Sulisut nunanit allaneersut inuiaqatigiinnut sunniuteqarluarput
Nunanit allaneersunik sulisoqalerneq tunisassiorfinnut inuiaqatigiinnullu sunniuteqarluarpoq. Royal Greenlandip iluani nalunaarusiap tamanna ersersippaa.
Allattoq Pilunnguaq Egede-EnoksenRoyal Greenlandip sulisut nunanit allaneersut nunatsinni tunisassiorfinni sulisussaaleqiffiusini sulisussat siulliit 2017-mi sulilersippai. Taamaaliorneq illoqarfinnut nunaqarfinnullu sunniuteqarluarpoq.
Tunisassiorfinni sulisut nunanit allaneersut siulliit 2017-mi Sisimiuni, Maniitsumi, Uummannami Qasigiannguanilu sulilersinneqarput.
Sulisussaaleqinermik ajornartorsiuteqarneq qaangerniarlugu avannaani nunaqarfimmi Tasiusami najukkami sulisooreersut sulisunik nunanit allaneersunik ilaneqarput.
Tamanna Najannguaq Olsvigip tunisassiorfimmi aqutsisuusup sulinerup tungaatigut inuttullu pissarsiaqaatigaa.
- Sulisut nunanit allaneersut inuiaqatigiinnut akulerulluarlutillu sulinitsinnik oqilisaapput. Ilakkuminaqalutillu uagutsitulli illarumatutigipput. Kalaallisut ilikkapallannerat akulerunniarnerannut iluaqutaavoq, Najannguaq Olsvig oqaluttuarpoq.
Tunisassiorfiup aqutsisua malillugu sulisut nutaat inuiaqatigiinnut akulerutipallapput.
- Tasiusami najugaqarnertik nuannareqalugulu innuttaasut pitsaasorujussuunerarpaat. Aalisartunit aalisakkanik pajunneqartarlutillu qimmiaqqamik ullut tamaasa iggattakkaminnik tunisissimapput. Inussiarnersorujussuullutillu nunaqarfimmi aaqqissuussanut peqataasarput, Najannguaq Olsvig oqarpoq.
Ilinniariarnissaq toqqarneqartarpoq
Royal Greenlandimi sulisoqarnermut siunnersortaaneq, Søren Olsen Damgaard, malillugu, nunaqarfinni inuiaqatigiit ineriartornerisa malitsigisaannik sulisussaaleqineq sumiiffinni arlalinni atuutilersimavoq.
- Nunatsinni nunaqarfiit inui utoqqaliartorput. Inuusuttut amerliartuinnartut illoqarfinnut annerusunut ilinniariarnissartik toqqartarpaat, taakkunanilu amerlavallaanngitsut nunaqarfimminnut utertarput. Tamatuma kinguneranik tunisassiorfitsinni arlalinni sulisussaaleqisarpugut, Søren Olsen Damgaard oqaluttuarpoq.
Søren Olsen Damgaard Royal Greenlandimi Sulisoqarnermut Immikkoortortaq peqatigalugu aasaq manna avanaanni nunaqarfinni tallimani sulisut naapinniarlugit angalasimavoq.
- Sulisut suliffigissaarnissaat suliffeqarfimmut pingaaruteqarpoq. Taamaammat sulisutta qanimut naapillugillu sulinerminni atukkaminnik oqaasinnguisinnissaat soqutigisaraarput. Tamanna sulisutsinnut nunanit allaneersunut soorunami atuupportaaq, Sulisoqarnermut Siunnersortaaneq Søren Olsen Damgaard oqaluttuarpoq.
Royal Greenland Filipinerinik, Kinamiunik, Thailandimeersunik, Japanimiunik Sri Lankameersunillu sulisoqarpoq.
