Nataarnaq nutaaq avalannerup siulliup kingorna: Aallartilluarpoq
Ice Trawl Greenland A/S-ip raajarniutaa M/tr Nataarnaq siullermeertumik raajarniareerluni uninngasuusivini raajanik ulikkaartoq 2022-mi januaarip 30-ni sapaammi unnukkut Nuup tulattarfianut tulappoq. Umiarsuup naalagaata, tunisassiorfimmi ingerlatsisup, mistalip minnerunngitsumillu Ice Trawl Greenlandimi siulersuisut siulittaasuata raajarniarneq siulleq nuannaarutigalugulu naammagisimaarpaat.
Allattoq Inuuteq KriegelM/tr Nataarnaq nutaaq ukiutoqanngitsiartoq Nuummut tulannermi kingorna kilisannissaminut piareersarneqareerluni Nuup kujataanut kilisakkiarluni kiisalu amoorutinik tunisassiorfimmillu misilittaajartuutigaluni 2022-mi januaarip aappaani avalappoq.
Nuunneq pitsaasoq
Kilisaatit nutaat ingerlatsineq kilisaammilu nutaarluinnarmi teknikkeqarnikkut ajornartorsiutaasinnaasut eqqarsaatigalugit aallartinniapiloorsinnaasartoq nutaarsiassaanngilaq.
M/tr Nataarnamili nutaami inuttat ukiup aallartinnerani sulilertut Nataarnatoqqamiit nutaamut ajoqutissartaqanngitsumik nuupput.
- Kilisaatitoqaq Royal Greenland A/S-imut 2021-mi decembarip 27-ani tunniukkatsigu 2022-mi januaarip aappaani kilisaatitaami sulilerpugut. Kilisaat aallartilluarpoq, Ice Trawl Greenland-imi siulersuisut siulittaasuat Ove Rosing Olsen oqaluttuarpoq, Nataarnallu sivisuumik sananeqarsimanera atorluarsimagitsik nangippoq.
Avatangiisinut ajunnginneruvoq
M/tr Nataarnami mistali Asbjørn Petersen avalannermi siullermi uuliatorneq pillugit pissangasimavoq. Kilisaatip nutaap avalannermi siullermi ulloq unnuarlu dieseluulia 16 tonsi atortarsimavaa, atuinerlu kilisaatitoqqami atuinertulli annertussuseqarpoq. Kilisaatitoqaq nutaamiit minnerungaatsiarlunilu motoorikinneruvoq.
- Kilisaat ullup unnuallu ingerlanerani agguaqatigiisillugu qaqitaqarnerusinnaammat raajat qaqitat kiiluugaangata uuliamik atuinikinnerusartussaavugut, tamannalu tunisassiornitsinni avatangiisinut sunniuteqarnitsinnut annikillisaaqataavoq. Nunarsuarmi ullut tamaasa avatangiisinut eqqummaarikkaluttuinnartumi tamanna pitsaalluinnartuuvoq.
Pisaqarluarlutillu tunisassiorfik ingerlalluarpoq
Naalakkap Davur Mohr-ip kilisaammi nutaami maluginiagaa siulleq pitsaasuuvoq, kilisaallu suli inuttat ilinniaraluaraat imarpinni allani aallussassatut siunissami periarfissat takusinnaalereerpai.
- Kilisaatip sananeqarnerata nalaani qaloorutit pisinnaasaat, sananeqarneri atortuilu nutarsartinnikuugatisigit pissangagisimavagut. Qaloorutit pitsaalluinnarput, avalannermilu siullermi ajoquteqanngitsumik ingerlapput. Kilisaalli sungiusaqqaassagatsigu qassutit marlunngorlugit kilisappugut, Naalagaq Davur Mohr oqaluttuarpoq.
Imarsiullaqqinneq
Kilisaat imarsiullaqqinnerullunilu aqukkuminarneroqisoq Davurip aammattaaq oqaluttuaraa.
- Sukkassuseq ataaseq atorlugu ingerlaarpugut – malissioratta aamma. Taamaalillutik qassutit silarlunnerani nusoriataarneqarneq ajorput. Imaq qaqitsivimmukanngilaq.
Avalannermi siullermi raajat 1100 tonsit pisarineqarsimammata Nataarnaq nutaaq pisoqqamiit ukiup taamaalinerani 40 procentimik annertunerusumik kilisannerusimasoq angusat takutippaat. Tamanna naalakkamut Davurimut ima isumaqarpoq:
- Pisinnaasat taama annertusitigitillugit siunissami imartani allani kilisaffissarsiorsinnaavugut.
Asseq: Malik Høgh Johansen
Tunisassiorfimmilu ingerlatsisoq Malik Johansen aammattaaq naammagisimaarinnippoq:
- Avalannermi siullermi tunisassiornerpaaffitsinni raajat 95 tonsit ullup unnuallu ingerlanerani tunisassiaraagut. Tamanna tunisassiorfiup ajornaquteqanngitsumik suliaraa, taamatuttaarlu palitsilersuut nammineq ingerlasoq ajornaquteqanngitsumik malinnaasinnaavoq.
Naggasiutigalugu Ice Trawl Greenlandimi siulersuisut siulittaasuat Ove Rosing Olsen pisup ingerlanera tamaat suleqatigiilluarsimanermut qujavoq:
- Inuttagut suliami peqataalluarput, taamaammallu tunisassiaq pitsaarpaseqaaq. Suliniummi annertuumi suleqataasimasut tamaasa qutsavigaagut. Tamarmik tunniusimalluarlutillu annertuumik suliniuteqarsimapput.
