Suliniut Nutaaq aasaanerani saarullinniarsinnaatitsivoq

Suliniut Nutaaq 2015-imi aallartinneqartoq aasaanerani saarullinniarnerup ullumikkut imminut akilersinnaasumik ingerlaqqilernissaata qulakkeernissaanut pingaaruteqarpoq. Tassami saarulliit nioqqutigineqartut pitsaassusaasa nikerarnerat ukiorpassuarni unammillernarsimavoq.

Royal Greenlandimi tunisassiornermut pisortaq Lars Nielsen taama oqaluttuarpoq.

- Saarulliit bundgarnersorluni pisat pitsaasuunissaat niuerfinnilu nunani tamalaaniittuni akigissaarnissaat sivitsortumi unammillernartissimavarput. Suliniutip Nutaap tamanna sutigut tamatigut pitsanngorsaavigaa, oqarpoq.

Aasaanerani saarullinniarnermi unammillernartut annerpaartaat tassaavoq nerpiata pitsaassusaata appasinnerujussua. Saarullik Nutaaq-tut tunisassiarineqanngippat nioqqutissap pitsaassusaa taamaalilluni appasinnerussaaq.

- Saarulliit sinerissap qanittuani ammassannik nerisaqartarmata nerpii aqinnerulertarput, aalisakkallu ileqquusumik qeritinneqaraangata nerpiinut ajoqutaaginnartarpoq. Nerpii nerisassiarineqassallutik aatsinneqaraangamik aqilluttunngortarput, Lars Nielsen nassuiaavoq.

Nutaaq- pitsaassutsimut tunngavoq

Saarulliit minnerpaamik ulluni 14-ini qassutini uumatitsivimmiitinneqartarmata ajornartorsiut tamanna Nutaaq malillugu aaqqiivigineqarpoq.

Tassaneereerunik Royal Greenlandip kilisaataataanut uumatitsivimmut tunniunneqartarput, taassumalu aariarlugit tunisassiorfimmut Maniitsumiittumut assartortarpai.

- Aalisakkat qassutini uumatitsivinniikkaangata aqajarui imaarneqartarput, taamaalillutillu nerpii mattunerullutillu kusanarnerulersarput nunanilu tamalaani atuisunit piumaneqarnerulersarlutik, Lars Nielsen oqarpoq.

Taamatuttaaq suliniut Nutaaq aalisakkat eqqortumik passunneqarunik naalliuttussaajunnaarlugit aaqqissuunneqarpoq, aalisakkallu minnerit uumatillugit piiarneqartarput. Suliniummi pisisartut nuannaarlutik akimik pitsaanerusumik akiliisarnerat iluaqutit ilagaat.

- Sinerissap qanittuani saarulliit aasaanerani aalisarneqartartut pitsaassusaasa appasinnerat pissutigalugu Royal Greenland ukiut ingerlanerini pisisartuniit nunanit tamalaaneersuniit nioqqutinik untritilikkaanik utertitsivigineqartarpoq. Taamaammat iliuuseqartariaqarnikuuvugut, Lars Nielsen erseqqissaavoq.

Suliniut Nutaaq 2015-imi aallartinneqarmalli Royal Greenland saarullinnik Nutaatut tunisassianik ataasiaannarluni utertitsivigineqarnikuuvoq.

Taamaalilluni tunisisarneq annertusillunilu minnerunngitsumik akit qaffapput.

Unammillertit ikiliartorput

Eqqortumik oqassagaanni aasaanerani sinerissap qanittuani saarullittanik tunisinerit tamarmik aningaasatigut annaasaqaataasarput.

- Nunani tamalaani saarulliit akiisa ukiorpaalunni appasittarnerinik tamanna pissuteqarpoq. Saarulliit akii appasereernerat sinerissap qanittuani saarullittat akiinut apparsaataavoq, Lars Nielsen oqarpoq.

Nunani tamalaani akit appasissimaneri ukiut ingerlanerini ersarissumik takuneqarsinnaapput. Maanili Royal Greenland saarullinnik tunisiffiunerpaasoq oqaatigineqarsinnaavoq.

- Royal Greenland nunatsinni inuiaqatigiinni immikkut ittumik inissisimavoq, akisussaaffimmillu tigusivugut, akisussaaffimmik tigusisinnaaneq kisiat pissutiginagu tigusiumanerli pissutigalugu. Tamatumunnga Nutaaq assersuutaalluarpoq, Lars Nielsen nassuiaaqqippoq.

Saarullik Nutaatut tunisassiaq pillugu uani paasisaqarnerusinnaavutit.