Kilisaatit Qaqqatsiaq aamma Sisimiut tunipput

- Kilisaat Sisimiut Islandimut tunivoq, Sisimiut Barentshavemi saarullinniarnera naammassippat inuttassaanut tunniunneqassaaq, juunip aallartinnerani pissasoq ilimanarpoq. Qaqqatsiaq nunani baltikumimeersut ilaannut tunivoq maajlillu aallaqqaataani piginnittumut nutaamut tunniunneqassaaq, taama oqarpoq Royal Greenlandimi kilisaatilerinermut ingerlatsisoq, Andrias Olsen. Taanna aamma oqarpoq Sisimiut Qaqqatsiallu tuninerat Kalaallit Nunaanni kilisaatit nutaanik taarsersorneqarneri kinguaariit nikinnerattut taaneqarsinnaasoq.

- Ukiuni makkunani Kalaallit Nunaanni kilisaatit eqqarsaatigalugit kinguaariit nikinnerattut taaneqarsinnaasoraara, soorlu aamma ukiut 17- it 18-illu matuma siornatigut taama pisoqartoq. 2001-imi 2002-milu Royal Greenland aamma umiarsuaatileqatigiiffiit allat kilisaatinik arfinilinnik arnineq marlunnilluunniit pisiortorput. Tassalu kilisaatinik nutaanik pisiortorneq ukiuni makkunani aamma pivoq.

Kilisaatit tunineqartut marluk ukiunik 27-inik aamma 17-inik pisoqaassuuseqarput.

Nutaaliaapput

Kilisaatilerinermut ingerlatsisup isumaqarpoq Royal Greenlandip kilisaataatai marluk tunineqarnerat piffissami eqqortumi pisoq.

- Kilisaatit pisoqaliartorneri ilutigalugu aserfallatsaaliuinermut aningaasartuutit qaffakkaluttinnartarput. Kilisatit taarserneri kilisaatini inuttanut atugarissaarnerulertitsissaaq, kisianni aamma tunisassiornermi naammaasisaqarsinnaaneq aamma avammut niuerneq eqqarsaatigalu nioqqutissiorneq pitsaanerulissaaq. Assersuutigalugu pisat usingiarnermi aatsaat poortorneqartartut maamma avataani poortorneqartalissapput, kilisaatilerinermut ingerlatsisoq oqarpoq.

Kilisaatit nutaat isumalluarfigineqaqaat.

- Tunisassiornermi naammassissaqarsinnaaneq, tunisassiat pitsassusii minnerunngitsumillu nukimmik atuineq eqqarsaatigalugit kilisaatit nutaat isumalluarfigaavut, Andreas Olsen oqarpoq.

2019-imi majip aallaqqaataani Qaqqatsiaq piginnittumut nutaamut tunniunneqartussaammat, kilisaatip nutaap Avatap oktoberimi novemberimiluunniit aaalisalernissaata tungaanut Royal Greenlandip kilisaataatai ataatsimik ikinnerullutik qaammatini tallimani aalisassapput.

- Qaqqatsiani inuttat ilaat Avatap novemberimi aalisalernissaata tungaanut kilisaatini allani suligallassapput, Andrias Olsen oqarpoq.

Tunisassianik ilisarnaatit eqqarsaatigalugit kilisaatip Sisimiut aqqa Royal Greenlandip pisisartuinit tusaamaneqarluarmat kilisaatip aqqa allanngortinneqassanngilaq. Kilisaat Sisimiut nutaaq aprilip 29-iani Royal Greenlandimut tunniunneqassaaq naatsorsuutigineqarporlu majip allaaqqaataata kinguninngua aalisalerumaartoq.

Sisimiut nutaaq saarullinniassaaq aamma qaleralinniassaaq taamatullu aalisakkat orsuinik tunisassiussalluni. Avataq raajarniarlunilu qaleralinniassaaq.