Royal Greenlandip aningaasanik isaatitsinera Covid-19-imit sunnerneqartoq
2020-p ukiup qiteqqunnerani ingerlatsinermi angusat takutippaat 16 mio. DKK-nik amigartooruteqartoq 2019-imi ingerlatsinermi sinneqartoorutinut 87 mio. koruuniusunut sanilliullugu. Annikinnerusumik isertitaqarneq tunngaveqarpoq Covid-19-ip niuffaffinnik sunniineranik aammalu kinguppannut (raajanut) uutanut qalipaajakkanullu niuffaffiup tatineqarneranik.
Suliffeqarfittut taamaallaat nunat assigiingitsut akornini niuffaffinni tuniniaasutut inissisimanermi suliffeqarfiullu tunisaasa affaat sinnerlugit nerisassanut sullissinernut nerisassanik suliffeqarfinnut allanut suliareqqitassatullu tunisaqartutut Royal Greenlandip angusai Covid-19-imit sunnerneqarput. Angusat nalinginnaasut kilisaatinik tunisinnginnermi ukiup qiteqqunneranut siorna 87 mio. DKK-nit ukioq manna (16) mio. DKK-nut annikilleriarsimapput.
2019-imi ukiup qiteqqunnerani sinneqartoorutit 141 mio. DKK-upput kilisaatit Sisimiut aamma Qaqqatsiap tunineqarnerini, ukiorli manna immap ikerinnaasiortunik aalisariutip tuninerani amigartoorutit 15 mio. DKK-ullutik. Tunisinerit taakku ilanngullugit akileraarutit akilersinnagit angusat 228 mio. DKK-niit (31) mio. DKK-nut appariarsimapput.
Covid-19 niuffaffiillu
Kaaviaartitat siornamut naleqqiullugu 9 %-imik appariarsimapput. Nerisassanik sullissisunut tunisassiorfinnullu attuumasunut tunisineq ukiup qaammataani siullerni sakkortuumik eqqorneqarsimagaluarluni niuffaffimmik ammaassiartuaarnerup siorna tunisinerup annertussusaa qanilliartortippaa.
Qaammatini kingullerni inuiaqatigiinnik tamalaanik ammaassiartuaarneq Canadallu issittortaani saattuarniarnerup aallartinnera isertitat malunnarluartumik pitsaanerulernerannik kinguneqarpoq.
Ataatsimut isigalugu Covid-19-ip pisariaqartilersimavaa ulluinnarni niuernermi eqaatsumik naleqqussarsinnaasumillu periaaseqarnissaq, suleqataasut isumannaannissaat suliffeqarfiillu ilusilerneri kisiisa pinnagit, kisianni aamma tuniniaanerup ingerlannerani. Taamaalilluni internetsikkut niuernermi suliniuteqarneq niuffaffinnilu assigiinngitsuni suliniuteqarneq annertunerupallalersimavoq, pingaartumik Kinami aamma Japanimi. Kinamiittumik Beiyang Jiamei Seafood-imik suleqatigiinnissamik 2019-ip naalernerani isumaqatigiissutip naleqarnini takutereerpaa.
Covid-19-ip annertunerpaaffiani kinguppannut (raajanut) uutanut qalipaajakkanullu niuffaffik tatineqarpoq, pingaartumik kinguppaat (raajat) angisuut eqqarsaatigalugit. Niuffaffik 2019-ip qiteqqunnerata kingorna amerlavallaartunik nioqqutissaqalersimavoq akigititaasut malunnarluartumik apparnerinik kinguneqartumik.
Qaammatini siullerni arfinilinni Royal Greenlandip ilanngaatissat ilanngaatigereerlugit angusai (39) mio. DKK-upput siorna piffissami tassani 141 mio. DKK-usimallutik.
Aningaasaqarnikkut piareersimaneq allanngunngilaq
Tunisineq minnerugaluartoq aalisarneq tunisassiornerlu allanngunngikkaluartut aningaasaatit sulinermut atugassiat allanngunnginnerat iluatsissimavarput, tamannalu nammaginarluinnarpoq.
Akiitsut erniallit 276 mio. DKK-nik qaffariarsimapput siorna taamalineranut naleqqiullugit, tassunga peqqutaavoq kilisaatinik nutaanik marlunnik, tassa Avatamik aamma Nataarnamik, sanatitsineq, Nataarnaq 2021-imi aasakkut tunniunneqassaaq, Avatarlu decembari 2019-mi tunniunneqarluni.
Ingerlatseqatigiiffiup atortorissaarutit immikkut ittut 750 mio. DKK-nik nalillit pilersissimavai, Covid-19-ip pilersissinnaasaanik nalorninartut pakkersimaarniarlugit, taakkuli attorneqarsimanngillat. Tigoriaannakkanik aningaasaatit massakkorpiaq 1,4 mia. DKK-upput.
Nammineq aningaasaatit 1,7 mia. DKK-upput akiliisinnaassuseq 31,4 %-iulluni.
Ingerlatseqatigiiffiup ineriartornissaani ilimagisat
Covid-19-ip aamma kinguppannik(raajanik) uutanik qalipaajakkanillu niuffaffiup ineriatornerata kingunerisaanik ukiuni siuliini ajunngitsumik ineriartornerup nanginnissaa periarfissinneqanngilaq.
Royal Greenlandip sumiiffinni inuiaqatigiinnut sunniutaasut ataqqillugit aalisarnerup tunisassiornerullu ingerlatiinnarneqarnissaat sallinngortippai, suleqataasullu atugarititaasuni ajornakusoortuni pitsassuarmik naammassisaqarsimapput. Neriuutigaarput niuffaffimmi pissutsit sallinngortitsinitta tamatuma attatiinnarnissaanut periarfississagaatigut.
Pingaartuuvoq Asia ingammillu Kinami niuffaffik, Royal Greenlandip annerpaamik tunitsivia ukiup affaata kingulliup ingerlanerani pisarnermisut ilissasoq, tassanilu pingaartuuvoq erseqqissassallugu tunisassiat Kalaallit Nunaanninngaanneermata taamalu Covid-19-qarfiunngitsumeerlutik.
Pisinnaasut assigiinngitsut aamma qanoq iliornerit naleqqussaataasut ataavartumik eqqarsaatigineqarput.
Aningaasaqarnikkut piareersimaneq allanngunngilaq. Ukkatarineqarpoq nunarsuarmi tuniluunnerup kingornatigut nukittornerusimanissaq.
Royal Greenlandip 2020-imi ukiup affaanut nalunaarusiaa uani aajuk.
