Nunanit allaniit suliartortut 27-it tikissapput

- Nunaqavissunik aalaakkaasumik sulisinnaasunik naammattunik pissarsisinnaannginnerput pissutigalugu nunani allaninngaaneersunik sulisussanik tikisitsissaagut, taama oqarpoq suliffeqarfissuarmi sulisoqarnermi ingerlatsisoq, Søren Olsen Damgaard. Taanna aamma oqarpoq Danmarkimi Udlæningestyrelse aqqutigalugu sulisussat nutaat sulinissamut najugaqarsinnaanermullu akuersissutissaat utaqqineqartoq.

- Sulisussanik nunanit allaanersunik 27-inik tikisitinissamik qinnuteqaateqarnerput Avannaata Kommunianit aamma Qeqqata Kommunianit akuersissummik pereerluta maanna Udlæningestyrelsemiit sulisussat nutaat sulinissamut najugaqarsinnaanermullu akuersissutissaat utaqqivarput.

Isumaqatigiissutit

Sulisussat nunanit allaneersut katillutik 27-iusut Tasiusami, Ilulissani, Sisimiuni aammalu Maniitsumi sulissapput. 2018-imi ulapaarfiup nalaani 13-it sulissapput sinnerili 14-it ukiuni marlunni Kalaallit Nunaanniiginnarlutik sulissallutik.

- Sulisussat Filipinerineersut sisamat Tasiusami ukiuni marlunni sulinissaannik isumaqatigiissuteqarfigineqarput. Taamatuttaaq Kinameersut tallimat aammalu Filipinerineersut tallimat ukiut marluk Ilulissani sulisussapput. Kinameersut tallimat Sisimiuni sulisussapput kiisalu Kinameersut arfineq pingasut Maniitsumi sulisussat aprilimiit decemberi tikillugu sulissallutik, Søren Olsen Damgaard oqarpoq.

Sulisussat sineriammeersut amigaatigineqarputtaaq

2018-imi ulapaarfiup nalaani Royal Greenland sulisussanik suli amerlanerusunik atorfissaqartitsivoq.

- Sisimiuni sulisussanik tallimanik aamma Maniitsumi sulisussanik tallimanik 2018-imi ulapaarfiup nalaani sulisussanik atorfissaqartitsinitta avataatigut Kalaallit Nunaaneersunik sulisussanik amerlanerpaanik atorfissaqartitsivugut, Søren Olsen Damgaard oqarpoq, nangipporlu:

-Illoqarfiit taaneqareersut avataatigut 2018-imi ulapaarfiup nalaani sulisussanik Kalaallit Nunaaneersunik tunisasiorfiit taaneqareersut avataasigut sulisussanik atorfissaqartitsigatta ilaatigut Tasiilami suliffissaaleqiffiusumi aamma Tunumi nunaqarfinneersunik sulisussarsiorluta suliniuteqarpugut.

Maniitsumi, Ilulissani Uummannamilu Royal Greenland Kinaminngaaneersunik katillugit 36-inik sulisoqareerpoq. Taakkua 2017-imi upernaakkut tikittut tamarmik ukiuni marlunni sulinissamik isumaqatigissuteqarput.

Kinamiut Maniitsumi illoqarfinnilu allani sulisut suleqatitik kalaallit assigalugit sulinermi atugassaqartinneqarput.

Kinamiut upernaakkut 2017-imi Maniitsumut tikittut suleqatitik kalaallit assigalugit tunisassiorfimmi sulipput. Assimi kinamiut ilaasa suleqatititk kalaallit nerisarfimminni nereqatigigaat takuneqarsinnaapput.