Aalisartoq Nutaaq pillugu: Annertunerusunik akiginnerusunillu aalisarsinnaavugut
Suliniut Nutaaq aallartimmalli bundgarnersorluni aalisarneq aatsaat taamak ajornanngitsigisoq suliniummi Nutaaq-mi aalisartut misilittagaqarnerpaat isumaqarpoq.
Allattoq Mathies Hvid ToftKarl Ingemann aalisartutut ukiuni 50-init amerlanerusuni misilittagaqarpoq, suliniutillu Nutaap aallartinnerata inuuneranut oqilisaataanera naqissuserpaa.
- Siornatigut saarulliit tunitinnagit niaquerlugillu erlaveertarpagut. Maannali aalisartunut suliassaarujussuarunnaarmata aalisarneq oqinnerulerlunilu isertitat annertunerulerput, oqarpoq.
Nutaaq 2015-imi aallartinneqarpoq, suliniullu Maniitsumi aalisartunit ikittuinnarnit suleqataaffigineqarsimasoq maanna tulaassuisunit avannaani Kangaatsiamiit kujataani Paamiuneersunit 100-init amerlanerusunik pilersuisoqarpoq.
Qassutit uumatitsiviit saarullinnik immeruminarput
Karl Ingemann Maniitsumeersoq aallaqqaataaniilli peqataavoq.
- Bundgarnit ningeriarlugit qassutinut uumatitsivinnut ikkuttarpagut. Qassutit qalugutsigit saarulliit uumatitsivinnut nuutissavagut. Qassutit uumatitsiviit ulikkaarpata bundgarniniit illikariarlugit aalisakkat aaneqartinnagit minnerpaamik ulluni 14-ini uninngatittarpagut, Karl Ingemann nassuiaavoq.
Qassutit uumatitsiviit ulikkaaraangata alla immerniarlugu bundgarninik ningitseqqittarpoq.
- Oqilingaatsiarnikuuvoq, oqarpoq.
Karl Ingemannip Nutaaq sioqqullugu bundgarnersorluni saarullinniarnermini tulaassai annertunerpaat 150-init 200 tonsiusimapput. Nutaaq aallartereermat saarullinniarnermini tulaassai annertunerpaat 500 tonsit missaanniipput.
Nutaaq patajaallisitsivoq
Saarulliit akii ukiuni kingullerni appariangaatsiarput. Nutaarli pissutigalugu nunatsinni akit apparneri ajornerit eqquivallaanngillat.
Saarulliit tunisassiorfimmi Maniitsumiittumi tunisassiarineqannginnerminni uumatitsivimmiitinneqartarnerisa nerpiisa pitsaassusaannut iluaqutaangaatsiartarnerinik tamanna pissuteqarpoq.
- Siornatigut saarullik erlaveeraangatsigu nerpia pitsaavallaanngitsoq takusinnaasarparput. Tamanna piumaneqarnerisa annikinnerannut peqqutaaqataasimasinnaavoq, Karl Ingemann oqaluttuarpoq, nangipporlu:
- Pitsaassusaa qaffassarlugulu aalisartut tunisisinnaanissaat oqilisaaffigigutsigu siunissami aalisarneq pitsaanerusinnaavoq
Nutaaq pillugu uani paasisaqarnerusinnaavutit.
