Nuunu suliaritinnermi kingorna: - Ukiup affaa qaangiuppat sisorassaanga

Nuunu Chemnitz Berthelsen, ilaatigut Royal Greenlandimit aningaasatigut taperneqarsimasoq, januaarip aappaanni Kronplatzimi Italiamiittumi anngunniulluni unamminermi ajoquserpoq. Nuunup unamminermi pingaarutilimmi ukiuunerani OL-mut anngunnissaminut pointit amigaatigisani pissarsiarisussaagaluarpai. Unamminermi orluvoq, kingusinnerusukkulli ajoqusingaatsiarsimanini aatsaat paasivaa. Orlunera ajorpallaanngikkaluarlunilu nakorsamiit sisorarnerminik aallussiinnarnissamik akuerisaagaluarpoq, kingornali sungiusarnermini ajorluinnartoqarnera paasivaa:

 - Orluneq ajorpallaanngikkaluarpoq, taamaammat nakorsap sisoraannarnissara akueraa. Sungiusarninni pisarnittullu nalinginnaasumik sanguninni seeqqora nipiliormat anniangaatsialerpunga. Seeqquma talerperliup ujalorsua kittorarsimavoq.

Ajoqusernerup kingorna Innsbruckimi Østrigimiittumi sisorartartut nunanut allanut unammisartut nakorsaannut nakorsiapallappoq. Tassani ullualuit ingerlaneranni seeqqumi pullappallaalinnginnerani suliaritippoq.

Sungiusaqqinneq

Nuunup timimik sungiusaasoq peqatigalugu sungiusaqqinnissaa tullinnguuppoq, tassanilu nukiit seeqquata nalaaniittut nukkassarneqarnissaat siunertaavoq. Sungiusaqqinneq sakkortussaqaaq Nuunuli siunissamut qulanngilaq:

- Uternissannut sungiusangaatsiassaanga, qaammatilli arfinillit qaangiuppata sisoraqqilernissara aalajangiusimalluinnarpara. Sisorarneq nuannareqaara angusaqarluarnissannullu qanillinera ilisimaaraara, Nuunu oqaluttuarpoq.

Nuunup nukkassaqqinnini Nuummi aallartereerpaa

Timersorneq sakkortooq

Nuunu OL-imut peqataanissamut anguniakkami angunissaanik neriuuteqarsimagaluarpoq, timersuummili aallussamini ajoqusertoqaratarsinaanera paasisariaqarsimavaa. Qanorluunniit pisoqaratarsinnaavoq. Tapiissuteqartut tamatumunnga paasinnittarput, taamaammallu Nuunup ajoqusersimagaluarluni suli tapersersorneqarnini nuannaarutigaa.  

Nuunumut 2021-imi 2022-imilu tapiissuteqarnissaq Royal Greenlandimi tapiissuteqartarnermut ataatsimiititaliami 2021-mi aalajangerneqarpoq. Nuunup nunanut allanut unammisartutut sisoraannarnissaa tapiissuteqarnikkut piviusunngortinneqarpoq.

- Timersuut taamaappoq. Sakkortullunilu ajoqusertoqartarpoq. Qaffasinnerpaamulli inisseqqinnissanut sapinngisara tamaat sungiusarpunga, tullertullu Maribelimi Frankrigimiittumi VM-mut peqataanissannik anguniagaqarnera sulissutigaara. Tapersersorneqarnera pillugu Royal Greenlandimut qujarusuppunga. Qujamasoqaanga, Nuunu qungujulalluni oqarpoq.