Avataq nunaqarfimmiunit nunatsinnut tikilluaqquneqarpoq

- Nunatta Isua anorersuarmat Ikerasassuakkoorpugut. Ikerasak nunaqarfiup Aappilattup eqqaaniittoq avaqqukkatsigu umiatsiaaqqap malikkaatigut nunamiit qummoroortartoqarpoq. Nuannerlunilu umiarsuarmut nutaamut ilaalluni nunatsinnut tikilluaqqusaasutut misinnarpoq, Avatami umiarsuup naalagaa Tordar Dimon oqaluttuarpoq.

Imarsiullaqqippoq

Avataq Bilbaomi Spaniamiittumi sananeqarfimminiit angalareerluni ullaaq manna Nuummut tulappoq. Umiarsuaq 2019-imi decembarip 16-iani Bilbaomiit Savalimmiuliarluni avalappoq, Savalimmiunullu decembarip 21-ani tulammat inuttat tassani juullisiorput. Avataq Savalimmiuniit Nuummukassalluni decembarip 28-ani avalaqqippoq.

-Umiarsuaq imarsiullaqqippoq, allaat silarluttumi Bilbaomiit Irske Havikkoorluni Savalimmiuliarami, kingornalu sekundimut meterit 30-niit 35-nut anorersuartumi Islandip kujataatigut Kalaallit Nunaannukarami, Tordar Dimon oqaluttuarpoq.

Aalisarneq siulleq

Avataq, aqagu januaarip sisamaani 2020 raajarnialeqqaartussaq aalisaqqaarnermini 30-nik inuttaqassaaq.

- Aalisarnermi siullermi umiarsuarmi atortut misilittarneqassammata inuttarpaaluit teknikeriussapput. Umiarsuup atortui misilittarneqareerpata umiarsuarlu sivisunerusumik avalaqqasinnaalerpat 25-nik aalajangersimasunik inuttaqassaanga, Tordar Dimon oqarpoq, nangipporlu:

- Aalisalernissatsinnut umiarsuullu teknikkikkut atortuinik nutaaliaasunik misilittaanissatsinnut qilanaaqaagut, Tordar Dimon oqarpoq.

Avataq, 82,3 meterinik takissuseqarlunilu 18 meterinik silissuseqartoq nunatsinnilu aalisariutini anginersaasoq 2020-mi Unnuk Kultoorisiorfimmi atertaartinneqassaaq. Atertaartitsineq Nuummi umiarsualivittaami januaarip 18-iani nalunaaqutaq ataatsimut pissaaq. Nuummi innuttaasut 2020-mi Unnuk Kultoorisiorfimmi nalunaaqutaq 15:00-imiit 19:00-imut Avatamut takornariarsinnaassapput.

Ullaaq Avatap Nuummut tulannerani assit allaaserisap ataani takuneqarsinnaapput.