Royal Greenlandip sulisui qanimut naapikkit
Sapaatip akunnerata naanerani Sisimiuniissaguit, taava aalisarneq inuussutissarsiornerlu pillugit saqqummersitsinermi Polar Fish 2018-mi Sisimiut Timersortarfiani pisussami Royal Greenlandimi aalisarnermik siunnersortit naapikkit imaluunniit Royal Greenlandimi ilinniarfiusinnaasut pillugit paasissutissanik aallerit. Aamma niuertarfeqarfinni igaffissuaqarfinniluunniit sulisut soqutiginnittullu allat tamarmik Royal Greenlandimi nunatsinni tuninisassianik tuniniaavimmi sulisut naapillugit tunisassiat pillugit oqaloqatigiartorsinnaavaat, taamatuttaaq Sisimiut Timersortafissuani saqqummersitsinermi takusassarsiorlutik isertut Royal Greenlandip tuniniaaviani raajanik issimik panertitanik ussiaartorsinnaapput.
Allattoq Inga Egede, ineg@royalgreenland.comAalisartut, niuertarfeqarfinni igaffissuaqarfinnilu sulisut, ilinniagaqartut ilinniarfinnilu ilinniartitsisut Royal Greenlandimi imaani nunamilu suliffiutaani suliffimmik misiliilluni ilinniarfiusinnaasut pillugit paasisaqarusuttut allallumi Polar Fish 2018 –eqartoqarnerani Sisimiut Timersortarfianut isertut tamarmik raajanik aamma saarullinnik issimik panertitanik mamartunik ussiinissaminnut Royal Greenlandip tuniniaaviani tikilluaqquneqarput.
Piareersimapput
- Umiatsiaararsorluni aalisartut aalisartullu allat sinerissap qanittuani aalisartut Royal Greenlandip tunisassiorfiinut tunisisartut siunnersorsinnaanerinut immaqalu aningaasatigut attartorsinnaaneq pillugu ataasiakkaarlutik aalisarnermik siunnersortimik oqaloqatiginnissinnaanissaannik periarfissillugit piareersimassaagut. Aamma pisariaqartitsisunut ESU-mut taarsigassarsisinnaaneq pillugu immersugassanik immersuinerni ikiuussinnaavugut. Kisianni aamma aalisarnermi atortorissaarutit umiatsiaarasortunut aalisartunullu allanut sinerissap qanittuani aalisartunut piukkunnarsinnaasut aalisarneq inuussutissarsiornerlu pillugit saqqummersitsinermi misissuataartussaavagut, Royal Greenlandimi aalisarnermi siunnersorti, Klaus Frederiksen oqarpoq, nangipporlu:
- Inuussutissarsiutigalugu aalisartut Sisimiuni aalisarneq inuussutissarsiornerlu pillugit saqqummersitsinermi Polar Fish 2018-imi peqataasut oqaloqateqarnissaminnik pisariaqartitsisut Royal Greenlandip tuniniaavianut tuniniaavik normu 12-imut saaffiginnillutik aalisarnermik siunnersortimik oqaloqateqarnissamik inniminniinissaq siunertaralugu saaffiginneqqullugit.
Royal Greenlandip nunatsinni tunisassianik tuniniaaviani sulisut niuertarfeqarfinni igaffissuaqarfinnullu sulisunut soqutiginnittunullu allanut nunatsinni tunisasiat assigiinngitsut niuerutigerusuppaat, taama oqarpoq Royal Greenlandimi tuniniaasoq, Kaassannguaq Zeeb.
- Nunatsinni tunisassianik niuertarfeqarfinnut igaffissiarnullu tunisinitta annertusinissaa siunertaraarput. Polar Fish 2018-imi peqataanitsigut pisisartuvut immaqalu pisisartut nutaat qanimut naapinnissaannut periarfissaqarpugut, taamatuttaaq saqqummersitsinermi tuniniaavitsnni pisisartut soqutiginnittullu allat tamarmik tunisassiaatitsinnik ussiinissaminnik aamma tunisassiaatitta qanoq iganeqarsinnaanerannik iganermut ilitsersuutinik pissanganartunik tigusinissaminnik periarfissaqassapput. Taamaattumik pisisartuvut, pisisartut nutaat kiisalu soqutiginnitttut allat Sisimiut Timersortarfiani tuniniaavitsinni tuniniaavik 12-imut tikilluaqquakka, Kaassannguaq Zeeb oqarpoq.
Sisimiut Timersortarfiani tuniniaavik 12-imi piffissani ataani allassimasuni Royal Greenlandimi sulisut naapinneqarsinnaapput:
Tallimanngorneq 21. september nalunaaqutaq: 11-16
Arfinngorneq 22. september nalunaaqutaq: 11-16
Sapaat 23. September nalunaaqutaq 11- 16
