200.000 koruuninik timersornermut aningaasaliineq
Royal Greenlandimi sulisut ukiumoortumik aningaasaliissutaasartut 200.000 koruuniusut Timersoqatigiiffiit Kattuffiannut tunniuppaat.
Royal Greenland ukiut tamaasa meeqqat atuartitaanerannut, inuusuttut ilinniarnerannut, pikkorinnerpaani aamma timersornermut, sammisassaqartitsinernut tapersersorneqarsinnaasunut soorlu katersuiniarluni bankortitsinernut nunalu tamakkerlugu katersuiniarnernut katillugu aningaasanik 1. millionit sinnerlugit annertussusilinnik aningaasaliisarpoq. Aamma nunarsuarmi sisorarnerit sakkortunersaannut Arctic Circle Racemut kiisalu nunani tamalaani ilasseqatigiinnernut nunatta ilisimaneqarneranik siammarterisunut tunisassianik tunisisarpoq.
Pingasunngorneq 2019-imi decembarip 18-iani ukiumoortumik aningaasaliissutaasartut timersortartunut tunniunneqarput. Royal Greenlandimi sulisut Sara Biilmann Egede, assammik arsarluni nuannut allanut unammisartuni assammik arsartartoq, aamma Malik Juhl, illup iluani arsarluni nunanut allanut unammisartuni arsartartoq kiisalu suliffeqarfitsinni inuummarissaasut Mika Heilmann aamma Maannguaq Birch checki 200.000 koruuninik imalik Timersoqatigiit kattuffianni siulittaasup tullianut Finn Meinelimut tunniuppaat.
- Royal Greenlandip ukiumoortumik aningaasaliissutai tigusinnaagakkit nuannaarutigaara. Aningaasat 200.000 koruuniusut timersornermut atorneqassagamik timersortartunit iluaqutigineqassapput, Finn Meinel tunniussinermi taamak oqarpoq.
Royal Greenlandip aamma Timersoqatigiit Kattuffiata ukiuni pingasuni aningaasaliinissamut isumaqatigiissutaat 2019-imi decembarip 31-ani atorunnaassaaq, taamaasillunilu suliffeqarfik katillugu 600.000 koruuninik aningaasaliivoq. Aningaasaliinissamut isumaqatigiissut ukiup nutaap aallartilaarnerani isumaqatigiinninniutigeqqinneqassaaq.
- Nunarsuarmi nunatta 2030-imi timimik atuiffiunerpaalernissaa Timersoqatigiit Kattuffiata anguniagaraa. Anguniagaq angussagaanni inuiaqatigiinnit, matumani aamma suliffeqarfinnit, tapersersorneqartariaqarpoq, taamaammat Royal Greenlandip ukiuni tulliuttuni takorluukkap anguniarnissaanut tunniusimalluni siuttuullunilu tapersersuinini ingerlatiinnassagaa, Finn Meinel naggasiilluni oqarpoq.
Royal Greenlandip ukiorpassuarni tulliuttuni timersornermik, soorlu aamma Elite Sport Greenlandimi timersortartunik pikkorinnerpaanik tapersersuinissani naatsorsuutigaa.
