Nuummi aalisariut nutaaq
Aalisartup Nuummiup, Anthon Egedep, aalisariutitaava nutaarluinnaq ”Mille Kuka” 2020-mi ataasinngorneq juunip 29-ani Nuummut tulappoq. ”Mille Kuka”, Nuummut tulanniariarluni atertaartinneqartoq, 44,10 bruttoregistertonsinik initussuseqarpoq. Aalisariut Rødbymiit Danmarkimiittumiit, sananeqarfimminiit, Nuummukarluni 2020-mi juunip 14-iani avalappoq.
Allattoq Inga Egede, ineg@royalgreenland.com- Aalisariummut nutaarsuarmut piginnittuunera, taamaalillungalu aalisariutinut marlunnut piginnittuulernera soorunami tulluusimaarutigalugulu nuannaarutigaara. Aqqanilinnik inuttaqarsinnaalernera aammattaaq nuannaarutigaara, Anthon Egede, 64-inik ukioqartoq aalisariummillu ”Sori”-mik aamma piginnittuusoq oqarpoq.
Ukiut pingasut piviusunngortinniarsaraa
”Mille Kuka” Bredgård Boatsimi Rødbymiittumi sananeqarpoq. Saarullinniutigineqassaq, aalisariulli aamma saattuarniarsinnaanissamut periarfissaqarpoq. Aalisariut glasfiberimik sanaajusoq 14,99 meterinik takissuseqarlunilu 6,67 meterinik silissuseqarpoq. ”Mille Kuka” 44,10 bruttoregistertonsinik initussuseqarlunilu 58 kubikmeterinik useqarfeqarpoq. Useqarfia aamma qerisunut useqarfittaqarpoq. Aalisariut arfinilinnik inuttaqartussaq piginnittoq Anthon Egedep aalisariutini aapperniarlugu aalajangermalli ukiut pingasut ingerlanerini piviusunngortinneqarpoq.
- ”Mille Kuka” ukiut pingasut pisaariniarsaraara, ukiullu siulii aningaasaqarnikkut unammillernarsimasut nassuertariaqarpunga, Anthon Egede oqarpoq, nangipporlu:
- ESU-mut aningaasaliisussanullu allanut tapertinnissamut qinnuteqannginninni pisortanut allanullu akiitsueruteqqaartariaqarsimavunga. Taamaammat ESU-mit tapertinnissanut Royal Greenlandimiillu aningaasanik taarsigassarsinissannut qinnuteqannginninni akiitsuerunniarlunga suliniuteqarpunga. Qinnuteqaatikka tamaasa iluatsikkakkit aalisariut amutsivimmi Bredgård Boatsimi Rødbymiittumi ukiup ataatsip ingerlanerani sananeqarpoq. Taamaammat aalisariutitaannik nutaarsuarmik aalisalernissara angusarujussuuvoq.
Anthon Egede ”Mille Kuka”-milu inuttat tallimat ulluni tulliuttuni aalisariummik kangerlummi bundgarnersorluni aalisalernissamut piareersassapput.
- Aalisariutaatima aappaa ”Sori” qalipattussaagami qaqinneqarallartussaavoq, taamaammat ”Mille Kuka” atorlugu saarullinniarnerput nangissavarput. Aalisariut nutaaq ilinniaqqaassavarput, taamaammat aasaq manna pissanganarpoq, aalisariutaatilik Anthon Egede, aalisariutiminut ernuttaminik nukarlermik Mille Kukamik atsiussisimasoq oqarpoq.
Paasissutissat:
Assiliisoq: Inuuteq Kriegel
