Nuummi Qeqqata Ilinniarnertuunngorniarfiani Royal Greenland sammisaralugu

Sapaatip akunnera manna ataasinngornermiit pingasunngornermut Nuummi Ilinniarnertuunngorniarfimmi inuussutissarsiorneq sammineqarpoq. Tassunga atatillugu Ilinniarnertuunngorniarfimmi atuartut 30-t sammisaq ”Royal Greenland” toqqarpaat, tamatumalu takutippaa suliffeqarfitsinnik soqutiginninneq annertoqisoq. Atuartut allat sammisat allat soorlu aallartisaaneq aamma niuernermi suliaqarneq toqqarpaat.

Ilinniartitsisup, Thomas Moth-Poulsenip sammisamik ingerlatsisup Qullersaqarfik saaffigaa ilinniartunik pulaartitsinissaq pillugu, kisianni Coronamik pissutsit peqqutigalugit pulaartoqarnissaq itigartitsissutigisariaqarparput. Taarsiullugu ilinniartitsissutissamik pilersaarusiornissamik neqerooruteqarpugut, tassanilu atuartut suliffeqarfik pillugu paasissutissilluarneqarput. Ataasinngornermi ulloq 14.septembari ilinniartut paasiniaaqquneqarput tamatumunngalu 2019-imut ukiumoortumik nalunaarusiaq misissorpaat arlalinnillu tamalaanut tunngasunik filmertinneqarlutik, ilanngullugu ”Mighty Ships-inik aallakaatitassiaq” Akamalik pillugu Discovery Channel-imi takutinneqartoq takutinneqarluni.

Ilisimasaqarlualerneq

Marlunngornikkut Qeqqani Ilinniarnertuunngorniarfiliarluta sammisassatut Royal Greenland ilinniartunut ilisaritikkiartorniarlugu neqeroorutigaarput. Suleqatitsialannik suleqateqarallartilluta piffissaq sivikitsunnguaq atorlugu suleqatigiit suliffeqarfik pillugu atuartunik ilisimasaqarlualersitsipput. 

Saqqummiussisoq siulleq tassaavoq pisortaaneq Mikael Thinghuus nalillit uiguleriiaat, periusissiaq,  Royal Greenlandip nunap aningaasaqarneranut pingaaruteqarnera pillugit oqaluttuarpoq, naggataatigullu kisianni minnerunngitsumik silarsuarmi niuffaffinnut atuartut angalaaruppai.   

Mikaelip ilisarititsinerata kingorna kilisaateqarfik tullinnguuppoq. Suleqatigiit tassanngaanneersut tassaapput Andrias Olsen, Mika Heilmann, Agathe Thorleifsen, Johan Erni Berthelsen, aamma AU-mi ilinniartoq Brian Kleist. Tassani Andrias ilaatigut sinerissamut qanittumi avataasiorlunilu  aalisarneq aamma pisassiissutit pillugit oqaluttuarpoq, aamma Agathe Thorleifsenip ingerlatsinermi ataqatigiissaarisutut atorfimminut aqqutini oqaluttuaraa, taavalu Mika Heilmann kilisaammi qanoq sulilersinaanermik oqaluttuarpoq.

Nikoline Ziemer, Business Development Manager (Tunisassiassanik Inerisaavimmi Aqutsisoq) inerisaaneq pillugu suliniutit ingerlatani assigiinngitsut pillugit oqaluttuarpoq, pingaartumik qeqqussat ukkatarinerullugit. 

Tunisassialerinermut immikkoortortamiit Tunisassialernermi ingerlatsisoq Sten Sørensen aamma Pitsaassusilerinermut immikkoortortaqarfimmi suleqatigiinnik aqutsisoq Nauja Heiselberg takkupput. Nunami tunitsiviit tunissassiorfiutigisut pillugit oqaluttuarput aamma nerisassat tungaasigut pitsaassusissaq ajunngitsoq anguniaraanni sooq isumannaannissaq pingaaruteqarnersoq eqqartorpaat, kingornatigullu Sten Saarullik-nutaamik suliniuteqarneq pillugu itisilerivoq.  

Qullersaqarfik ilaatitaqarluarpoq

Ullo’qeqqasioreernerup kingornatigut suleqatigiit Qullersaqarfimmeersut Royal Greenlandimi sulinertik pillugu oqaluttuariartorlutik takkupput.

Assartugalerinermi aqutsisoq Ane Lynge tunisassiat kilisaatinit aamma tunisassiorfinnit silarsuarmi niuffaffinnut aqqutaannik oqaluttuarpoq aamma suliffeqarfimmi ukiuni 30-ni qaammatinilu 11-ni sulisimanerminik oqaluttuarluni. Anep kingornatigut Naatsorsuuserivimmi suleqatigiinnik aqutsisoq  Rasmus Olsen takkulluni Controlling-imi (Nakkutillivimmi) suna suliarisarnerlugu namminerlu inuussutissarsiornermi aningaasaqarneq pillugu ilinniagaqarnermigut Royal Greenlandimi atorfeqalernini pillugit oqaluttuarpoq. Key Account Manager Assistant, Malu Laursen, Nunatsinni Tunisassianik Tuniniaavimmi sulinini pillugu oqaluttuarpoq, aamma suliffeqarfimmi iliniartutut misiliilluni sulinini (praktikernini) pillugu oqaluttuarluni, ilaatigullu Svenstrupimiissimanini Japanimilu tuniniaanermi allaffeqarfimmiissimanini pillugit. Suliffeqarfissuarmi Attaveqatigiinnermi Ingerlatsisoq Inga Dora G. Markussen Attaveqatigiinnermi Immikkoortortap atuuffia pillugu oqaluttuarpoq, aamma ilinniartitaanermut siunnersorti Ungaaq Abelsen aaqqissuussaq ulapaarfioqisoq naggaserlugu Royal Greenlandikkut ilinniarnermik qanoq ingerlataqarsinnaaneq nassuiarpaa. Kingornatigut Royal Greenland pillugu atuartut internetsikkut ilisimasaminnik nalorsitsaarneqarput. Tassani Royal Greenlandip sushinik poortugaliai pilerigineqaqisut akissarsiassaapput, pissanganartumillu nalorsitsaarereernerup naanerani Miki ”Oxlong” poortukkanik pingasunik akissarsivoq, taavalu Jørgen aamma ”ilaaa” tamarmik poortukkamik ataatsimik akissarsitinneqarlutik.

Ullut sammisaqarfiit pingajuanni pingasunngorneq ulloq 17.septembari atuartut naggasiillutik suliaqartinneqarput Royal Greenland pillugu ilikkakkaminnik takutitsisumik.

Royal Greenlandimi suleqataasut marlunngornermi sammisaqarnermi peqataanerat pillugu filmi naatsoq takusinnaavat: