Ice Trawl Greenland A/S nalliuttorsiornerminut atuakkamik saqqummersitsivoq
Aalisarnermik ingerlatseqatigiiffik Ice Trawl Greenland A/S 2021-mi ukiuni 30-nngortorsiorpoq. Ingerlatseqatigiiffiup tassunga atatillugu atuakkap ”Ice Trawl Greenland A/S Ukiut 30 år” saqqummersinneratigut nalliuttorsiorneq malunnartippaa. Atuagaq arlalinnit, pingaartumik aalisakkerinermik soqutigisalinnit, nuannarineqassaaq. Ingerlatseqatigiiffimmi siulersuisut siulittaasua atuakkamillu atuakkiortoq, Ove Rosing Olsen, ingerlatseqatigiiffiup atuakkallu pileqqaarnerat pillugu oqaluttuarpoq.
Allattoq Inga Dora G. MarkussenOqaluttuaq ukiut 44-t matuma siorna aallartippoq, tassami Ove Rosing Olsenip ataatanilu Niels Olsenip maanna peerutereersup, aalisartut innuttaasullu peqatigalugit aalisarnermik ingerlatseqatigiiffik Nataarnaq ApS Sisimiuni 1977-mi pilersimmappaat.
- Ingerlatseqatigiiffik Sisimiuni Suliniutitut taaneqartartumit pinngorpoq. Suliniut Angmalortoq Olsenimit Niels Olsenimiillu, Sisimiut imartaani uuliasiorluni qilleriniarnernut akerliulluni puussaarutitut, pilersinneqarpoq – akerleriinnermilu ajugaapput. Immami tassani allatut aningaasarsiornissaq uagutsinnut pingaaruteqarpoq. Aningaasarsiornissarmi naaggaarneqaannarnani iliuusissanik allanik ujartuisoqartariaqarpoq. Ingerlatseqatigiiffik 1980-kkut naanissaasa tungaanut ukiuni qulini ingerlalluarpoq. Nunatsinni aalisarneq ukiuni taakkunani raajat akiisa apparnerisigut, aalisarnerliornikkut pisassiissutillu annikillinerisigut ilungersunarsivoq. Tamatuma kingunerisaanik aalisarnermik ingerlatseqatigiiffiit, soorlu Nataarnaq ApS kingusinnerusukkut A/S-inngortoq, sinerissami ingerlatseqatigiiffiit allat assigalugit akiliisinnaajunnaarnissamik aarlerinartorsiorpoq. Aningaasaliinerit suliffiillu pilersissimasatik annaarusunnagit, Royal Greenland A/S siuttoralugu suliniut aallarnisarneqarpoq. Aalisarnermik ingerlatseqatigiiffiit minnerit arlariillutik pisassiissutitik kattuteriarlugit kattupput taamaalillunilu Ice Trawl Greenland A/S 1991-mi piviusunngorpoq, Ove Rosing Olsen oqaluttuarpoq.
Naak ingerlatseqatigiiffiit marluk pilersinnissaannut aallarniisunut ilaagaluarluni, kingusinnerusukkut pisartunut malinnaavallaanngilaq. Paasisimasai atuakkiornissamut naammanngimmata ataatami toqqortai iluaqutigalugit Ice Trawlip, Nataarnaq A/S-ip RG-illu toqqorsiviini paasisassarsiorluni aallartippoq.
- Ataatama peerutereersup Ice Trawlip pileqqaarneranit ukiuni sisamani siullerni toqqortarisimasai misissuataartillugit atuakkiornissamut isumassarsitippaanga. Naatsorsuutit paasissutissallu tamarmik 1994-ip tungaanut ingerlatsinermut attuumassutillit katersorsimavai. Ingerlatseqatigiiffiup ukiuni 20-ni siullerni inatsisilerituua Kield-Gustav Erichsen siulersuisut ataatsimiittarnerannit ingerlatsinermi pissutsit pisimasullu allat pillugit annertuunik imaqarniliortarsimavoq, soorluttaaq naatsorsuuserisut minnerunngitsumillu naatsorsuuserisup Knud Østergaardip raajarniarnermi aningaasaqarnermik misissoqqissaagai paasissutissatut pinngitsoorneqarsinnaasimanngillat. Royal Greenlandip tuniniaanermut immikkoortortaata oqaluttuarisaanermi tunisatigut paasissutissaatai, oqaluttuarisaanermi tunisat akii atorlugit niuerfimmi pissutsit aningaasallu nalingi pillugit ilisimasaqalerpunga. Ingerlatseqatigiiffiup pilersinneqarnerata oqaluttuassartaa ilisimasaqalernikkut allaaserineqarsinnaanngorpoq, Ove Rosing Olsen nassuiaavoq.
- Atuakkiornissamik isumassarsiaq ukiuni 30-nngortorsiorluni nalliuttorsiornermut atatillugu ingerlatseqatigiiffiup siulersuisuinut saqqummiuppaa. Siulersuisut isumassarsiaq akueraat, sulinerlu 2020-mi upernaakkut aallartissinnaanngorpoq.
Atuagaq immikkoortukkaarpoq, atuartullu nunatsinni aalisarnerup oqaluttuassartaanik, ingerlatseqatigiiffiup pisassiissutitigut umiarsuaqarnikkullu ineriartorneranik, aningaasaqarneranik, ingerlanneqarneranik, inuttat oqaloqatigineqarnerannik siulersuisunilu ilaasortat allattorsimaffiannik paasisaqarsinnaapput.
- Nunatsinni aalisarnerup oqaluttuassartaa annikitsuinnarmik allaaserineqarsimavoq, Tupaarnaq Rosing Olsenilu (ilaatigut uunga atuakkiortuusoq: ”Qaannat alannguanni” – atuagaq Kalaallit Nunaata politikkikkut oqaluttuassartaa nutaajunerusoq, aaqq.) atuakkap immikkoortuanut tassunga allaaserinnikkusussimammat nuannaarutigaara. Aalisarnerup oqaluttuarisaanera qitiusutut inissisimallunilu raajat imaani tunisassiat, avataani aalisarnerup aningaasatigut inuttanullu sunniutai ilanngullugit, nassuiaatigineqarput. Tamarmik nassuiaatigineqaqqissaarput.
Atuagaq 245-nik quppernilik kalaallisut danskisullu allataavoq, ineriartornermik takutitsisunik assitalersugaallunilu ilusilersugaalluarnermigut misissoruminarpoq. Atuagaq kikkunnut naleqqunnersoq pillugu Ove Rosing Olsen ima akissuteqarpoq:
- Aalisarnerup oqaluttuassartaanik soqutigisalinnut tamanut naleqqullunilu ujarlerfissatut atorneqarsinnaavoq. Niuernermik inuiaqatigiilerinermillu ilinniartitsinermi sammisami qulequttatut atussallugu tulluarportaaq, Inuussutissarsiutilerinermut pingaarutilinnik tapersiinikkut aqutsisunut politikkerinullu iluaqutaasinnaavoq. Aalisartunut atuassallugu soqutiginassaaq. Ingerlatseqatigiiffiup Ice Trawl Greenland A/S-ip piuneranut takussutissatut tapersiillunilu ingerlatseqatigiiffimmik nukittorsaaqataassaaq.
Nalliuttorsiornermi atuakkamik saqqummersitsinermi aalisarnermut atugassarititaasunullu paasinninnerulernissaq siunertaavortaaq, taamaalillunilu oqallinnerup ilisimasaqarfiulluarnissaanut tapertaassaaq. Nunatsinni inuussutissarsiutip pingaarnersap ineriartornerata ilisimanissaa pingaaruteqarpoq. Neriuppunga atuakkap atuarneratigut tamanna paasineqarsinnaassasoq, Ove Rosing Olsen naggasiivoq.
Atuagaq tallimanngornermi septembarip pingajuanni saqqummerpoq, Nuummilu atuagaarniarfimmi Atuagkani kiisalu Sisimiut katersugaasiviani tuniniagaavoq.
Paasissutissat:
Atuakkiortoq pillugu naatsumik:
Ove Rosing Olsen ulluinnarni Ice Trawl Greenland A/S-imi siulersuisunut siulittaasuuvoq. Nakorsatut ilinniarsimasuullunilu ukiuni qulikkaani arlalinni Peqqinnissaqarfimmi sulisimallunilu kingullermik Qeqqata Peqqinnissaqarfiani nunap immikkoortuani nakorsaanertut sulisimavoq. Politikkikkut suliaqartarsimallunilu Sisimiuni borgmesteritut qinikkatut sulisimallunilu inatsisartunut ilaasortaasimavoq. Peqqissutsimut Avatangiisinullu 1991-miit 1995-mut naalakkersuisuusimaluunilu kiisalu Inuussutissarsiutinut Suliffissuaqarnermullu 1993-miit 1995-mut naalakkersuisuusimavoq. Politikkimik suliaqarnermini Ice Trawl Greenland A/S-imi siulersuisunit 2002-ip tungaanut tunuaqqavoq. Royal Greenland A/S-imi 1995-miit 1998-mut siulersuisunut ilaasortaavoq. Atuagaq "Ice Trawl Greenland A/S Ukiut 30 år" Ove Rosing Olsenip atuakkiaqqaatigaa.
