Royal Greenlandip nuna tamakkerlugu katersuiniarneq tapersersorpaa
Royal Greenlandip sulisuisalu aningaasat 76.000 koruuningajaat Neriuffimmut tunissutigaat.
Neriuffiup kræftimik napparsimalersimasunut nuna tamakkerlugu katersuiniarnerani tallimanngornermi unnukkut pisumi Inga Dora Markussenip, suliffeqarfissuarmi attaveqatigiinnermut ingerlatsisup Royal Greenland A/S-ip tapiissuteqartarnermut ataatsimiititaliaa sinnerlugu aningaasat 25.000 koruuniusut tunniuppai. Taakkuinnaanngillalli. Kristian Thorsteinsen, tunisassiorfimmi Nuummiittumi aalisakkerisoq Royal Greenlandimi sulisut tunisassiorfimmiittut, kilisaatiniittut qullersaqarfimmiittullu sinnerlugit checkimik aamma tunniussaqarpoq. Sulisut Neriuffiup nuna tamakkerlugu katersuiniarneranut tunngatillugu aningaasanik katillugu 50.966 koruuninik annertussusilinnik katersisimapput. Royal Greenland sulisuilu taamaalillutik aningaasanik katillugu 76.000 koruuningajannik tunniussipput.
Attaveqarnermut sulisoqarnermullu pisortap Jens K. Lyberthip kiisalu Royal Greenlandimi sulisoqarnermut immikkoortortap sulisut katersisimanerat nuannaarutigaat.
- Royal Greenlandip sulisuisa nuna tamakkerlugu katersuiniarnermut tunisinissaminnik katersinerat ajunngisaarneruvoq kusanarluinnartoq. Aningaasarpassuarnik katersisinnaasimapput. Nuannerluinnarpoq, Jens K. Lyberth nuannaarluni oqarpoq, nangipporlu.
- Aningaasat katersorneqartut kræftimik napparsimalersimasunut ilaqutaannullu atorneqartussaammata sulisut tunissutaat 51.000 koruuniusut tapiissuteqartarnermullu ataatsimiititaliap tunissutaat 25.000 koruunisut tunniussinnaagatsigit nuannaarutigaarput. Napparsimalersimasoq katsorsartikkiartoraangami amerlanertigut ilaquttani najukkanilu ujariatseqqaqaluni qimattariaqartarpai. Piffissami ilungersunartumi ilaqutariit ataasimoortilernissaannut aningaasat atorneqartussaassut nalunagu tapersersorusunnarluinnarpoq, Jens K. Lyberth oqarpoq.
Royal Greenlandimi katersineq aningaasarsianit ilanngaatsinnikkut pivoq, sulisorlu tunisiniaruni aningaasarsiaminit aningaasat ilanngaatigineqartussat nammineq aalajangertarpai. Royal Greenlandip akissarsialerinermut immikkoortortaani AU-mik ilinniartoq Pilunguak Gundel Thorleifsen suliffeqarfimmi katersinermi tunissuteqarumasunut ilaavoq.
- Sulisut ataatsimoorluta Neriuffiup katersuiniarneranut aningaasanik taamak annertutigisunik tunniussisinnaanerput nuannaarutigaara. Ikiuiumatunerput sakimmisaarutigaara. Panima aanaava kræftimik napparsimalluni peerunnikuummat aammali kræftimik napparsimasut piffissami ilungersunartumi ajunnginnerusunik atugaqarnissaat pingaaruteqartoq isumaqarama aningaasanik tunisiumallunga aalajangerpunga, Pilunguak Gundel Thorleifsen oqarpoq, nangipporlu:
- Royal Greenlandimi sulisuusugut Neriuffiup katersuiniarneranut tuniserusunnitta inuiaqatigiinni akisussaassuseqarnerput ersersikkaa isumaqarpunga.
Royal Greenlandip tapiisarnermut maleruagassiaa 2019-imut atuuttoq naapertorlugu meeqqat inuussuttullu atuarnerat ilinniarnerallu efterskolernissamut imaluunniit oqaatsinik ilinniariarnissamut, ilinnialerniartut Ivalo aamma Miniup aningaasaateqarfia aqqutigalugu, timersortartut Elite Sport Greenland aqqutigalugu, Arctic Circle Race-imut timersornermilu pisartunut allarpassuarnut tapiisoqartarpoq.
