Royal Greenland aatsaat taamak angusarissaartigaaq
Royal Greenland angusat 326 mio. DKK-jummata 2021-mi suliffeqarfiup oqaluttuarisaanerani aatsaat taamak angusarissaartigaaq. Ukiuni kingullerni angusanut sanilliullugu pitsanngoriaataavoq ersarissoq – aamma Coronap nunarsuarmi tamarmi tuniluunnera sioqqullugu angusarineqartartunut.
Akileraannginnermi angusat nalinginnaasut (tassa kilisaatinik tunisinnginnermi angusat) 326 mio. DKK-jugamik aatsaat taamak annertutigaat, kaaviiaartitallu 5.638 mio. DKK-jugamik 16%-imik qaffassimapput.
Covid-19-imik 2021-mi sunnertittoqaraluartoq kingornalu pisisartut atuisullu qularaluartut pitsanngoriaat ersarissoq anguneqarpoq.
- Royal Greenland A/S-ip nualluutip nunarsuarmi tuniluunnera unammillernartoqaraluartoq aalisarnerup, tunisinerup, tunisassiornerup tuniniaanerullu pilersaarutit naapertukannerlugit ingerlaannarnissaa 2020 aallartilaartorli aalajangerpaa, Royal Greenlandimi pisortaaneq Mikael Thinghuus oqarpoq. Suliffeqarfissuaq immami nunamilu atorfiit tamaasa inuttaqartillugit, piumaneqarluartunik naammattunillu uninngasuusivimmiittuuteqarluni nunanilu tamalaani pilersuisunut pisisartunullu attaveqarluarnini attatiinnarlugu 2021-mut ikaarsaarpoq,
Suliffeqarfissuaq niuerfiit ikilisinneqarnerinut pilersuinerulli nalinginnaasumik ingerlanneqarneranut kalluaannaveeqqutitut inissippoq. Tamanna najukkani inuttaasut aalluussiinnarnissaannut suliffissaqarnissaannullu qulakkeerinneqataavoq.
- Aalisarnerput tunisassiornerpullu annikillingaatsiarsimagaluarutsigu pisuussutinik pissarsinissatsinnut ataavartumik ajoqutaallunilu najukkani innuttaasuni suliaqarfigisatsinni isumaginninnikkut aningaasaqarnikkullu annertuumik ajornartorsiortitsilersimassagaluarpoq, Mikael Thinghuus oqarpoq.
Periusissatut pilersaarut nutaaq inuiaqatigiinni naleqalersitsivoq
Angusat ineriartornerisa ilarujussuat saattuanut Amerika Avannarlermi pisanut raajanullu qalipalinnut nunatta imartaani pisanut niuerfigissaarnermik peqquteqarpoq. Taamatuttaaq pissuseqatigiiaat aallunneqartut allat, soorlu raajat Issittup imartaaneersut uusut qalipaajakkallu, qalerallit saarulliillu,
2021-p ingerlanerani tunisaallualeqqikkaluartut nualluut nunarsuarmi tamarmi tuniluuttoq sioqqullugu tunineqarnermisuut suli tunisaalluartigilinngillat.
Niuerfiit eqqarsaatigalugit Amerika Avannarleq siuariaateqarpoq, Kangiali Europalu maanna aamma siuariartoqqilerput.
Pissuseqatigiiaat aallussat Atlantikup Avannaata imartaani pisarineqartartut tunineqarneri 2021-mi kaaviiaartitat 84 %-erivaat. Tamanna Royal Greenlandip periusissatut pilersaarusiaani nutaami North Atlantic Champion 4.0-mi, 2021-mi siulersuisunit akuerineqartumi, anguniagaavoq.
- Periusissatut pilersaarut suliassatut anguniakkatullu aalajangiussanit ukiuni qulini kingullerni ingerlalluartumik atuussimasunit pissuseqatigiiaanillu aallussani niueruteqarnikkut suliniuteqarnermik ingerlatsinermillu pitsanngorsaanermik ukkattarinninnikkut naleqalersitsinermit aallaaveqarpoq, Mikael Thinghuus oqarpoq.
Qarasaasiatigut saassunneqarneq unitsinneqarpoq
2021-mi angusarissaaraluartugut Royal Greenlandip decembarip qaammataagaa qarasaasiatigut annertuumik saassunneqarnera aamma eqqaamaneqassaaq. Nunani tamalaani systemigut piffissami sivisuumi atorsinnaasimanngillat.
- Sulisut suliffeqarfissuarmi tamarmeersut annertungaatsiartumik suliniuteqarnerisigut tunisat amerlanerpaat pisisunut tunniunneqarlutillu pilersuinermut periuutsit ingerlatiinnarneqarmata ingerlatsinermi annaasat minnerpaaffissaminiitinneqarput, Mikael Thinghuus oqaluttuarpoq.
Nunani tamalaani aaqqissuussaaneq, periusissatut pilersaarut niueriaaserlu patajaatsoq ingerlalluartutut taaneqarsinnaasut aallaavigalugit Royal Greenland ukiuni tulliuttuni arlalinni tunngavissaqarluarpoq.
- Paasissutissanik sukumiinerusunik piumaguit Pisortaaneq Mikael Thinghuus oqarasuaammut angallattakkamut +45 50 89 30 00-imut sianerlutit saaffigisinnaavat.
