Sangusaarluni sisorartartoq Royal Greenlandimit aningaasatigut tapiiffigineqarpoq
Sangusaarluni sisorartartoq Nuunu Chemnitz Berthelsen aningaasanik 100.000 koruuninik annertussusilinnik tapiiffigineqassasoq Royal Greenlandimit aalajangerneqarpoq. Tapiissutit avillugit 2021-mi aamma 2022-mi tunniunneqassapput.
Allattoq Inga Egede, ineg@royalgreenland.com24-nik ukiulik Nuunu Berthelsen Chemnitz, sangusaarluni sisorartartuunini aallunniarlugu ulluinnarni Norgemi najugaqartoq, ulluni makkunani Cortinami Italiamiittumiippoq. Nuunu sangusaarnermi nunarsuarmi pissartanngorniuunnermut arfininngorpat peqataassaaq. Nuunup Royal Greenlandimit aningaasaliiffigineqarnini nuannaarutigaa.
- Sisorartartutut inuunera nuannareqaara, nunanilu tamalaani nunarput sinnerlugu peqataasinnaagama assut nuannaarutigisarpara. Taamaammat Royal Greenlandimiit tapersersorneqarnera qujamasuutigeqaara. Tapiissutit atorlugit timersuut aalluttuarsinnaallugulu nunarput sinnerlugu 2021-mi VM-ertoqarnerani immaqalu 2022-mi OL-ertoqarnerani peqataasinnaavunga, Nuunu Chemnitz Berthelsen oqarpoq, nangipporlu:
- Italiami ulluni makkunani VM-ertoqarnerani ingerlalluaruma Beijingimi Kinamiittumi OL-ertoqarnissaanut anngussinnaanissannut periarfissaqalissaanga. Taamaammat italiami VM-ertoqarnerani angusarissaarnerpaat 40-it akornaniinnissara neriuutigaara.
OL-imut peqataanissamut alloriarneq
Nuunup angajoqqaavi, Kisser Chemnitz aamma Jens Kristian Berthelsen, panimik timersortartutut anguniakkaminik aallussisinnaalernera nuannaarutigaat.
-Panitta Royal Greenlandimit aningaasatigut tapiiffigineqarnera angajoqqaatut nuannaarutigeqaarput. Panitta 2022-mi OL-imut peqataanissaminut anguniagaanut alloriaataavoq. Tassami OL-imut anngutissaguni anngunniunnernut FIS-inut ilaasussaavoq, tassa OL-imut annguniarluni pointinik katersilluni unammisaqattaassaaq, Jens Kristian Berthelsen oqarpoq, Kisser Chemnitzilu ilassuteqarpoq:
- Nuunu maanna aningaasaqarneq ernummatiginagu sisorarnissaminut tunniusimasinnaalerpoq. Iluaqutaaqaaq. Nuunup unammiartorluni angalaneri, akunnittarfimmiittarneri allallu kiisalu sisoraarutai akisupput. Taamaammat Royal Greenlandimiit aningaasanik tapiissutisimmat eqqissiallaqaagut, Kisser Chemnitz oqarpoq.
Nuunu Chemnitz Berthelsen tallimanngorpat 2021-mi februaarip 19-iani anngunniutissaaq. Anngutissaguni arfininngorpat 2021-mi februaarip 20-ani arnat sangusaarlutik nunarsuarmi pissartanngorniunnissaannut peqataassaaq.
