Kilisaat Tasiilaq nutaaq tunniunneqarpoq
Kilisaat Tasiilaq, Pelagic Greenlandimit - Royal Greenlandimit piginneqataaffigineqartumit pigineqartoq, tunineqarlunilu kilisaammik nutaaliamik aalisarnerusinnaallunilu uninngasuuteqarnerusinnaasumik taarserneqarpoq.
Allattoq Inga Egede, ineg@royalgreenland.comKilisaat Tasiilaq nutaaq Savalimmiuni kalaallit erfalasuannik amusinikkut atianillu aamma naqinnernik talittarfimmi ilisarnaatissaanik qalipaalluni malunnartitsinikkut Pelagic Greenland A/S-imut 2020-mi decembarip sisamaani pisortatigoortumik tunniunneqarpoq.
Kilisaat Tasiilaq pisoqaq Pelagic Greenlandip pisariaqartitaanut naammassinnissinnaajunnaarsimasoq 2020-mi juunimi tunineqarpoq, nutaarlu pisoqqamut taartaasoq kinguninngua tunniunneqartussaagaluarpoq.
- Suliffeqarfimmi kilisaammik nutaamik tuniniaasussami pisoqarnera pissutigalugu kilisaatip nutaap tunniunneqarnissaa sapaatip-akunnerani kingullermimut kinguartinneqarpoq, Royal Greenlandimi ingerlatsinermi tunisassiornermilu ingerlatsisoq Johan Berthelsen ilisimatitsivoq.
Kilisaat ikerinnarsiortoq
Tasiilaq nutaaq kilisaat ateqatini tunineqareersoq assigalugu ikerinnarsiortuuvoq nunatta, Islandip Savalimmiullu imartaani saarullernanik, ammassannik, ammassassuarnik avaleraasartuunillu aalisartartussaq.
Kilisaat nutaaq Tasiilamit pisoqqamiit 50 procentit missaannik tunisassiornerusinnaallunilu pisanik nillataatitsisinnaasumik qerisitsisinnaasumillu 2600 kubikmeterinik initussusilimmik uninngasuusiveqarpoq.
Aalisarnerusinnaanerata saniatigut inuttat isersimaartarfii sulliviilu aamma pitsanngorsarneqarput.
Kilisaat nutaaq 25-inik inuttaqarsinnaasoq Savalimmiuniit 2020-mi decembarip qulingiluaani avalattoq maanna Savalimmiut imartaani saarullernarniarluni aalisarpoq.
Tasiilap nutaap pisortatigoortumik tunniunneqarneraniit assilisat allaaserisap ataani takuneqarsinnaapput.
