Imarsiortunngorniat pikkorissartinneqarput
Royal Greenlandip nunaqavissunik ilinniarsimasunik amerlanerusunik inuttaqalernissaq anguniarlugu suliniuteqarneranut atatillugu suliffeqarfissuup kilisaataataani qaamiut arfineq marluk qalulerinermik aamma qalut aserfallaatsaaliorneqartarnerat pillugu pikkorissartinneqarput. Qalulerinermik qalunillu aserfallatsaaliuinermi pikkorissarneq ulluni arfinilinni sivisussuseqartoq Thyborønimi Fiskeriskolen suleqatigalugu ingerlanneqarpoq.
Allattoq Inga Egede, ineg@royalgreenland.com- Thyborønimi Fiskeriskolen suleqatigalugu kilisaatini qaamiut arfineq marluk umiarsuup naalagaatut, fiskeskipperitut kiisalu allat aquttutut ilinniagallit pikkorissartinneqarnerat ingerlanneqarpoq, Royal Greenlandimi inuttalerinermi ingerlatsisoq Mika Heilmann oqarpoq.
Qaamiut arfineq marluk Thyborønimi Fiskeriskolemi pikkorissarnerminni ilaatigut teori aamma sulisaaseq misilittarlugu qalut sananeqaatigisaat, sananeqartarnerat kiisalu aserfallatsaaliorneqartarnerat pillugu pikkorissartinneqarput. Ilaatigut aamma pikkorissarnermi allunaasioriaatsit wireinillu katiterisarneq pillugu ilinniartinneqarput.
- Imarsiortunngorniat Royal Greenlandimut attuumassuteqartut pikkorissartinneqarnerat officerinngorniarnerannut atatillugu ingerlaqqinnginnerminni qaamiutut suliassat ilisimaarilluassagaat siunertaavoq, Mika Heilmann oqarpoq.
Alloriarneruvoq
33-inik ukiullip Jens Siagstadip umiarsuup naalagaatut ilinniagaqarnini 2017-imi decemberimi naammassigamiuk Royal Greenlandip kilisaataataani Qaqqatsiami januarimi imarsiortunngorniatut aallartittoq oqarpoq, Thyborønimi Fiskeriskolemi qalulerinermik pikkorissareerami suliffittaamini suliassanut ilisimasaqalerluni.
- Pikkorissarneq pissarsinartorujussuuvoq. Naammagisimaarnarpoq maanna naqqaniit qalulerineq taamatuttaaq qalut qanoq aserfallatsaaliorneqarsinnaanersut ilisimasaqarfigilerakku, Jens Siegstad, Royal Greenlandimi imarsiortunngorniarnermini siunissami aquttutut kingornalu umiarsuup nalaagaatut suliffeqalernerminik nassataqarumaarneranik neriuuteqartoq oqarpoq.
- Qalulerinermut ilisimasaqanngikkaliuarpunga, kilisaammili imarsiortunngorniaraanni qalulerinermik ilisimasaqarnissaq pisariaqarpoq. Kingusinnerusukkut kilisaammi aquttutut immaqalu kingorna umiarsuup naalagaatut ingerlaqqissinnaajumaarnera kissaatigigakku maanna qalulerinermut aamma qalunik aserfalatsaaliuineq pillugu allagartaqalernera anguniakkama anguniarnerani alloriarneruvoq, Jens Siegstad oqarpoq.
Royal Greenlandimi imarsiortunngorniat iluaqutigisassaannik inuttalerinermi immikkoortortaqarfik siunissami pikkorissarnernik assingusinik aaqqissuussisarniarpoq.
- Royal Greenlandimi siunissami imarsiortutut sulisussavut pitsaasumik ineriartortinneqarnissaat angujumallugu sakkussaannik pitsaasunik tuniorarusuppavut, Mika Heilmann oqarpoq.
Allaaserisap ataani imarsiortunngorniat pikkorssarneranni assiliasat takuneqarsinnaapput.
