Tusagassiutitigut nalunaarut

Matumuuna Royal Greenlandip saarullinniarfissami tulliuttumi saarullinnut Nutaaq-tut tunisassianut tunisinermi akit nuannaarutigalugit saqqummiussinnaalerpai.

Saarullit niuerfinni akii ukiup siuliani apriilimi qaffasinnerpaareerlutik kingorna appariartungaatsialeraluartut ukioq manna saarullinnik Nutaaq-tut tunisassiassanik tunisinermut akit ukiup siulianitut inissisimassasut aalajangiunneqarpoq. Saarulliit nalinginnaasumik tunineqaraangamik akiisa 26 procentimik apparnerat saarullinnik nalinginnaasumik tunisisarnermi akinik appaasariaqalernitsinnut ilaatigut pissutaavoq.

Saarulliit Nutaaq-tut tunisassiat akii nunani tamalaani niuerfinni pissutsinik misissueqqissaarnermik tunngaveqarput.

Akit pitsanngoriartortut takusinnaagatsigu niuerfiillu qaammatini tulliuttuni pitsanngoriartornissaat naatsorsuutigigatsigu akit taamaatiinnassallugit aalajangernitsinnut peqqutaavoq.  

Akit niuerfinni nunani tamalaaniittumi ukiup siuliani atuuttut assinganik akeqartitsinissatsinnut suli pitsanngoriaateqartussaagaluartut akit maanna pitsanngoriartorneri aalisartunut iluaqutaassasut kissaatigaarput.

Akit attatiinnarnerisigut saarullinnik Nutaaq-tut tunisassiassanik aalisarneq aallartilluassasoq taamatuttaarlu aalisartut peqatigiiffiisalu maannamiit suleqatigilluarnissaat neriuutigaarput.

Aalisarluarnissamik kissaateqarluta. 

Royal Greenland