Ooqattaagassiat orniguttunit ajasoorutigineqarput
- Mamarluinnarput. Nunatsinni tunisassiat allatut sassaalliutigineqarnerat isumassarsiatsialaavoq. Panimma inuuiani kaffilleruma ilaquttannut ikinngutinnullu sassaalliutigissavakka. Taakuninnga nerisassiornermut ilitsersuutit sumi pissarsiarisinnaavakka?
Allattoq Inga Egede, ineg@royalgreenland.comQeqqata Kommuniani pisortaaneq Paneeraq Olsen Royal Greenlandimi sulisut plastikkimik sullortuumillu niutsiveeralianut issorarlugit ooqattaagassiaannik tassa saarullinnik issimi panertitanik miserartuummik chililimmik akusanik aamma raajanik mayonnaisemik persillenillu miserartuutiliamik akusanik ooqattaarererami taama oqarpoq. Canapéliaralugit ooqattaagassiat aalisarneq inuussutissarsiornerlu pillugit saqqummersitsinerup Polar Fish 2018-imik taallugu Sisimiut timersortarfiani sapaatip-akunnerata naanerani kingullermi ingerlanneqarnerani orniguttunut 1.800-nit amerlanerusunut Royal Greenlandip tuniniaaviani sassaalliutigineqarput. Taakkulu saqqummerneqaraangamik tassuuguinnaq nungunneqartarmata mamarineqarluinnarput.
Isumassarsiatsialak
Paneeraq Olsen Sisimiut timersortarfianut orniguttorpassuit aamma canapéliaralugit ooqattaagassianik mamarluinnartunik Royal Greenlandip tuniniaaviani sassaalliutigineqartunik ooqattaariartortut ilagaat. Ooqattaagassiallu ajasoorutigai.
- Nunatsinni tunisassiat sassaalliutigineqarnerat isumassarsiatsialaavoq. Illinnarpasinnaratik aamma mamarluinnarput, Paneeraq Olsen oqarpoq nangilluni:
- Miserartuut chililik mamarluinnartuummat orsumut taarsiullugu saarullinnut issimi panertitanut akugitissallugu naleqqulluinnarpoq. Raajat mayonnaisemik persillenillu miserartuutiliamik akusat kuanninillu kissarsuummi sikatsitanik nakkalatsivigisat aamma marmarluinnarput. Nalitsinnut inuusuttullu mamarisaannut naleqqussarlugit sassaalliutigineqarput. Taamaattumik tulliani periarfissaqaleruma tassa paniga qaammatip tulliani nalliuppat taamaattunik sassaalliuteqassaanga. Aamma pisariitsumik sassaalliutigineqarsinnaammata mamaqimmatalu isertuvut namminneq qaaqqusigunik assingusunik sassaalliuteqarnissaannut kajumissaassavakka.
Royal Greenlandip qullersaqarfiata igaffiani ingerlatsisup Sune Bjerrep mayonnaisemik persillenillu miserartuutiliornermut aamma chililimmik miserartuutiliornermut ilitsersuusiai uani takusinnaavatit.
