Tunisassiorfiup matuneqarallarnera nunaqarfinni tunitsivinnut ulapaartitsivoq
Royal Greenlandip tunisassiorfia Uummannamiittoq Uummannami erngup mingutsinneqarnera pissutigalugu matuneqarallarpoq. Matusigallarneq nunaqarfinni, Saattuni Ikrasammilu, tunitsivinnut ulapaarnermik kinguneqarpoq. Aalisartut Uummannameersut pisaminnik Royal Greenlandip tunitsiviinut Saattuniittumut Ikerasammiittumullu arfininngormalli tulaassuilerput.
Allattoq Inga Egede, ineg@royalgreenland.com- Sulisugut aqqanillit Royal Greenlandip tunisassiorfiani Uummannamiittumi sulisut sisamat peqatigalugit aalisagarpassuarnik sapaatip-akunnerata naanerani tunisassiorput. Aalisartut marloriaataat sinnerlugit aalisakkat nalinginnaasumik tulaanneqartartut marloriaataat sinnerlugit sapaatiummalli tulaassuipput. Taamaammat ulapaarpugut, suleqatigiilluarattali tamaviaarnerput anigorparput. Taamaammat suleqatikka sulilluarneri pillugit nersualaarusuppakka, Saattuni tunitsiviup aqutsisua Marie Knudsen oqarpoq.
Umiatsiaararsortut Saattuneersut aamma umiatsiaararsortut pujortuleerarsortullu Uummannameersut pisaminnik tulaassuisut Marie Knudsen ilisimatitsivoq.
Tamaviaarneq
Ikerasammi tunitsivik sapaatip-akunnerata kingullerli aammattaaq ulapaarfiuvoq.
- Sapaatip-akunnerata naanerani ulapingaatsiarpugut, aalisartullu Ikerasammeersut Uummannameersullu ataavartumik tulaassuimmata ulapaartuarsinnarpugut. Aalisartut tulaasserusullutik siarngutiinnavipput, taamaammat tunisassiorluta tamaviaarpugut. Oktobarimi tulaassuisussanik inniminniisoqareerpugut, Ikerasammi tunitsiviup ingerlatsisua Elisabeth Filemonsen oqarpoq.
Ukkusissani tunitsiviup piffissami kingullermi tunissasiornermi atortuminnik teknikkikkut ajornartorsiuteqarnerminni tamakkiisumik tunisassiunnginnerat pissutigalugu aalisartut Uummannameersut Ukkusissani tunitsivimmut suli tulaassuinngillat.
- Maanna aalisartunit Uummannameersunit tulaasserusuttunit saaffigineqallattaavugut, Ukkusissani tunitsiviup aqutsisua Johanne Samuelsen oqarpoq.
Oqartussat Uummannap eqqaani aaqqiisariaqartut Ikerasammi aalisartut piniartullu peqatigiiffianni IAPP-mi siulittaasup Johan Frederik Cortzenip kissaatigaa.
- Uummannami ajutoorneq piffissamik eqquinerloqaaq. Ukiaavoq, erngiinnarlu imaq aalisarfigiuminaassissaaq. Taamaammat Uummannami aalisartut aalisaannassagutta pisortat Royal Greenland suleqatigalugu piaartumik kilisaammik tunitsiviusussamik inissiisariaqartut neriuutigaara, Johan Frederik Cortzen oqarpoq.
Uummannami kilisaammik tunitsiviusussamik inissiinissamik pilersaaruteqartoqanngitsoq Royal Greenlandimi kilisaateqarfimmi ingerlatsisoq Andrias Olsen ilisimatitsivoq.
- Erngup mingutsinneqarneranit ajornartorsiutit ulluni qaninnerni aaqqiivigineqarnissaat Nukissiorfiup naatsorsuutigaa, taamaammat Uummannami kilisaammik tunitsiviusussamik inissiissagunanngilagut.
