Royal Greenland atugassarititaasut ajornakusooraluartut naammagisimaarnartumik angusaqarpoq

Royal Greenland 2022-mi akileraaruteqannginnermi 235 mio. DKK-nik angusaqarpoq, kaaviiaartitallu 5,8 mia. DKK-jupput. Angusat naammagisimaarnarput, Susanne Arfelt Rajamand, Royal Greenlandimi pisortaaneq, nassuiaavoq.

• Ukiumi angusat naammagisimaarnartut pissuseqatigiiaanik nunatta imartaaneersunik aallussatsinnik, ingerlalluarsimasunik, tunngaveqarput. Aallussat tuniniaanerup Covid-19-ip tuniluunnerata nalaani unammillernartoqangaatsiarsimagaluartut kingorna 2021-ip naanerani siuariartuinnarsimapput, Susanne Arfelt Rajamand oqarpoq.

Tassa imaappoq, raajat qalipallit, uusut qalipaajakkallu aamma qalerallit isertitaqaataanerat nalinginnaasumut uteqqissimavoq, aammattaarlu saarullinnik aallussaqarneq annaasaqaataagaluartoq allaat siuariaateqarsimavoq.

• Kilisaatinik nutaanik nutaaliaasunillu sanatitsinermut ukiuni kingullerni aningaasaliisarpugut, tamannalu maanna ajunngitsumik kinguneqalereerlunilu niuerfinni tuniniaanerup ineriartorneranut iluaqutaalereerpoq, Susanne Arfelt Rajamand oqarpoq.

Ingammik qalerallit raajallu qalipallit siuariaateqarmata Kinami tuniniaanerup ineriartornera pitsanngoriaateqarami siornatigut tunisaqartarnerit assinganik annertussuseqaqqilersimavoq.

Kaaviiaartitat 5,8 mia. DKK-jusut 2021-mi kaaviiaartitanut sanilliullugit procentinik marlunnik qaffariaateqarput.

Aningaasartuutit qaffannerat unammillernartoqalersitsivoq

2022-mi angusat pitsaasuugaluartut ukioq unammillernartoqarfiuvoq. Tassami aningaasartuutit qaffakkiartungaatsiarput.

• Ineriartorneq tamanna aningaasap naleerukkiartungaatsiarneranik peqquteqarpoq, ingammillu Ruslandip Ukrainemik tiguaanerata kingunerisaanik nukissamut akit qaffakkiartornerannik peqquteqarpoq. Qaammatini kingullerni ingerlanerliortoqalermat ajornartoorneq niuerfinni Europamiittuni nalorninartoqalersitsivoq, Susanne Arfelt Rajamand nassuiaavoq.

Europa suliffeqarfissuup niuerfigisartagaasa pingaarnerit ilagimmassuk tamanna Royal Greenlandimut sunniuteqarpoq.

Tassunga ilanngullugu Royal Greenlandip niuerfinni Ruslandimiittuni tuniniaanini 2022-mi marsip aallartinnerani unitsippaa, tamannalu kaaviiaartitanik 100 mio. DKK-nik taamaatitsiinnarneruvoq.

Amerikami Avannarlermi tuniniaaneq appariaateqarpoq

Aammattaaq saattuanik tuniniaaneq appariaateqarpoq. Tamanna ukiut siuliini ineriartornerup illuatungerilluinnarpaa, tassami saattuat Royal Greenlandip isertitaqarneranut pingaaruteqarluinnarsimapput.

• Amerikami Avannarlermi tunisassiassat akiisa qaffasinnerujussuat niuerfiillu tunisaqarfiunerisa appariaateqarnerat peqqutigalugu tuniniaaneq unammillernartoqarpoq. Igaffissuaqarfinni niuertarfeqarfinnilu piserusussuseq annertuumik apparmat akit 2021-mut sanilliullugit 50 procentimiit annerusumik apparput, Susanne Arfelt Rajamand oqaluttuarpoq.

2022-mili eqqaaneqareersutut unammillernartoqaraluartoq ukiumi sinneqartoorutit siornatigut Royal Greenlandip angusaanut assingupput.

Paasisaqarnerorusukkuit Suliffeqarfissuarmi attaveqatigiinnermut ingerlatsisoq Masaana Egede oqarasuaammut uunga saaffigisinnaavat: +299 547785