Tunisassiat mamarluinnartut aggiasoqarluartitsipput
Aalisarneq inuussutissarsiornerlu pillugit saqqummersitsineq Polar Fish 2018-imik taallugu Sisimiut timersortarfiani tallimanngormat septembarip 21-aniit sapaat septembarip 23-at ilanngullugu ingerlanneqarmat Royal Greenlandip tuniniaavia ornigarneqarluarpoq. Inuit 1.814-it saqqummersitsinermut ornigupput, orniguttunilu 1000-nit amerlanerusut Royal Greenlandip saarullinnik issimi panertitanik tunisassiaminik mamarluinnartunik miserartuummik chililimmik akusanik taamatuttaaq raajanik mayonnaisemik persillenillu miserartuutiliamik akusanik kuanninillu kissarsuummi siggilasulianik nakkalatsivigisanik ooqattaariartorput.
Allattoq Inga Egede, ineg@royalgreenland.comRoyal Greenlandip ooqattaagassianik qulaani taaneqartunik ooqattaagassaqartitsinini pissutigalugu tuniniaavia 12-imik normulik ornigarneqarluarpoq, tassanilu taartumi akisuttartunik, ballonginik, matuersaatit nuffisaannik, sukkuaqqanik minnerunngitsumillu nerisassiornermut ilitsersuutinik saqqummersitsinermi najuuttorpassuarnit angerlaanneqarsinnaasunik agguaasoqarpoq.
Tassuuguinnaq nungunneqartarput
- Royal Greenlandip nunatsinni tunisassiai atorlugit ooqattaagassiatsinnik saqqummiigaangatta tassuuguinnaq nungunneqartarput, Royal Greenlandip nunatsinni tunisassianik tuniniaaviani tuniniaasoq Kaassannguaq Zeeb - nunani tamalaani niuerneq aamma niuernermi tuniniaaneq pillugit ilinniakkamik ingerlatsinerminut atatillugu Royal Greenlandimi ilinniartoq Malu Laursen peqatigalugu - nunatsinni tunisassiat atorlugit ooqattaagassianik Polar Fish 2018-ip ulluni pingasuni ingerlanneqarnerani najuuttorpassuarnut sassaalliisoq oqarpoq.
- Royal Greenlandip Polar Fish 2018-imi peqataanera iluatsillluarpoq. Tunisassiavut atorlugit sassaalliutigisavut najuuttorpassuarnit ooqattaarneqarput. Agguaassagut angerlaanneqarsinnaasut Royal Greenlandip ilisarnaaqqutaanik allagartallit aamma alutorineqarluarput, ingammik meeqqanit inuusuttuaqqanillu. Meeqqat angajoqqaaminnit aammalumi aanakkuminnit aatakkuminnillu taakkuninnga tunineqartut aamma amerlapput, Kaassannguaq Zeeb oqarpoq.
Taamatuttaaq Royal Greenlandimi aalisarnermut siunnersortit; Klaus Frederiksen Nuummeersoq aamma Theodor Fleischer Uummannameersoq aalisartorpassuarnik aalisarnermut atortut aningaasaqarnerlu pillugit Royal Greenlandip tuniniaavianut siunnersortikkiartorlutik saaffiginnittunik oqaloqateqarput. Taakkulu soorlu aalisarnermut atortunik aalisartunut saaffiginnittunut innersuussaqarsinnaajumallutik tuniniaavinnut allanut aamma alakkaapput.
Royal Greenlandimi sulisut immersugassamik apeqqutinik Royal Greenlandip tunisassiaanut tunngasunik imalimmik immersuisitsillutik Polar Fish 2018-imi unammisitsipput. Unammisitsinermi peqataasut tunisassiat sorliit tunisaanerpaanersut ilaatigut eqqoriartussaasimavaat aamma nutaanik tunisassiornermut tunngasutigut siunnersuuteqarsinnaasimapput. Orniguttuni 200-t missaat unammisitsinermi peqataapput. Ajugaasut makitsinikkut toqqarneqarput. Taakku tamarmik immikkut raajanik qalipaajakkanik 10 kiilunik aamma raajanik qalipalinnik 5 kiilunik pinnapput.
