Royal Greenland uumisaarisarneq pillugu politikkinik nutartikkanik saqqummersitsivoq
Royal Greenlandip sulisut tamarmik pitsaanerpaamik suliffimmi avatangiiseqarnissaat qulakkeerniarlugu uumisaarineq kinguaassiutinullu tunngasumik inukkutilliineq qanoq paasineqassanersut ersarissarniarlugu maleruagassanik saqqummersitsivoq. Maleruagassat sammisat inunnut ataasiakkaanut tunngassuteqartut suliffeqarfiup sulliviini qanoq atorneqarnissaannut tunngapput. Royal Greenlandip uumisaarinermut kinguaassiutinullu tunngasumik inukkutilliinermut politikkii nutartikkat, maanna immikkut nassuiaatitalerlugit, ilitsersuutitalerlugit, maleruagassartalerlugit periusissartalerlugillu saqqummersinneqartut, taamatut nalaataqartoqassagaluarpat malinneqassapput.
Allattoq Inga Egede, ineg@royalgreenland.com-Uumisaarisarnermut politikkimik kinguaassiutinut tunngasumik inukkutilliinermut immikkut nassuiaatitaqarnanilu perisusissaqanngitsumik peqareerpugut. Uumisaarisarneq kinguaassiutinullu tunngasumik inukkutilliisarneq pillugit immikkut nassuiaatitaqarlutillu, ilitsersuutitaqarlutillu periusissatut pilersaarutitalinnik maanna sanasimalerpugut, Royal Greenlandimi Suliffeqarfissuarmi sulisoqarnermut ingerlatsisoq Christian Laursen oqarpoq, nangipporlu:
- Ukioq kingulleq ataaseq affarlu Suliffeqarfimmik Naliliinernik, aamma danskisut APV-nik taaneqartartunik, arlalinnik ingerlatsinikuugatta sulisut ilaasa kinguaassiutinut tunngasumik inukkutilliinermik nalaataqartarnerat paasivarput. Taamaammat uumisaarisarneq kinguaassiutinullu tunngasumik inukkutilliisarneq pillugit politikkigut sulisup kialluunniit ersarissumik paasisinnaaniassammatigit kinguaassiutinut tunngasumik inukkutilliinerup uumisaarisarnermit immikkoortillugu ukkatarinissaa pingaaruteqartoq nalilerparput.
Inunnut ataasiakkaanut tunngavoq
Royal Greenlandimi uumisaarisarneq pillugu politikki Royal Greenlandip intranetiani Ruujaaleeqqami atuarneqarsinnaavoq. Tassani uumisaarinerup kinguaassiutinullu tunngasumik inukkutilliinerup ilisarnaatai immikkut nassuiarneqarput. Aammattaaq suliffeqarfimmi uumisaarisoqarsimaneranik kinguaassiutinulluunniit tunngasumik inukkutilliisoqarsimaneranik naammagittaalliortoqartillugu pisumut attuumassuteqarsinnaasut qanoq periuseqassanersut/periuseqarsinnaanersut qanorlu iliuuseqassanersut/iliuuseqarsinnaanersut itisilerlugu nassuiarneqarpoq.
- Mittatilliinerit tamarmik inunnut ataasiakkaanut tunngassuteqarput. Sulisulli mittatilliinermik qanoq ittunilluunniit misigisaqartillugit iliuuseqartoqartarnissaa pingaaruteqarpoq. Taamaammat suliffimmi uumisaarisoqartillugu kinguaassiutinulluunniit tunngasumik inukkutilliisoqartillugu kina iliuuseqassanersoq qanorlu iliuuseqartoqassanersoq ilitsersuusiorpugut. Mittatilliineq pillugu naammagittaalliortoqaraangat nalinginnaasumik suliffimmi aqutsisoqatigiit iliuuseqartartussaapput. Sulisulli saaffiginninnissaminnut ajornartorsiorpata inunnulluunniit ataasiakkaanut tunngasut pillugit suliffimmi aqutsisunik akuliuttoqarnissaa kissaatiginngikkunikku Sulisoqarnermi Immikkoortortamut Royal Greenlandimiluunniit suliffimmi avatangiisit pillugit sinniisumut toqqaannartumik saaffiginnissinnaanissartik periarfissaraat. Pisut pineqartut pillugit taakku ilisimasaqarluarput, Christian Laursen oqarpoq.
-Sooq massakkorpiaq assersuutigalugu kinguaassiutinut tunngasumik inukkutilliineq akiorniarlugu ilitsersuutinik periusissatullu pilersaarutinik saqqummersitsivisi?
- Kinguaassiutit pillugit inukkutilliineq pillugu naammagittaalliutit arlaqartut tunngavigalugit ukioq kingulleq affarlu eqqartuisarpugut. Taakku qajassuunneqartussaapput, ingammik aqqusaagaqartunut. Taakkuuppummi siullertut sullitassagut. Kinguaassiutinut tunngasumik inukkutilliineq pillugu naammagittaalliuutit qajassuartumik suliassaapput, kinguaassiutinummi tunngasumik inukkutilliineq aqqusaagaqartumiit inukkutilliisumiillu assigiinngitsumik paasineqarsinnaammat pisoq inukkutilliisumut aamma ajornakusoorsinnaavoq. Taamaammat pisoq suliarissallugu ajornakusoortuuvoq. Ajoraluartumillu suliffeqarfitsinni ukiumi kingullermi tamanna misigineqartarsimavoq, Christian Laursen oqarpoq, nangipporlu:
- Kinguaassiutinut tunngasumik inukkutilliineq pillugu periusissanik ersarinnerusunik amigaateqarluta paasivarput, tamannalu peqqutigalugu ummisaarisarneq pillugu politikkitsinni uumisaarisarneq kinguaassiutinullu tunngasumik inukkutilliisarneq pillugit immikkut nassuiaatiliorpugut.
-Uumisaarisarneq pillugu politikkisi atorlugit suna angorusuppisiuk?
- Suliffeqarfitsinni uumisaarisarneq kinguaassiutinullu tunngasumik inukkutilliisarneq qanoq isumaqartinnerlugit maleruagassaqarnerput ersarissumik nalunaarutigiumavarput. Aammattaaq suliffeqarfimmi uumisaarisoqarsimappat kinguaassiutinullu tunngasumik inukkutilliisoqarsimappat naammagittaalliuutit qanoq suliarineqartarnersut qanorlu kinguneqartinneqartarnersut sulisutsinnut ersarissarumavagut.
Uumisaarisarneq kinguaassiutinullu tunngasumik inukkutilliisarneq pillugit Royal Greenlandip politikkii Royal Greenlandimi sulisunut tamanut qanoq siammarterneqassappat?
- Uumisaarisarneq kinguaassiutinullu tunngasumik inukkutilliisarneq pillugit politikkit nutartikkat intranetsitsinni Ruujaaleeqqami saqqummersinneqarnikuupput, taamatuttaaq Royal Greenlandimi aqutsisut tamarmik uumisaarisarneq kinguaassiutinullu tunngasumik inukkutilliisarneq pillugit saqqummersitat nutaat mailikkut tigunikuuaat. Tunisassiorfinni ingerlatsisut tunitsivinnilu aqutsisut tunisassiorfinni tunitsivinnilu ataatsimeeqatigiinnerni mittatilliineq kinguaassiutinullu tunngasumik inukkutilliineq pillugit sulisuminnik eqqartueqateqartarnissaat aamma neriuutigaarput.
Suliffimmi siorasaarineq nakuusernerlu pillugit politikki nutartigaq aamma Royal Greenlandip Sulisoqarnermi Immikkoortortaanit suliarineqaleruttorpoq,
- Suliffimmi siorasaarineq nakuusernerlu pillugit politikkit aamma nutartileruttorpagut, siorasaarineq nakuusernerlu aamma immikkut maleruagassalerlugit suliarineqarput, Christian Laursen oqarpoq.
Royal Greenlandimi uumisaarisarneq kinguaassiutinullu tunngasumik inukkutilliisarneq pillugit politikkit saqqummersitat nutartikkat uani atuarneqarsinnaapput:
