Mikael Thinghuusip Royal Greenland ingerlalluarnerpaaffiani qimalerpaa

Thinghuus 2010/2011 ukiup nikinnerani Royal Greenlandip aningaasaqarnikkut ingerlatsinikkullu ajornartorsiornerpaaffiani atorfinippoq. Ingerlatseqatigiiffik kingorna pitsanngorsaavigineqarpoq – aningaasaqarnikkut, niuernikkut ingerlatsinikkullu.

Amigartooruteqarneq annertooq piffissap ingerlanerani annertuumik sinneqartooruteqarfinngorpoq.

Aallussat Royal Greenlandip 2011-mi ingerlataasa affai sinnerlugit tunineqareerput. Tunisinermiit iluanaarutit ilaatigut ingerlatseqatigiiffiup 2010-mi ajornartorsiornerata nalaani danskit aningaasaataanni milliardit affai, ilaatigut – immaqalu pingaarnertut – Newfoundlandimi Labradorimilu, Nova Scotiami, Chilemi Norgemilu aallussassanut nutaanut aningaasaliissutissatut piginnittumit tunniunneqartut utertinnissaannut atorneqarput.

Pigisanik tunisinerit aningaasaliinerillu pilersaarusiornermut siunniussami The North Atlantic Championimi, Royal Greenlandip ukiuni qulinngulersuni najoqqutarisimasaani, qitiusimapput. Tamanna piffissap ingerlanerani niuerfinni Kangianiittuni kingullertullu Amerikami Avannarlermiittuni pimoorussilluni tuniniaanermut aqqutissiuussilluarsimavoq. Taamaammat ullumikkut Royal Greenland suliffeqarfiuvoq aalisagaqassutsimut, tunisassiornermut tuniniaanermullu tunngatillugu patajaalluinnartumik inissisimasoq.

Royal Greenland corona tuniluukkaluartoq (kingullertullu qarasaasiatigut pinerluffigitikkaluarluni) patajaalluinnartumik 2022-mut appakaappoq:

• 2021 angusat eqqarsaatigalugit ingerlatseqatigiiffimmi aatsaat taamak angusaqarluarfiutigissaaq.
• 2022-mut naatsorsuutit neriunaateqarput.
• The North Atlantic Champion maanna sisamassaanik suliareqqinneqarsimalerpoq.
• Ingerlatseqatigiiffik ukiut qulit matuma siornamut sanilliullugu nunatsinni marloriaatingajannik sulisoqarpoq – sulisoqarnermullu tunngatillugu unammillernartoq annerpaaq tassaavoq suliffissaaleqinani sulisussaaleqineq.
• Royal Greenlandip 2021-mi sulisut ilorrisimaarnerannik misissuisitsinera siornatigut misissuinerit inerneri qaffasingaatsiareeraluartut qaffaqqippoq.

Mikael Thinghuusip, 2022-mi juunimi 60-inik ukioqalertussap, eqqarsaatigilluareerlugu atorfimi nukissanik nutaanik pilimmik inuttalerneqarnissaa Royal Greenlandimut imminerminullu pitsaasuussasoq aalajangerpaa.

”Royal Greenlandimiinnera inuuninni nuannernerpaat ilagaat,” Thinghuus oqarpoq. ”Annertuumik anguniagaqarluni sulineq assorsuaq nuannarisimaqaara. Ilaatigut inuussutissanik peqqinnartunik qaffasingaatsiartumik pitsaassusilinnik tunisassiornerup pingaaruteqangaatsiarnera pissutigalugu; ilaatigut Royal Greenland Kalaallit Nunaanni inuiaqatigiinnut Namminersorlutillu Oqartussanut pingaaruteqarluinnarnera pissutigalugu; aamma Royal Greenlandip aalisakkerinermi uumassusilinni inuiaqatigiinnilu piujuaannartitsinissamut tunngatillugu Kalaallit Nunaanni avataanilu suliffeqarfinnut siuttunut ilaanera pissutigalugu.”

”Pisortaqatigiinni suleqatima ingerlatseqatigiiffimmilu sulisut allat suleqatiginerat nuannarilluinnarsimavara – soorunami aamma ukiuni aqqanilinni tamani siulersuisut siulittaasuanik suleqateqarnera,” Thinghuus nangippoq. ”Suliarisimasagut angusimasagullu tulluusimaarutigaakka.

Royal Greenland suliffeqarfiuvoq ullumikkut patajaalluinnartumik inissisimasoq, sumut ingerlanissaminut nalunninngitsoq – taamaammat ingerlatseqatigiiffiup siunissaa eqqarsaatigalugu isumalluangaarpunga.”

Ingerlatseqatigiiffimmi siulersuisut siulittaasuat Niels de Coninck-Smith oqarpoq:

”Mikael ukiut 12-ingajaat matuma siorna atorfinitsikkatsigu iluatsitsingaatsiartugut oqarpunga. Mikaelilu marluulluta piffissap ingerlanerani suliagut pillugit oqallittarnikuuvugut, naliliinerali siulleq 100%-imik attatiinnarumavara: Royal Greenlandimut iluaqutaalluinnarnikuuvoq, maqaasissaqaarpullu. Suliffeqarfimmi taamanikkumut sanilliullugu ullumikkut allaalluinnarpoq – nukittunerullunilu peqqinneruvoq.”

Siulittaasoq nangippoq: ”Kingoraartissaanik nassaarniarluta siammasissumik pimoorussisumillu inuttassarsiorneq aallartissimalerparput. Sivisulaassagunarpoq, taamaakkaluartorli inuttassarsiuussinerup eqaatsumik ingerlanneqarnissaanik Mikael Thinghuusilu isumaqatigiissuterput naapertorlugu periarfissagissaarpoq, tassami Mikaelip Royal Greenland piffissami sivisulaartumi ikiussavaa.”

Paasissutissat sukumiinerusut:

Masaana Egede, Attaveqatigiinnermut ingerlatsisoq: Tlf. +299 547785 – Email: maeg@royalgreenland.com

Niels de Coninck-Smith, siulersuisuni siulittaasoq: Email: niels@conincksmith.com

Maliina Abelsen, siulersuisut siulittaasuata tullia: mabelsen@gmail.com