Katersiinnarnani naatitsineq
Nikoline Ziemerip, Royal Greenlandimi tunisassiassanik inerisaavimmi ingerlatsisup Maniitsullu eqqaani qeqqussanik suliaqartup, Kalaallit Nunaanni niuernermi periuseq suli atorneqanngitsoq – tassa naatitsineq - atorpaa. Misiliilluni naatitsineq siulleq iluatsilluarsimammat siunissami qeqqussanik naatitanik niueruteqarsinnalernissamik anguniagaqarneq taamasilluni aallartippoq.
Inernerit
Nikoline Ziemer misiliilluni naatitsinermini siullermi qeqqussanik sulluitsunik uisunnillu 150 kiilunik oqimaassusilinnik naatitsisimavoq. Katersat niuerutigalugit tuniniarnissaannut suli annikippallaarput, taamaammallu Nikoline Ziemerip katersani allamut atussavai.
- Pitsaassusaat inuussutissaqassusaallu misissoqqaassavakka, katersamalu ilaat neriniartarfinni igasunut nerisassanillu nittarsaassisunut tunniutissavakka.
Pisiffimmi igasut Maniitsullu akunnittarfiani igasut qeqqussanik iganerminni misiliutitut akussaminnik pereernikuupput.
Naatitsineq
Kalaallit Nunaata kitaani qeqquaqarluartoq qeqqussallu pitsaalluinnartuusut ilisimatusartuniit uppernarsarneqarpoq. Nikoline Ziemerip nunani tamalaanisut qeqqussanik katersanik niuerfinni niueruteqartoqarsinnaanera illersorpaa, naatitsinerli nammineq siunniuppaa.
- Qeqqussat immami isumaminnik naanikut katersorneriniit naatsitsineq qanoq eqqiluinnerutigisoq Norgemi Savalimmiunilu paasisassarsiornitsinni paasivarput.
Qeqqussat immami isumaminnik naanikut katersoraanni immap naqqa kilisanneqartarpoq, kingorna qeqqussat katersorneqartarput, immikkoortiterneqartarput salinneqartarlutillu. Naatitsinermut sanilliullugu suliaq piffissartorfiullunilu annertoorujussuuvoq.
- Qeqqussanik uisunnik naatitsigaangama uisunnik katersisarpunga. Qeqqussanik sulluitsunik naatitsigaangama sulluitsunik katersisarpunga. Qeqqussat naatitsivimmi pituutarsuarni naasarput, taamaammallu qeqqussaniit isumaminnik naanikuniit perlukunik, soorlu siuteqqunik uumasunillu immap naqqaniittunik allanik, akoqarneq ajorput. Taamaalilluta tunisassiaq sutigut tamatigut suussutsimigullu eqqiluinnerusoq naatittarparput.
Inuussutissat
Qeqqussat naassappata seqerngup qaamarnga inuussutissallu pinngitsoorneqarsinnaanngillat. Inuussutissat ilaat kangerliumanerup sarfaaneerlutillu Europameersuupput, taamaammallu kangerliumanerup sarfaata issittullu imartaata sarfaata akuleriinnerat qeqqussanik naatitsinermut qanoq sunniuteqassanersoq Nikolinep pissangagisimavaa.
- Qeqqussat naatinneqartut imartani nillertuni alliartorsinnaasut paasivarput. Kalaallit Nunaata kitaani inuussutissanik pilersuineq Norgemi Savalimmiunilu, assingusumik qeqqussanik naatitsisartuni, pilersuinermiit annikinnerummat qeqqussat naatitavut alliartussanersut pissanngatiginikuuara.
Maanna Nikoline Ziemerip Norgemi Savalimmiunilu qeqqussanut naatitanut, ullutsinni niuerutissatut naatinneqartartunut, sanilliullugit naatitani qanoq alliartortiginersut misissorsinnaanngorpaa.
