Qaffasinnerpaamik angusaqarluni ilinniakkaminik naammassinnittoq
Royal Greenlandip qullersaqarfiani laboratoriami ilinniartuusimasoq Else Berthelsen sisamanngornerup ullaap tungaani aqqaninngoriartulersoq Danmarkimi Erhvervsakademiet Lillebæltimi misilitsiffissaminut iserpoq. Akunnerup affaani power pointi atorlugu saqqummiussereerluni misilitsiffimminiit anillappoq saqqummiinini naammagisimaarlugu. Minutsip ataatsip ingerlareernerani inimut misilitsiffigisimasaminut iseqquneqarpoq tassani ilinniarnermini naammassinnilluni qanoq angusaqarsimanini tusassallugu.
Allattoq Marie Kuitse Kristensen, mkri@royalgreenland.com- Iserama assut pissangavunga, naak saqqummiinera qamuuna naammagisimaaraluarlugu. Ilinniartsitsisumma censorillu nalunaarusiaq suliarisimasara assut suliarilluagaasoq oqaatigivaat, saqqummiussininnilu apeqqutigineqartut tamaasa eqqortumik ersarissumillu akiortorsimagikka oqarfigimmannga assut eqqissiallappunga, Else Berthelsen oqarpoq.
Elsip nalunngikkaluarlugu angusarisaarsimalluni tupaallaatigeqisaminik tusarlerneqarpoq.
- Ilimasunngeruttorlunga ilinniartitsisuma oqarfigivaanga karakterit qaffasinnerpaartaanik 12-imik tunillunga, tupangaarama nuannaarnermik qissasiinnarpunga. Misilitsiffigisanniit anillakkama aapparisara siunni utaqqisoq takugakku nuannaajummernerup pianik qianeroqqiliinnarpunga, Else Berthelsen oqarpoq.
Royal Greenland ilikkagaqarfioqaaq
Else Berthelsen ukiut marluk affarlu Danmarkimi Erhvervsakademiet Lillebæltimi laborantinngorniarluni ilinniartuunermi ingerlanerani Royal Greenlandimi ukioq ataaseq suliffimmik misiliilluni sulivoq, sulinerminilu ilikkagaqarluarsimanini unnersiutigaa. Soraarummeernermini taama angusarissaartiginerminut ilaatigut Royal Greenlandimi sulinermi nalaani suliassat assigiinngitsut suliarisarsimanerini ilikkagaqarluarsimanerminut patsisaanerarpaa.
- Royal Greenlandimi sulininni assut ilikkagaqarnikooqaanga, taamaammanuna massakkut taama angusarissaartigalunga soraarummeertunga. Royal Greenlandip laboratoriaani suligallarama tatigineqarlunga suliassanik assigiinngitsunik suliassaqartinneqartarpunga, tamanna qujassutigalugulu nuannaarutigeqaara, Else Berthelsen oqarpoq.
Nuummut utissaaq
Else Berthelsen aappanilu maanna Danmarkimi feerialaariarlutik Nuummut utissapput. Maannamullu suli aalajangiutinngilaa sujumaarnerluni, Royal Greenlandimiilli suliffimmik nereqoorfigineqassaguni ammaffigalugu Else oqarpoq.
