu aallussaqartuni siuttut ilagaatigut, taamatuttaaq piujuartitsineq tunngavigalugu aallussinerput siunissami aamma tusaamaneqarluaatigerusupparput, Lisbeth Due Schönemann-Paul oqarpoq.

Piujuartitsineq pillugu anguniakkat ingerlatsinitsinni tunngavigissavagut

Royal Greenland suliniummik ingerlatseqataanermigut suliffeqarfinni angisuuni mikisunilu sulisut isummersoqatigiinneranni isumassarsioqatigiinnerannilu peqataanissaminut suliffeqarfinnilu taakkunani sulisunik atassuteqalernissaminut periarfissaqalerpoq, taakkulu suliffeqarfiup nunarsuarmi anguniakkat tunngavigalugit pilersaarusiukkamik anguniagaqarnikkut ingerlatsilernissaanut qulakkeerinnittuussapput.

- Tunngaviit pingsut; Inuit-Nunarsuaq-Iluanaaruteqarneq tunngavigalugit 2012-imili aaqqissuulluakkamik CSR-ilerilernitta ineriartortinnissaanut isumassarsillutalu ilisimasaqarnerulissasugut. Piujuartitsineq CSR-ilerinerlu Royal Greenlandip ingerlatsineranut tunngaviulluinnarput, taamaammallu ilimagaarput naammassisaqarsinnaanerup tungaatigut patajaallisaasinnaassalluta.

Suliniummi ukiuni marlunni ingerlanneqartussami peqataasut suliffeqarfinnersuut katerisimaartassapput, aamma attaveqaqatigiinnikkut atassuteqaqatigiinnikkullu siunissami niuernermik ingerlatsinermi tunngavigineqartartussanik piujuartitsineq tunngavigalugu niuernermut najoqqutassanik ineriartortitsisassapput.

- Piujuartitsineq suliassatta ilagaat, nunarsuarmi anguniakkat suliffeqarfinnit tunngaviusumik pilersaarusiornikkullu naapertorneqartussat tunngavigalugit nalitusaalluni periusissanik tapertariissinnaasunik ilaatigulli aamma nutaanik pilersitsinissamut piumasaqaatitaqarsinnaasunik suleqatigiinnikkut pilersitsisoqarsinnaavoq. Tamatumani pinngortitap pisuussutaanik soorlu aalisakkanik qalerualinnillu pitsaanerusumik atuilluarneq aamma sulisunut ilinniagaqartitsinermut akisussaaneq ilaatigut assersuutigineqarsinnaapput, Lisbeth Due Schönemann-Paul oqarpoq.

Suliniummi tunngavik immikkut ittoq ukkatarineqassaaq. Taanna Royal Greenlandimi niuernermik ingerlatsinermi aamma nunarsuarmi anguniakkat tunngavigalugit isumassarsiniarnermi tunngavigineqassaaq.

Suliniut “Ajunngitsuliornermiit niuernermik ingerlatsinermut” apriili 2018-imi aallarnerneqartoq novembari 2019-imi inaarsarneqassaaq. Suliniut Dansk Industrip nittartakkatigut siammarterivigisartagai aqqutigalugit piffissap ingerlanerani aamma nunarsuarmi anguniakkat pillugit ataatsimeersuartitsinerani ukiut tamaasa ingerlanneqartartumi nittarsaanneqarlunilunilu saqqummiunneqartassaaq.

Nunarsuarmi anguniakkat 17-iusut, anguniakkat ilaat 169-iusut takussutissiallu nittartakkami uani alakkarneqarsinnaapput: https://www.verdensmaalene.dk/fakta/verdensmaalene

Uani suleqataasut nappinneranniit takusasaqarsinnaavutit: https://www.danskindustri.dk/di-business/arkiv/nyheder/2018/4/virksomheder-stopper-sult-fra-flasketorvet/