Umiarsuup qaavaniit aquttarfianut

40-nik ukiulik Tobias Noahsen angallammi naalakkatut ilinniarsimasuusoq aquttunngornissamut periarfissinneqartut ilagaat. Royal Greenlandip kilisaataataata mikinerit ilaata tassa Lomurip aquttarfiani apriilimi inuttaareernermi kingorna periarfissinneqarpoq.

- Kilisaammi avataasiummi aquttuuninngornissara kissaatigalugulu anguniagaraara. Taamaammat Lomurimi aquttutut sulinera anguniakkama angunissaanut alloriarneq siulliuvoq, 40-nik ukiulik Tobias Noahsen oqarpoq.

Tobias Noahsen 1. gradimik angallammi naalakkatut ilinniarsimasuusoq Royal Greenlandip kilisaataataata ilaanni avataasiutaasumi tassa Akamalimmi aquttuaqqatut 2014-imili atorfeqarpoq. Lomurimi aquttarfimmiutut inuttaalluni sulinera kilisaammi aquttunngorluni naalaganngorlunilu akisussaaffeqarnerulernissaanut alloriarnera siulliuvoq.

- Kilisaammi angisuumi qaamiutut inuttaallunga sulinermik ukiorpassuarni misilittagaqarpunga, kilisaammili annertunerusumik akisussaaffeqarlunga inuttanngornissara angorusoqigakku Lomurimi aquttutut inuttaanikkut misilittagaqarnerulernissannut periarfissinneqarnera nuannaarutigeqaara, Tobias Noahsen oqarpoq.

Siunertaq

- Angallammi naalakkatut ilinniarsimasut aquttutut inuttaallutik massakkut atorfillit kilisaatini avataasiutini angisuuni siunissami aquttuunertut naalakkatullu inuttaallutik atorfinitsinneqarnissaat siunertaralugu aquttarfimmiutut inuttaanermikkut misilittagaqarnerulernissaannut aquttarfimmilu sulinermik sungiussinissaannut ilinniartinneqarput, Royal Greenlandimi inuttalerinermi ingerlatsisoq Mika Heilmann oqarpoq.

Tobias Noahsen misigaaq aquttuunerulernissaminik anguniagaqarnerminut suliffimminit tapersersorneqarluni.

- Royal Greenlandip pikkorissartitsisarnermigut tapersersorpaanga, aamma aquttutut 2014-imi atorfinikkamali inuttalerinermut immikkoortortami sulisunit siunnersorneqartarlungalu tapersersorneqartarpunga, Tobias Noahsen oqarpoq, nangipporlu:

- Qaamiutut inuttaallunga sulinermik misilittagaqarluarama aquttutullu sulinermik misilittagalereerama umiarsuup qaavani aquttarfianilu suleriutsit ilisimasaqarfigilerpakka. Taamaattumik neriuppunga kilisaatit ilaasa aquttarfiani inuttatut atorfeqalernissannut anguniagara siunissami angujumaarlugu.

Mika Heilmann oqarpoq, Royal Greenlandip aqumiut kalaallit ilinniakkatigut ineriartortinneqarnissaannut iliuusissatut pilersaarutaa ajunngitsumik kinguneqangajalertoq.

- Tobias aqumiutut ilinniartorpassuatsinnut inuusuttuusunut maligassiuilluarpoq aamma siunissaq eqqarsaatigalugu isumalluarfigisorujussuuarput. Ilinniakkatigut ineriartornini attatiinnassappagu qularinngilarput anguniakkani angujumaaraa, Mika Heilmann oqarpoq, nangipporlu:

- 1. gradimik angallammi naalakkatut ilinniarsimasorpassuit ilinniakkatigut Lomurimi ineriartortinneqartuni siullersaat ilagaat. Ilinniakkatigut ineriartortitassavut allat arlaliupput.

40-nik ukiulik Tobias Noahsen angallammi naalakkatut ilinniarsimasuusoq aquttunngornissamut periarfissinneqartut ilagaat.

- Kilisaammi avataasiummi aquttuuninngornissara kissaatigalugulu anguniagaraara. Taamaammat Lomurimi aquttutut sulinera anguniakkama angunissaanut alloriarneq siulliuvoq, Tobias Noahsen oqarpoq.