Qeqertarsuarmi aalisartoq:

- Nipisanniarnerup aallartinneraniit ulloq siulleq nipisanniutit qassutivut pisaqarluarput, nipisanniarnerullu ingerlanerani piffissaq tamaat pisaqarluartarpugut. Ukioq manna nipisanniarneq uannut nuliannullu ingerlalluqaaq, taama oqarpoq Qeqertarsuarmi aalisartoq 47-inik ukiulik, Karl Jørgen Fisker. Karl Jørgen Fisker nulianilu Ingrid, siorna nipisat suaat tunisaannut naleqqiullugu ukioq manna sisamariaammik annertunerusunik tunisipput.

Qeqertarsuami aalisartorpassuit assigalugit Karl Jørgen Fisker, ukioq manna nipisat suaanik tunisineq aallartimmalli tonserpassuit Royal Greenlandip tunisassiorfianut tunisimavaat. Siorna Qeqertarsuarmi Royal Greenlandip tunisassiorfianut suaat tunineqartunut naleqqiullugit ukioq manna Qeqertarsuarmi aalisartut pingasoriaammik annertunersunik tunisipput.

- Ukioq manna nipisanniarneq ingerlalluaqaaq, tamannalu uagut aningaasaqarnitsinnut iluaqutaaqaaq. Angallatima Poca 570-iusup atortorissaarutissaanik ikkusuivunga aamma angallatinnut akiitsukka akilerpakka, Karl Jørgen Fisker oqarpoq.

Ukioq mannali nipisanniarneq Qeqertarsuarmi aalisartunuinnanngitsoq ingerlalluarpoq, aamma Akunnaani, Kangaatsiami pigisaanilu nunaqarfinni ukioq manna Royal Greenlandip tunisassiorfiini nipisat suaat tunisat siornaniit marloriaammik annertunerupput.

Aningaasaqarnerannut pingaaruteqaqaaq

Qeqertarsuup Tunuani aalisartut nipisat suaat pisassatik 84 tonsiusut sapaatit akunnerit marluk ingerlaneranni pisaraat, taamaattumillu aqutsiveqarfinni allaniit pisassat pisarineqanngitsut nuunneqarput, kingornalu Qeqertarsuup Tunuani aalisartut nipisanniarnertik nangippaat.

- Nipisanniarnerup ingerlaqqissinnaanera uagutsinnut iluaqutaaqaaq, qularinngilara aamma aalisartunut allanut iluaqutaasimassasoq, ukiummi sinneranut aningaasaqarnitsinnut nipisanniarneq pingaaruteqaqimmat. Maanna qaleralinniarneq aallartisarparput, neriuutigaaralu ukioq manna aamma qaleralinniarneq ingerlalluarumaartoq, Karl Jørgen Fisker oqarpoq.

Ukioq manna upernajaarnera nipisanniarnerup ingerlalluarneranut Karl Jørgen Fiskerip pissutaasoraa.

- Siorna nipisanniarnerup nalaani piniutilukkama aamma upernarnerani nillermat pisamanngilanga. Ukioq manna nipisat takkutiaarput, takkukamillu amerlaqalutik takkullutik. Taamaattumik immaqa ukioq manna nipisanniarneq sapaatip akunneranik sioqqutsilluni aallartissimasinnaagaluarpoq. Kisianni ukioq manna nipisanniarnerput ingerlalluaqimmat uanga naammagittaalliutissaqanngilanga, Karl Jørgen Fisker oqarpoq, nangipporlu:

- Qularinngilara maani aalisartut allat uattulli ukioq manna nipisaqarluarnera pissarsiaqarfigilluarsimassgaat.

Ukioq manna Nunatta Kujataani nipisanniarneq aamma ingerlalluarpoq, Paamiuni, Nuummi Maniitsumilu siornamut naleqqiullugu ukioq manna nipisanniarneq ingerlalluannginneruvoq.

Nunatsinni aqutsisoqarfiusuni arfineq marluusuni amerlanerni nipisianniarneq unereerpoq. Qeqertarsuup Tunuani nipisanniarneq juunip aqqarngani matussaaq.