AU-tut ilinniartoq: - Nunami allami suliffimmik misiliilluni nuanneqaaq
Royal Greenlandip Niuernermik Ilinniarfimmi qaffasissumik ilinniartuni ukiup aappassaa ilinniartut toqqakkat suliffimmik misiliinerminni piffissap ilaa nunami allami suliffimmik misiliisinnaanissaannut periarfissittarpai. Suliniut siunissami suleqatitaassamut, ilinniareeruni suliffeqarfimmik tamanik paasisimasaqalersimasumut, aningaasaliinertut isigineqassaaq.
Niels Peter Johnsen, nunani tamalaani niuernermik nittarsaassinermillu AU-tut ilinniartoq, nunatsinni tunisassianik tuniniaavimmi Nuummiittumi suliffimmik misiliisoq, Royal Greenlandip allaffiani Svenstrupimiittumi tunisassianik immikkoortukkaalerinermut immikkoortortami suliffimmik maanna misiliivoq. Sapaatip-akunneri arfineq-marluk tassaniissaaq.
Niels-Piitap suliffimmik misiliinini qanoq igineraa pillugu oqaloqatigaarput.
- Nunami allami suliffimmik misiliilluni nuanneqaaq. Tamarmik tikilluaqqusillutillu ikiuiumatoqaat, Niels Peter oqarasuaatikkut angallattakkakkut akivoq, nangipporlu.
- Tunisassiassaq sunaluunniit immikkoortukkaajummat immikkoortukkaat assigiinngitsut paasisaqarfigaakka. Assersuutigalugu raajat seernartulikkat taakkulu sumut tunineqarnissaat eqqartorneqarmata ataatsimeeqataavunga. Danmarkimi quersuarmi sulineq tuniniaanerlu pillugit paasisaqarneruvunga. Pisisartut nutaat qanoq ussassaaruteqarfigineqarsinnaanersut poortuutissallu piujuartitsinissaq siunertaralugu sanaat sorliit ineriartortinneqassanersut. Tamakkiisumik isigalugu tunisassiat assigiinngitsut ilisimasaqarfigilerpakka, Niels Peter Johnsen oqarpoq.
Pilersaarutit malillugit suliffimmik misiliinermi ilaa Tysklandimi upernaaru ingerlatissavaa.
- Atuaqatinni kisiartaallunga nunami allami suliffimmik misiliissaanga. Royal Greenland suliffeqarfiuvoq nunanut tamalaanut siammarsimasoq, nuanilu tamalaani niuerfiit paasisaqarfiginissaat ilinniarninnut naleqquppoq. Taamaammat tuniniaavimmi Tysklandimiittumi suliffimmik misiliinissara nuannerunarpoq, Niels Peter oqaluttuarpoq.
Nunami allami suliffimmik misiliinissaq inuttut ineriartuutigaa.
- Inuit ilisarisimanngisakka naapittarakkit suliassallu allaanerit misilittarakkit imminut unammillertarpunga. Taamaammat inuttut ineriartorpunga, Niels Peter oqarpoq.
Danmarkimi suliffimmik misiliinera 2019-imi decembarip 20-ani naammassissaaq. Suliffimmik misiliineqarata nalaani Royal Greenland inissaqarneranik isumaginnittuuvoq.
