Ilinniartuuffissaqqissoq
Royal Greenlandimi inuusuttunik amerlanerusunik ilinniartoqarnissamik anguniagaqarneq ilinniartitsinerup sulinerullu tungaatigut annertuumik akisussaaffiliivoq. Ukiuni kingullerni ilinniartut ilinniareernerup kingorna sulilertartut amerlassusaat 11%-nik qaffassimapput, suliffeqarfissuarmilu ilinniarsimasut taamaalillutik amerliartorput.
Allattoq Pilunnguaq Egede-EnoksenRoyal Greenland inuusuttunik amerlanerusunik ilinniartuuteqarnissamik kingornalu suliffeqarfissuarmi sulilersitsisarnissamik anguniagaqarpoq. Piffissami 2015-2019 akornanni ilinniartut 56%-ii ilinniareernerup kingorna Royal Greenlandimi sulilersimapput. Kisitsisit taakku ukiuni kingullerni 67%-nut qaffassimapput, ilinniartullu ilinniakkamik naammassisaqareernerup kingorna sulilersut taamaalillutik 11%-nik qaffassimapput.
2022-mi suliffeqarfissuarmi tamarmi ilinniartut 62-it ilinniartuusimapput, taakkunanngalu ilinniartut 50-it nunatsinni ilinniartuusimapput.
- Ilinniartut ilinniakkamik naammassisaqareernerup kingorna Royal Greenlandimi sulilertartut 11%-ersuarnik qaffassimanerat nuannaarutigeqaarput. Royal Greenlandimi pikkorissunik ilinniarsimasunillu sulisoqarluarnissaq pingaaruteqarpoq, taamaammat sulilertartut amerlisimanerat suliffeqarfissuup ineriartorneranut iluaqutaassaaq, Royal Greenlandimi ilinniartoqarnermut siunnersorti Ungaaq Abelsen oqaluttuarpoq.
Ukioq manna 2023-mi ilinniartut 87%-ii ilinniakkamik naammassisaqarsimapput.
Periarfissarpassuit
Mia Møller ilinniartut ukioq manna naammassisut ilagaat, taassumalu nunatsinni suliffeqarfiit annersaanni suliffimmik misiliisimanini nuannaraa.
- Royal Greenland suliffeqarfissuuvoq nunani tamalaani immikkoortortalik, taamaammat periarfissat amerlaqaat. Ilaatigut nunani allani suliffimmik misiliisoqarsinnaavoq, taamaalillungalu Royal Greenlandip Svenstrupimi immikkoortortaani qaammat sinnilaarlugu sulillunga misilippara. Taamatut misiliineq nuanneqaaq, Royal Greenlandimi naatsorsuuserisutut sulisoq ilinniartuusimasorlu, Mia Møller, oqaluttuarpoq.
Mia ilinniartorpassuit nunani allani suliffimmik misiliinissamik periarfissaqarsimasut ilagaat, nunanilu allani misiliinissamik periarfissaq Royal Greenlandimi ilinniarnerup sulinerullu iluanni suliniuterpassuit ilaanniippoq.
Atugarissaartariaqarput
Royal Greenland ilinniarnissamik kajumissaarinermik aalisarnermillu aallussinerup iluani ilinniartut ilinniakkaminnik naammassisaqartartut amerliartonissaannik akisussaaffeqarpoq.
- Soorunami Royal Greenlandimi inuusuttut ilinniakkaminnik naammassisaqartartut amerliartornissaannik anguniagaqarneq annertuumik akisussaaffiliivoq. Taamaammat ilinniartut pitsaanerpaanik atugaqartissavagut, matumani ilinniakkaminnik naammassisaqarnissaat qulakkeerlugulu naammassereerpata uatsinni suliinnarnissaat anguniarlugu, ilinniartoqarnermut siunnersorti, Ungaaq Abelsen, oqaluttuarpoq.
Agguaqatigiisillugu Royal Greenlandimi ilinniartut marluugaangata ataaseq ilinniareernerup kingorna atorfinittarpoq.
Angusarissaarneq kisitsisillu qaffakkiartortut suliffeqarfiup suliniuteqarluarneranik ersersitsipput. Suliniuteqarnerit taakku suliffeqarfiup ilinniartuuffissaqqinneranut peqqutaaqataalluinnarput, tamannalu ilinniartuusimasup Mia Møllerip isumaqataaffigisinnaavaa.
- Ilinniarninni suleqatinnit ilinniartinneqarluarluangalu avatangiisinnit tapersersorneqaqaanga. Assersuutigalugu suliffeqarfimmi suliassat aalajangersimasut immikkoortortalluunniit allat soqutigigaanni, taava taakkuninnga misiliinissamik periarfissaqartarpoq. Royal Greenland suliffimmik misiliiffissatut toqqarsimagakku qujamasuutigeqaara, Mia naggasiivoq. Taassuma nunatsinni suliffeqarfiit annersaanni naatsorsuuserisutut suliffittaani nuannareqaa.
Aggustimi 2023-mi ilinniartut nutaat suliffeqarfimmut ilisaritinneqassapput. Siornatigut ilinniartuusarsimasut allarpassuit assigalugit bootcampimut peqataatinneqassapput, matumanilu ilinniakkamik naammassisaqarnissamut sakkussanik pissarsinissaq siunertaavoq.
