Inuusuttut akimmiffeqarnikut Royal Greenlandimi suliffimmik misiliisut

Alexander Dahlip aamma Heidi Henningsenip ukioq manna aggustimi ilinniagarerusutaminnik aallartitsinissaraluat pinngitsoortinneqarpoq. Ilinniaqqinniarlutik suliffimminniit tamarmik soraarsimapput. Niunernermik Ilinniarfimmi nunani tamalaani niunermik niuernermilu tuniniaanermut, kiisalu pigisanik nalilinnik aqutsinermut bacheloritut ilinniartitsinissaata aningaasassaqartinnginnera pissutigalugu aallartinneqarsinnaasimanngilaq. Maannali marluullutik Royal Greenland Svenstrupimi suliffimmik misiliipput.

Bacheloritut ilinniartitsinerup taamaatiinnarneqarnera tusagassiutini oqartussanilu septembarip aallartinnerani eqqartorneqangaatsiarpoq. Inuusuttut ilinnialernissaminnut qilanaarsimasut ilinniakkamik aallartitsissanerlutik aallartitsinngiinnassanerlutilluunniit paasisaqannginnertik pillugu ilungersuutitik oqaluttuaraat. Suliffeqarfiup ilinniartitsissutini taakkunanerpiaq ingerlariaqqiffiusunik ilinniagaqartut amerlanerunissaat kissaatigimmagu Royal Greenlandip qullersaqarfianit pisoq malinnaavigeqqissaarneqarpoq. Royal Greenland ullorpaaluit ingerlareersut ikiuinissaminik neqeroorniarluni Niuernermik Ilinniarfimmut saaffiginnippoq.

Kiisami aaqqiisoqarpoq

- Aaqqiissummik nassaarniarneq sivisuvoq, ilinniartsitsinerulli aaqqissuussaanera naapertorlugu semesterip sisamaani nunamut allamut ilinniariarnissamik piumasaqaateqartoq, taannalu suliffimmik misiliinertut atorneqarsinnaasoq, Niuernermik Ilinniarfiup qujanartumik erseqqissarpaa. Royal Greenlandi taannarpiaq pillugu ikiuisinnaalluni periarfissaqarpoq, ilinniartullu suliffimmik misiliinissartik maanna ingerlateriarlugu ilinniarnerminni kingusinnerusukkut naammasseriikkatut nalunaarsortissinnaavaat. Aaqqiissutissaq iluatsimmat allaffitsinni Svenstrupimiittumi inissarsiorluta aallartillutalu ilinniakkamik aallartitsisussat akornanni ilinniartussasiorluta aallartippugut. Ilinnialertussat sisamat oqaloqatigaavut taakkunanilu ilinniartussagut marluk toqqarpavut, Inga Dora Markussen, Royal Greenlandimi suliffeqarfissuarmi attaveqatigiinnermut ingerlatsisoq, nassuiaavoq.

Ullumi oktobarip 30-ani Alexander Dahlip, 25-nik ukioqartup, aamma Heidi Henningsenip, 32-nik ukioqartup, Royal Greenlandip immikkoortortaani Svenstrupimiittumi suliffimmik misiliinertik aallartippaat, 2020-imilu januaarip 15-iata tungaanut ingerlatissavaat. Alexander immikkoortortami Nordic Salesimi suliffimmik misiliissaaq Heidilu aningaasaqarnermut, nakkutilliinermut suliffeqarfissuarmilu assartugalerinermut immikkoortortami suliffimmik misiliissaaq.

- Ilinniartortaagut Svenstrupimukannginnerminni ulluni 14-ini nunatsinni tunisassianut immikkoortortameeqqaarput. Tassani Royal Greenland suliffeqarsik qanoq ittuunersoq oqaluttuarineqarlunilu tunisassiorneq oqaluttuarineqarpoq, nalitusaanermut ilisimasanik tunniussisoqarlunilu suliffeqarfiup aaqqissuussaanera oqaluttuarineqarpoq, anguniakkagut takorluukkagullu oqaluttuarineqarlutillu suliffimmik misiliinermi suna naatsorsuutigineqarsinnaanersoq paasissutissiissutigineqarpoq. Nalinginnaasumik ukiup aappassaa ilinniartut Svenstrupimut nunanilu tamalaani tuniniaavitsinnut aallartittarpavut, taamaammat suliffeqarfik pillugu ilisarititsineq naatsukullaavoq. Isumalluarpugulli. Marluullutik qaffasissumik ilinniagaqareernikuupput, Inga Dora Markussen oqarpoq.

Periarfissinneqarnerminnut qujamasupput

Alexander aamma Heidi ilinniakkaminnik aarlartitsinissaminnut periarfissinneqarnerminnut qujamasupput.

- Aallartinnera nuannaarutigalugulu suna tulliunnersoq pissanngatigaara. Royal Greenland suliffeqarfiuvoq nunanut tamalaanut siammarsimasoq, suliffeqarfissuarmillu nunani tamalaani siammarsimasumik ilisimasaqalernissara uannut periarfissatsialaavoq, Alexander Dahl oqarpoq.

Alexander nunani tamalaani niuernermik nittarsaassinermillu qaffasissumik ilisimatusarnermi 2017-imi soraarummeernikuullunilu Kommune Kujallermi attaveqatigiinnermik misissueqqissaarnermillu ukkataqarluni suliffimmik misliinikuuvoq.

Heidi Henningsen aningaasaqarnermik pigisanillu nalilinnik aqutsinermik qaffasissumik ilisimatusarluni 2016-imi soraarummeerlunilu Royal Arctic Linep aningaasaqarnermut immikkoortortaani suliffimmik misiliisimavoq kingornalu akileraartarnermut aqutsisoqarfimmi sulilerluni.

- Ilinniarneq pisortatigoortumik suli aallartinngikkaluartoq suliffimmik misiliinerput iluaqutaavoq. Suliffeqarfik taamak siammasitsigisoq qanoq ingerlanneqarnersoq paasisaqarfigissallugu periarfissinneqarpugut, Heidi Henningsen oqarpoq.

Niuernermik Ilinniarfimmi bachelorinngorniarluni ilinniartitsinissaq qaqugu aallartinneqassanersoq suli nalunarallarpoq. Immaqa 2020-mi januaarimi ukiamiluunniit. 2020-mi aningaasanut inatsisissami aningaasaliissutigineqartussat apeqqutaapput.

- Ilinniarnerup ukiup nutaap aallartinnerani aallartinneqarnissaa marluulluta neriuutigaarput, neriuppugullu suna tamarmi iluatsikkumaartoq, Alexander aamma Heidi isumaqatigiillutik oqarput.