Mistali tulluusimaarlunilu oqilisimaartoq
Palu Enoksen Fredericia Maskinmesterskolemi ukiut sisamat affarlu ilinniareerluni maanna mistalitut ilinniarsimasunngorpoq.
Allattoq Inuuteq Kriegel, inkr@royalgreenland.comPalu Enoksen, ilinniarnermi nalaani Royal Greenlandip kilisaataataani ilinniartuusimasoq, 2015-imi januaarimi ilinniartunngorpoq 2019-imilu juunip 27-ani allagartartaarluni.
- Ilinniagara naammassigakku oqilisimaarlungalu eqqissiallappunga. Ilinniagaq uanga isumanni sakkortooq maanna naammassigakku tulluusimaarneq misigaara, Palu Enoksen oqaluttuarpoq.
Teori naammassisaqarnerlu
Palu Enokseni ilinniarnermini Royal Greenlandip kilisaataataani Akamalimmi aamma Nataarnami suliffimmik misiliilluni sulisarsimavoq, ilinniarnermilu aallarteqqaarneraniit unammillernartunik nalaataqartarsimalluni.
- Kilisaammi sulianik naammassisaqarnissaq sungiusimallugu iternga tikillugu teoriimik eqqartuisarnerup sungiunnissaa unammillernarpoq, Palu Enoksen, Kilisaammi Nataarnami inaarutaasumik soraarummiissutissaminik piareersarsimasoq, oqarpoq.
Atuarfimminiit ikiorneqarluartoq
Palu Enoksenip atuagarsorneq sakkortugaluartoq Fredericia Maskinmesterskolemiittut ikiuiumatunerat nuannaarutigaa:
- Fredericia Maskinmesterskolep allaffeqarfia ilinniarnerma aallartinneraniit naammassininnera tikillugu ikiuilluaqaaq. Kalaallit Nunaanneersuunera peqqutigalugu inissannik innersuunneqarnera assersuutitut eqqaasinnaavara.
Palu Enoksen maanna Royal Greenlandimi atorfinissaaq, kilisaammilu Nataarnami aqumiutut sulissalluni.
Paasissutissat:
Assi: Nammineq pigisaq
