Kinamiunik sulisoqarneq iluatsilluartoq ingerlaannarpoq
Kinamiut aqqaneq-marluk Royal Greenlandip tunisassiorfianut Uummannamiittumut suliartorlutik tikipput. Sulisut nutaat tunisassiorfimmi Uummannamiittumi Kinamiut 2017-imili sulisut taarsissavaat.
Allattoq Inuuteq Kriegel, inkr@royalgreenland.comSulisut nutaat Uummannamut tikilluaqquneqarsimasut suliniummi aqutsisoq oqalutsilu Xiaoqing Cheng, oqarpoq.
- Sulisut nutaat uummannarmiunit qanilaartumik inussiarnersumillu tikilluaqquneqarput – aalisakkanillu tunisassiornermi ulapaarfiummat sulillutik aallartilluareerput, Xiaoqing Cheng oqarpoq.
- Sulisut nutaat tikilluaqqusaangaarput Uummannamilu tunisassiornermi pinngitsoorneqarsinnaanngillat. Ukiut marluk matuma siornali Kinamiunik suleqateqartalernerput ajunngilluinnartumik misilittagaqarfigaarput, suliffeqarfissuarmi sulisoqarnermut ingerlatsisoq Søren Olsen Damgaard oqarpoq.
Pinngortitaq pinnersoq
Sulisut nutaat Uummannami aqutsisunit maanna suliffimmi ilinniartinneqarlutillu suliassanut ilisaritinneqassapput. Sulisut Kinamiut pingasut ukiuni marlunni kingullerni tunisassiorfimmi sulereersut, maannalu aqutsisutut sulisut, tunisassiorfimmi ulluinnarnilu pisartunut ilitsersuinermut ikiuutaapput.
- Maanngarlutik angalangaatsiarsimanertik pissutigalugu ulloq siulleq qasoqqangaatsiarput, maannali inissilluarsimalerput. Pinngortitap pinnerneranut kiisalu eqqiluinneranut assut alutorsarput, sulisut nutaat suleqqaarnerat pillugu Xiaoqing Cheng oqaluttuarpoq.
Zhu Jiahang, tikerlaanut ilaasoq illunut alutorsarneruvoq.
- Illut Kinami illunit allaanerujussuupput. Illorsuit portusuut qalipaateqanngitsullu sungiusimavagut, kiisalu maanituulli illut ataasiakkaartut Kinami takuneq ajorpavut.
Sulisut tikerlaat silap qaamasarnera aamma alutorsaatigaat, uummannarmiulli qungujulaatigalutik suleqatitaatiminnut ukiukkut taartarnissarsua pillugu ilimasaarereerput.
Sulisunit siullernit misilittakkat
Sulisut Kinameersut siulliit Uummannamut tikinneranniit maanna ukiut marluk qaangiussimalerput, Xiaoqing Chengip tunisassiorfimmi sulisut nutaat tikittut tikilluaqqunissaat ajornannginnerulersimasoq malugisinnaavaa:
- Suleriuseq ilisimasaqarfiginerulernikuuarput, maannalu sukkanerusumik pitsaanerusumillu sullissisinnaalernikuuvugut. Ukiut marluk matuma siorna siullermik misiliilluta suliassagut amerlapput, naqqaniillu ilikkagassat amerlanikooqaat.
- Kinamiut suliartortut siulliit nunaqqatigiinnut akuliulluaqaat, taamaammat sulisut nutaat siulimittulli sullaritsiginissaat neriuutigaara.
Kinamiut sulisut 15-it maanna Uummannami najugaqarput.
Allaaserisap ataani kinamiut Uummannami sulilerlaat assingi takuneqarsinnaapput.
