Uummannami tulaassuisoqaqqissinnaalerpoq
Royal Greenlandip tunisassiorfia Uummannamiittoq ullumi marlunngornermi oktobarip aallaqqaataani 2019 aalisartut pisaannik tigooraanissaminut ammaasseqqippoq. Qalerallit tulaassorneqartut kilisaat Sermilik atorlugu Royal Greenlandip tunisassiorfianut Qasigiannguaniittumut Ilulissaniittumullu assartorneqassapput.
Allattoq Inga Egede, ineg@royalgreenland.com- Kilisaatip Sermiliup sisamanngornermi Uummannamut apuunnissaa naatsorsuutigigatsigu tulaassuisinnaaneq ullumi marlunngornermi nalunaaqutaq aqqaninngorluinnartoq ammarparput, Royal Greenlandip tunisassiorfiani Uummannamiittumi ingerlatsisoq Kirsten Ajaaja Worm oqarpoq.
Tunisassiorfilli Uummannamiittoq tunissassiussanngilaq, tassami Uummannami imeq suli mingoqarpoq.
- Piffissami tulliuttumi ullaakkut arfineq-marluniit unnukkut arfineq-pingasut tungaannut pisanik tigooqqaassaagut. Sulisut arfineq-marluk paarlakaallutik pisanik tulaatanik tunisassiorfinnut Qeqertarsuup Tunuaniittunukaatassanik suliaqassapput, Kirsten Ajaaja Worm oqarpoq.
Aaqqissuussipput
Pisat tulaanneqartut Qasigiannguanut Ilulissanullu assartorneqannginnerminni sikulerlugit kaarinut iliorarlugit tunisassiorfimmi Uummannamiittumi nillataartinneqassasut tunisassiorfiup ingerlatsisuata ilisimatitsissutigaa.
- Aalisartut ataasiakkaat pisaminnik annikitsunik tulaassuisalereerput. Aalisartulli amerlanerit tulaassuinissamut ammaassinerput peqqutigalugu aatsaat aalisarnissaminnut piareersaleruttorput. Aalisartut ulluni tulliuttuni pisanik annertunerusunik tulaassuilernissaat naatsorsuutigaarput, tunisassiorfimmi ingerlatsisoq oqarpoq, nangipporlu:
- Aalisakkat tunisassiorfimmi Qasigiannguaniittumi Ilulissaniittumilu tunisassiarineqarnissaat pillugit aaqqissuussileruttorpugut. Tunisassiassat tunisassiorfimmut apuutsinnatik pisoqaleratarsinnaanissaat aammattaaq sillimaffigaarput, tunisassiorfimmi ingerlatsisoq oqarpoq.
Kilisaat Sermilik, pisanik Uummannameersunik Qasigiannguani Ilulissanilu tunisasiorfinnut assartuisussaq, aalisakkanik tonsinik 45-nik useqarsinnaavoq.
