Paamiuni qaleralinnik tunisassiorneq aallartinneqarpoq

- Tunisassiorfik Paamiuniittoq qalerallit nerpiinik tunisassiorfilerlugu 2019-imi ukiakkut sanaqqinneqarpoq. Qalerallit nerpiinik tunisassiorsinnaalernerput nuannaarutigaarput, ajnuaarillu 13-iani qalerallit nerpiinik tunisassiornerput aallartipparput, Royal Greenlandip tunisassiorfiani Paamiuniittumi ingerlatsisoq Jan Jørgensen oqarpoq, nangipporlu:

- Nerpinnik tunisassiulersimanngikkaluarutta sulisugut januaari naallugu sulisinnaasimassanngikkaluarput.

Suliniut pitsaasoq

Pinngitsoorani tulaassorneqartariaqartunik immikkut pisassiissuteqartoqarnera sulisunut 30-niit 35-nut ukioq naallugu suliffissaqartitsineranut tunngaviuvoq. Nerpinnik tunisassiorneq pissuseqatigiiaat allat tunisassiorfimmi tunisassiarineqartut assigalugit imminut akilersinnaassaaq.

- Sila qanoq ikkaluarpat, ulapaarfiugaluarpat ulapaarfiunngikkaluarpalluunniit sulisugut ukioq naallugu suliassaqartissinnaagatsigit suliniut pitsaasuusoq isumaqarpunga. Taamaammat sulisut aalaakkaanerulernissaat taarseraakkunnaarnissaallu, taamatuttaarlu suliniutip Paamiuni sulisoqarniarnikkut ajunngitsumik kinguneqarnissaa neriuutigaarput.

- Ukioq naallugu suliassaqartitsisinnaaleratta siunissami qaninnermi tunisassiorfimmi aalajangersimasumik sulerusuttut qinnuteqaataannik tigusillattaalernissara neriuutigaara, Jan Jørgensen oqarpoq.

Royal Greenlandip tunisassiorfia Paamiuniittoq saattuanik, saarullinnik nipisallu suaannik pingaarnertut tunisassiortarpoq, tunisassiassalli taakku ukiup ilaani taamaallaat tunisassiarineqartarput.

- Piffissap ilaani silarlorujussuartarmat saattuarniat assersuutigiinnarlugu januaarimi ullut sisamaannaat aalisarput. Tamatuma saniatigut tulaanneqartut annertussusaat suliassaqarnitsinnut apeqqutaasarput. Pingaarnertut tunisassiarisartakkagut qalerallit nerpiinik tunisassiornermik maanna ilasinnaagatsigit taamaammat nuannaarutigaarput, tunisassiorfimmi ingerlatsisoq oqarpoq.

Tunisassiorfik Paamiuniittoq qaleralinnik kilisaammiit avataasiortumiit qaleralittanik MSC-tut nalunaarsorsimasunik 2019-imi ukiakkut tulaassivigineqarpoq, kingornalu tunisassiorfimmi sulisut qalerallit nerpiinik tunisassiornissamut ilinniartinneqarput.

- Tunisassiorfitsinni sulisut qalerallit nerpiinik tunisassiornissamut suleqatitsinnit Royal Greenlandip tunisassiorfiani Maniitsumeersuniit ilinniartinneqarput. Taamaammat maani tunisassiorfimmi qalerallit nerpiinik tunisassiornissaq isumalluarfigaarput, Jan Jørgensen oqarpoq.

Tunisassiorfik Paamiuniittoq katillugu 65-it missaannik sulisoqarpoq.

Paamiuni qalerallit nerpiinik tunisassiornermit assit allaaserisap ataani takukkit.