Royal Greenland nipisat suaannik tigooraalernissamut piareersimavoq
Aalisartut kattuffiat ataaseq isumaqataanngikkaluartoq Royal Greenland tigooraalernissaminut piareersimalluni Aalisarnermut Piniarnermullu Naalakkersuisoqarfimmut nalunaarpoq.
Allattoq Mathies Hvid ToftRoyal Greenlandip tunitsivii tamarmik nipisat suaannik tunisassiulernissamut piareeqqapput.
Tamanna Lars Nielsenip, Royal Greenlandimi tunisassiornermut pisortap, oqaatigaa.
- Kattuffimmut ataatsimut attaveqarneq ajornakusoorpoq, tunisassiornerulli aallartinnissaa qilanaaraarput, taamatuttaarlu tunisassiorfigut kujataani Narsamiit avannaani Qeqertarsuamut piareersimapput, oqarpoq.
Najukkami aalisartut kattuffiisa aalisarneq aallartissasoq Aalisarnermut Piniarnermullu Naalakkersuisoqarfimmut nalunaarutigippassuk nipisanniarneq aatsaat aallartissinnaavoq.
- Qanittumi aallartinnissaa soorunami neriuutigaarput, Lars Nielsen oqarpoq.
Royal Greenlandip pisassiissutit affaat tigussallugit piareersimavoq
Ukioq manna pisassat amerlanerpaaffissaat, tassa TAC, 1400 tonsiussasoq aalajangerneqarpoq, Royal Greenlandillu 700 tons tigooqqassallugit piareersimavoq.
Tunisassiat niuerfinni nunani tamalaaniittuni tuniniarneqartarput, taakkunanilu tuniniarneqartut piumaneqartullu aalajangiisuusarput.
- Taamaammat akit, annertussutsit piumaneqarnerilu ukiut tamaasa naleqqussarneqartarput. Tunisassiorpallaarnissaq akimut aalisartumut tunniuttakkatsinnut sunniuteqarsinnaammat pinaveersaassavarput, Lars Nielsen nassuiaavoq.
Suaat akimut pitsaanerpaamut pissarsiarineqarsinnaasumut tunineqartarnissaat pingaarnertut suliniutigineqartoq naqissuserpaa.
- Akili neqeroorutigisinnaasarput pillugu aalisartunut unneqqarittariaqarpugut. Suaat annertuallaat uninngasuutigilernissaat pinaversaartuartariaqarparput. Uninngasuuteqarpallaarutta akit apparsinnaapput, tamannalu naggataagut ukiup tulliani suannik tigooqqaasinnaannginnitsinnik kinguneqarsinnaavoq, Lars Nielsen oqarpoq.
Suaat kilomut 22 koruuneqartissallugit Royal Greenland ukioq manna neqerooruteqarpoq. Siorna agguaqatigiissillugu akigitinneqartunit koruuninik marlunnik qaffasinneruvoq.
Europa suannik tunisaqarfiunerpaavoq
Aalisartut suannik tunisigaangata suaat sinerissami tunitsivinni tunisassiarineqartarput. Kingorna Royal Greenlandip tunisassiorfianut Cuxhavenimi Tysklandimiittumut nassiunneqartarput.
Tassami niuerfiit suannik tunisiffiunerpaasartut Europamiipput. Nunat suannik pisingaatsiartartut ilaat tassaapput Tyskland Sverigelu.
- Suannik niuertarfeqarfinnut tunisinerpaasarpugut, tassa niuertarfissuaqarfinnut Europamiittunut, Lars Nielsen nassuiaavoq.
Nipisat suanniarneq maajip naanerani unissaaq.
